Nzimu Wakuperekeka Usabweresa Maphindu
1 Mudasingirira Goliati anyankhondo a Aisraele, nee m’bodzi wa iwo akwanisa kuperekeka towera kumenyana naye. Mbwenye pakhali nkumbizi wa mphale, wakukhonda kudziwa kumenya nkhondo, adaperekeka. (1 Sam. 17:32) Mudasudzulwa Ayuda ku ubitcu ku Yerusalemu mbaleka kumanga malinga, pakhali muleke wa mambo wa Persya adaperekeka towera kusiya mbuto yace ya basa yakulemedzeka pa nyumba ya mambo mbaenda ku Yerusalemu towera kalungamisa basa. (Neh. 2:5) Yahova apasa nkhombo amuna awiri anewa, Davide na Nehemiya, thangwi ya nzimu udapangiza iwo.—1 Sam. 17:45, 50; Neh. 6:15, 16.
2 Lero, nzimu wakuperekeka ndi wakusoweka m’dziko. ‘M’ntsiku zakumalisa’ zino, anthu asakhala akupingizika kakamwe na mabasa, na azinji ‘asapifuna okha ene.’ (2 Tim. 3:1, 2, Chiverano Chachinchino) Ndi pyakukhonda nensa kwa munthu kukhala wakudzudzumika m’pifuno pyace pyene mpaka kupwaza miyai yakucita mabasa ace akuperekeka pangaoneka kufuna kwa kuphedza anango. Natenepa, ninga Akristu, tisafuna kusangizira Yezu, adatoma kucita pinthu towera kuphedza anango. (Jwau 5:5-9; 13:12-15; 1 Ped. 2:21) Kodi tinakwanisa tani kupangiza nzimu wakuperekeka, na tinadzatambira maphindu api?
3 M’kuphedza Abale Athu: Tinakwanisa kupasa “mtsanzayiso wakubulukira kuna nzimu [‘muoni wauzimu’, NM]” kwa anango m’kuperekeka kutawira pa misonkhano nkhani zinaphemba anyakubvesera kucita pyenepi. (Arom. 1:11, C.C) Kutawira kusalemedza Yahova, kusathimizira kubvesesa undimomwene mwakuwanga m’manyerezero na muntima mwathu, na kuthimizira kutsanzaya kwathu na misonkhano. (Sal. 26:12) Tinakwanisambo kuperekeka towera kucita nkhani m’Xikola Ya Utumiki Wa Mulungu mwanaciro nkhani angakhonda khalapo. Pyenepi pinadzatiphedza kukulisa luso yathu yakupfunzisa.
4 Abale anakwanisa kupangiza nzimu wakuperekeka m’kuthimizira kutsalakana pyakutawirira m’mpingo. (Iza. 32:2; 1 Tim. 3:1) Onsene anakwanisa kuphedza towera misonkhano ya cisa na ya gawo ifambe mwadidi m’kuperekeka towera kuphata basa m’madepartamentu akusiyana-siyana. Munaperekeka ife towera kuphata basa m’utumiki pabodzi na muyang’aniri wakufamba-famba peno kumpasa cakudya, pyenepi pisabweresa ‘kuwangisana.’ (Arom. 1:12, Mphangwa Zadidi) Munapereka ife ciphedzo cakuphata basa kwa ana amphawi, azice, nyakudwala na ntenda, mama na anapiana, na anango m’mpingo, tisakhala akukomerwa na kutawirwa na Yahova.—Mis. 19:17; Mach. 20:35.
5 Njira inango towera kuperekeka mwakufuna nzidzi na mphambvu yathu ndi kucenesa na kutsalakana Nyumba ya Umambo. Mwakuthimizira, nakuti anthu azinji akupita m’undimomwene, pana kufunika kukulu kwa Nyumba za Umambo zipswa na anyakuperekeka towera kuzimanga. Banja ibodzi yaperekeka towera kuphedza Misoka Yakumanga Ya Pisa ya kwawo ngakhale banja ineyi nee ikhadziwa basa ya kumanga. M’kupita kwa nzidzi, banja ineyi yapfunziswa basa ineyi na cincino isaphedza kuikha njerwa. Nkazi alonga: “Kuphata basa pabodzi na anango kwabweresa uxamwali wa ponda ndi pondembo. Pakumala kwa ntsiku, tikhali akuneta mbwenye akuwanga mwauzimu.”
6 M’kumwaza Mphangwa: Basa yakufunika kakamwe kuperekeka lero yakuti tinakwanisa kuicita ndi kumwaza mphangwa za Umambo. Munaphedziwa anthu kubvesesa na kuphatisira uphungu wa m’Biblya, iwo asawina cifuniro ca umaso na mphambvu towera kumalisa pidzoloero pyawo pyakuphekesa. Iwo asapfunza cidikhiro cakukomeresa ca Biblya ca ntsogolo. M’kucitisa mapfunziro a Biblya, tikuphata basa yakuperekeka mwakukomerwa na kukhala na maphindu akukhonda mala. (Jwau 17:3; 1 Tim. 4:16) Panango makhaliro athu angatitawirise kucita khundu ikulu m’basa ineyi ya upainiya wakuphedza peno wa m’nzidzi onsene, m’kuenda ku mbuto yakuti iri na kufuna kukulu, peno kupfunza cilongero cinango.
7 Mambo Davide aprofetizari kuti m’nzidzi ukhafuna Mesiya kudzatoma utongi wace, anthu a Mulungu ‘anatoweza [peno kuperekeka] okhene.’ (Sal. 110:3) Na kuthimizirika kwa kukolola kwakumalisa kwauzimu kwa Yahova, pana mabasa mazinji akufuna nzimu wakuperekeka. (Iza. 60:22) Kodi mwatoma kale kulonga: “Ine pano ndinenda! Nditumeni”! (Iza. 6:8) Mwandimomwene, m’kupangiza nzimu wakuperekeka, tisakomeresa Yahova na kukolola pinthu pizinji.
[Study Questions]
1. Kodi Davide na Nehemiya apangiza tani nzimu wakuperekeka?
2. Thangwi yanji Akristu asafunika kupangiza nzimu wakuperekeka?
3. Kodi nzimu wakuperekeka usaphedza tani misonkhano ya mpingo?
4. Kodi ndi njira zipi zinango zakuti tinakwanisa kupangiza nzimu wakuperekeka?
5. Kodi ndi pinthu pipi pinaphataniza Nyumba ya Umambo pinaphemba kuperekeka mwakufuna?
6. Thangwi yanji utumiki ndi basa yakufunika kakamwe kuperekeka yakuti tinakwanisa kuicita?
7. Thangwi yanji nzimu wakuperekeka ndi wakufunika makamaka lero?