Bokosi Ya Mabvunzo

◼ Kodi ndi zipi ngozwi zakuphatisira Interneti towera kulonga na munthu wakuti ife nkhabe kundziwa?

Mbuto zizinji za Interneti zacitwa towera anthu adziwane na towera acedze unango na nzace. Zizinji za mbuto zenezi zisatawirisa anthu kucita na kumwaza manyerezero awo ene, anewa angakwanise kuphataniza pithunzithunzi na mphangwa zinango. Anthu anaona mbuto zenezi angakwanise kupita n’cibverano nawo. Aphale na atsikana asadziwa kakamwe Mbuto zenezi na anango a iwo m’mpingo asaziphatisira mbuto zenezi towera kulonga na anango analonga kuti ndi Mboni za Yahova.

Si pyakunensa tayu kwa munthu anadziwa ife mu Interneti kubisa uunthu wace, kubisa khala ndi munthu wauzimu peno nkhabe, peno kubisa pifuno pyace. (Sal. 26:4) Munthu analonga kuti ndi Mboni ya Yahova angakwanise mu nzidzi uno kukhala wakukhonda kukhulupira, wakubulusiwa m’mpingo, peno wakupanduka waphinga. (Agal. 2:4) Pisalongwa kuti anthu azinji anafuna kupita m’mabonde na anapiana asaphatisira Mbuto zenezi towera kuphata anthu anafuna iwo.

Maseze tikhale na cinyindiro cakuti ule analonga na ife ali na makhaliro adidi m’mpingo, kucedza naye m’Mbuto zenezi mwakukhonda nensa kungakwanise kutipitisa m’makhaliro akuipa. Pyenepi pisacitika thangwi yakuti kazinji kene anthu asakhala aufulu na munthu anakhonda dziwa iwo. Pontho iwo angakwanise kuona mbuto zenezi za Interneti ninga zakubisika mbanyerezera kuti pyonsene pinalonga iwo nkhabe kudzadziwika kwa anango tayu, ninga kwa anyakubala awo peno kwa akulu a mpingo. Mwakutsukwalisa, aphale na atsikana azinji a m’mabanja Acikristu aphatiwa na nsampha unoyu mbatoma kulonga makani akunyanyasa. (Aef. 5:3, 4; Akol. 3:8) Anango aikha pithunzithunzi pya iwo ene pyakucitisa cilepelepe ca ulukwali, madzina akukhonda khala awo, peno kukoya mavidyu a nyimbo za ulukwali m’mitcini yawo ya nzeru.

Mwakubverana na pidalonga ife padzulu apa, anyakubala asafunika kuona mwadidi njira inaphatisira anawo ntcini wa nzeru. (Mis. 29:15) Ndi ngozwi kucemera munthu wakuti nkhabe kundziwa kuti apite n’nyumba mwathu peno kuntawirisa kukhala ekha na anathu. Mu njira ibodzibodzi, ndi ngozwi kwa ife peno kwa anathu kucita uxamwali na anthu akuti nkhabe kuadziwa mu Interneti, maseze khala iwo asalonga kuti ndi Mboni za Yahova.—Mis. 22:3.