Macinjo Akukomeresa A Sentinela!

¹ Mukutoma kwa caka cino, mipingo yatambira cidziwiso cakukomeresa: Kutomera nthanda ya Thongwe ya 2008, A Sentinela inadzakhala ya mitundu miwiri, ntundu ubodzi towera anthu onsene na unango towera ubale wathu Wacikristu basi! Panango imwe mungakwanise kubvunzika: ‘Kodi marevista mawiri anewa anadzakhala tani akusiyana? Kodi ndi api maphindu akukhala na A Sentinela ya mitundu miwiri? Kodi marevista anewa ali na makhundu anango apswa?’

² Kusiyana Kwace: Revista ya ntsiku yakutoma ya nthanda inadzadziwika ninga edição para o público (Revista ya Anthu Onsene). Misolo yonsene mu revista ineyi inadzakhunganyirwa anthu onsene. Revista ya 15 ya nthanda ineyi inadzadziwika ninga edição de estudo (Revista ya Pfunziro) na nee inadzagawirwa mu utumiki wa m’munda tayu. Iyo inadzakhala na misolo yonsene yakufunika ya pfunziro ya nthanda yamumphu pabodzi na misolo inango yakuthimizira yakuti ndi yakufunika kwa Akristu akubatizwa. A Sentinela ya Anthu Onsene nee inadzakhunganyirwa Mboni basi tayu mbwenye makamaka inadzakomeresa anthu akukhonda khala Mboni akuti asalemedza Biblya. Ku khundu inango, Despertai! inadzapitiriza kukhala na cifuno cakuphedza anyakuleri azinji, kuphataniza ale anapenula cikhulupiro ca anango na ale analonga kuti asacita khundu mu uphemberi wakukhonda khala Wacikristu.

³ Maphindu: Mu edição de estudo (Revista ya Pfunziro), nkhabe funikabve kufokotoza mafala ninga “mpainiya” mu njira yakuti munthu wakukhonda khala Mboni abvesese tayu. Revista ineyi ingakwanisembo kukhala na mphangwa zakuti zakhunganyirwa Mboni za Yahova basi na anyakupfunza a Biblya akuti akuthambaruka mwauzimu. Kodi ndiye tani pya edição para o público (Revista ya Anthu Onsene)? Nakuti ntsonga na ntundu wa malembero unadzakhala wakubverana na anthu onsene, anthu akuti si Mboni tayu anadzaphindula na kuleri revista yonsene. Ndimomwene kuti Mboni zonsene za Yahova zinadzaphindula mu kuleri revista ibodzi na ibodzi. Nakuti tinadzagawira A Sentinela na Despertai! ibodzi basi mu utumiki wa m’munda pa nthanda, ife tinadzakhala na nthanda yamumphu towera kukhunganya mwadidi maperekero athu umboni towera akhale akuphindulisa.

⁴ Makhundu Apswa: Makhundu anango apswa akukomeresa akukhunganywa towera revista ya edição para o público (ya Anthu Onsene). Khundu ibodzi inadzalonga pya phata ya pipfunziso pya Malemba mu njira yakukhonda nensa. Inango inadzapangiza kuti Biblya inakwanisa tani kuphedza mabanja. Pontho panadzakhala mabasa a kupfunza Biblya kwa aphale na atsikana. Revista ibodzi na ibodzi inadzakhala na nsolo unafuna kugomezera makhundu anango a Biblya akuti asatipfunzisa pya Yahova ninga munthu.

⁵ Tikuphembera kuti Yahova apase nkhombo masasanyiro anewa apswa a A Sentinela. Tikuphembera kuti revista ineyi pabodzi na Despertai!, ifike kuna anthu azinji a ntima wadidi na mphangwa zadidi.—Mat. 10:11.