Tinakwanisa Tani Kutomesa Mapfunziro A Biblya Na Anthu Adasiyira Ife Marevista
1 Kazinji kene mu ntsiku za Sabudu ife tisagawira marevista A Sentinela na Despertai! mu utumiki. Mbwenye, ineyi ndi njira ibodzi basi ya kukwanirisa cifuno cathu ca kupfunzisa undimomwene anthu akuona ntima. Pantsiapa pana maonero mangasi akuti tinakwanisa tani kugawira bukhu yakuti Biblya Isapfunzisanji pa ulendo wakubwereza na kutomesa pfunziro ya Biblya. Maonero anewa angakwanise kucinjwa towera abverane na cisa canu na kualonga m’mafala anu ene. Khalani waufulu towera kuphatisira njira zinango khala ndi zakuphindulisa kwa imwe.
2 Phatisirani Matsamba Akutoma: Panango mungakwanise kulonga pinthu ninga ipi paulendo wakubwereza: “Marevista adakusiyirani ine asalonga pya Biblya. Onani kuti thangwi yanji kuleri Biblya ndi kwakufunika kakamwe.” Lerini Izaiya 48:17, 18; Jwau 17:3; peno lemba inango yakuthema. Buluka penepo pakumala kupangiza bukhu yakuti Biblya Isapfunzisanji na kusiira mwanaciro nyumba bukhu, mungakwanise kupitiriza kulonga mu njira iyi:
◼ “Biblya isatipasa cidikhiro candimomwene ca ntsogolo.” Pangizani mwanaciro nyumba tsamba 4-5, na bvunzani: “Kodi ndi ipi mwa mapikiro awa inafuna imwe kuona mbikwanirisika?” Fungulirani mwanaciro nyumba nsolo unalonga pya pikiro ya Malemba idasankhula iye, na dingani mwacigwagwa ndima ibodzi peno ziwiri mwanaciro nyumba angatawirisa.
◼ Peno mungakwanise kulonga: “Biblya isatawira mabvunzo mazinji akufunika kakamwe a umaso.” Citisani mwanaciro nyumba kuti anyerezere tsamba 6, na bvunzani khala iye atoma kale kucitika mabvunzo ali pantsi pa tsamba ineyi. Fungulani nsolo unapereka ntawiro, na dingani mwacigwagwa ndima ibodzi peno ziwiri.
◼ Peno mungakwanise kupangiza misolo mingasi ya pyankati na kubvunza kuti ndi nsolo upi udakomerwa na iye. Fungulani nsolo unoyu, na pangizani mwacigwagwa macitiro a pfunziro ya Biblya.
3 Siyani Mbvunzo Pa Ulendo Wakutoma: Njira inango ndi kuikha phata pa ulendo wakutoma towera kucita ulendo wakubwereza. Mwanaciro nyumba angatawira marevista, siyani mbvunzo na mpangeni kuti munadzautawira pa ulendo unango. Wangisirani towera kucita masasanyiro akukhazikika akubwerera, na citani pyonsene towera kukoya mwadidi pyakulemba pyanu. (Mat. 5:37) Mungabwerera, kumbusani mwanaciro nyumba mbvunzo, na mwacigwagwa lerini na dingani matawiro kubulukira ku bukhu Biblya Isapfunzisanji. Mpaseni bukhu towera akwanise kukutowezerani. Pano pana pitsanzo pingasi.
◼ Khala revista idasiya imwe isalonga pya kuthimizirika kwa makhaliro akuipa adziko, mungakwanise kulonga: “Mu nzidzi unango tinadzadinga pya ntawiro wa Biblya wa mbvunzo uyu: Kodi Mulungu anadzabweresa macinjo api pa dziko yapantsi?” Mungabwerera phatisirani tsamba 4-5. Peno mungakwanise kusiya mbvunzo uyu: “Kodi pidengwa ndi cifuno ca Mulungu?” Pa ulendo wakubwereza, pangizani mwanaciro nyumba ndima 7-8 mu nsolo 1.
◼ Khala revista idasiya imwe isalonga pya banja, mbamusati kuenda siyani mbvunzo uyu: “Kodi munthu m’bodzi na m’bodzi m’banja asafunika kucitanji towera kucitisa umaso wa banja kukhala wakutsanzaya kakamwe?” Mungabwerera dingani ndima 4 ya nsolo 14.
◼ Khala revista idasiya imwe isalonga pya kunyindirika kwa Biblya, mungakwanise kusiya mbvunzo uyu towera muutawire pa ulendo wakubwereza: “Kodi Biblya ndi yakulinganira m’pinthu pya siyensiya?” Pa ulendo wakubwerezera, dingani ndima 8 mu nsolo 2.
4 Kunkhomo kwa kuceza kubodzi na kubodzi, siyani mbvunzo unango towera mudzautawire pa ulendo unango. Mungaona kuti pfunziro yakhazikika, dingani bukhu mwakulinganira kutomera pakutoma mpaka kunkhomo. Kodi ndiye tani mphapo khala mwanaciro nyumba akhonda kutambira bukhu yakuti Biblya Isapfunzisanji? Imwe mungakwanise kupitiriza kumbweresera marevista na kuceza naye mukuphatisira Malemba. Munakulisa imwe cifuno cace, panango mukupita kwa nzidzi angakwanise kutawira pfunziro ya Biblya.
5 A Sentinela na Despertai! ingakwanise kucitisa munthu kukulisa cifuno ca kufuna kudziwa kuti Biblya mwandimomwene isapfunzisanji. Na thangwi ineyi, wangisirani kakamwe towera kutomesa pfunziro ya Biblya na anthu ale anatawira marevista. Mu njira ineyi, tinadzapangiza kuti tikubvera ntemo wa Yezu ‘wakuchita anyakupfundza na kuapfundzisa.’—Mat. 28:19, 20, Mphangwa Zadidi.
[Study Questions]
1. Kodi ndi cipi cifuno cathu pa kusiya marevista?
2. Kodi tinakwanisa tani kuphatisira matsamba akutoma m’bukhu yakuti Biblya Isapfunzisanji towera kutomesa pfunziro ya Biblya?
3. Kodi tinakwanisa tani kutomesa pfunziro ya Biblya pakumala kusiya marevista analonga pya (a) kuthimizirika kwa makhaliro akuipa adziko? (b) banja? (c) kunyindirika kwa Biblya?
4. Kodi tisafunika kucitanji khala mwanaciro nyumba akhonda kutambira bukhu yakuti Biblya Isapfunzisanji?
5. Thangwi yanji tisafunika kuwangisira kucita pizinji kupiringana kusiyira basi anthu marevista?