“Mafala Anu Adzipe Ninga Munyu Ntsiku Zonsene”
1 “Mafala anu adzipe ninga munyu ntsiku zonsene mbamudziwa nzeru zakutawira munthu munthu na mafala adidi.” (Akol. 4:6) Mafala athu anadzipa ninga aikhwa munyu tingaasankhula mwadidi na kualonga mu njira yakukomeresa kwa anyakubvesera. Kucita pyenepi mu utumiki ndi pyakufunika kakamwe.
2 Citsanzo Ca Yezu: Mukhapuma iye cifupi na ncera, Yezu atoma kucedza na nkazi wa ku Samariya adabwera kudzatunga madzi. M’midzidzi mizinji nkati mwa kucedza, nkazi unoyu alonga ntsonga zakuti zikhapangiza kukhonda kubverana kwakale kakamwe pakati pa Ayuda na Asamariya. Pontho iye alonga pikakhulupira iye kuti Asamariya abuluka ku dzinza ya Yakobe, natenepa Ayuda akhaipirwa kakamwe na kudziwa kuti Asamariya ndi anthu akunja. Mbuto mwa kupokanya pidalonga nkazi unoyu, Yezu apitiriza na makani akukomeresa. Phindu yace yadzakhala yakuti iye akwanisa kupereka umboni wakuti waphindulisa nkazi unoyu na anthu anango mu nzinda.—Jwau 4:7-15, 39.
3 Munamwaza ife mphangwa tisafunika kukumbukira cifuno cathu— “kulonga mphangwa zadidi” za pinthu pyadidi. (Arom. 10:15) Ife tisafuna kugawana na mwanaciro nyumba manyerezero a kubulukira m’Biblya mu njira yakugalamuka na yakuwangisa, tayu kuncitisa kunyerezera kuti tiri kupokanya pikhulupiro pyace. Iye angalonga maonero akudodomeka, ntawiro wathu nkhabe funika kukhala wakupikisana naye tayu. Kodi iye alonga cinthu cakuti ife tisacikhulupirambo peno cakuti tingakwanise kuciphatisira towera kunsimba na ntima onsene? Panango tingakwanise kupangiza lemba mu kulonga tenepa: “Kodi imwe mwatoma kale kudinga khala pyenepi pinakwanisika?”
4 Kodi ndiye tani mphapo khala mwanaciro nyumba ndi wamankriadu peno musaona kuti pinafuna iye ndi kuketesana basi? Ife tisafunika kupitiriza kukhala akukoma ntima na akukhurudzika m’macitiro na mafala athu. (2 Tim. 2:24, 25) Khala munthu unoyu nkhabe funa mphangwa za Umambo, ndi pyadidi kupangana pyathu mu njira yaluso.—Mat. 7:6; 10:11-14.
5 Maphindu Adidi: Mudayesera mulongo unango kupereka umboni kwa nyakuendekana wace, nkazi abuluka mwakuipirwa, mbatoma kutikana. Mu njira yadidi, mulongo wathu alonga: “Munandilekererambo thangwi ya kukucitisani kupibva tenepo. Ndaphata miyendo, salani mwadidi.” Pakupita masumana mawiri, nkazi agogoda nsuwo wa mulongo, mbaphemba kulekererwa thangwi ya kutawira kwace, na apangiza cifuno cace ca kubvesera pire pikhafuna longa mulongo. Ntawiro wadidi kazinji kene usabweresa maphindu adidi!—Mis. 15:1; 25:15.
6 Wangisirani kuphatisira mafala akudzipa ninga aikhwa munyu munamwaza imwe mphangwa zadidi. Maseze mwanaciro nyumba akhonde funa kubva, iye angakwanise kufuna kubvesera pa ndzidzi unango Mboni za Yahova zingafika panyumba pace.
[Study Questions]
1. Kodi mafala athu ‘anadzipa tani ninga aikhwa munyu’?
2. Kodi Yezu akwanisa tani kupereka umboni kwa nkazi wa ku Samariya?
3. Kodi tinakwanisa tani kutowezera citsanzo ca Yezu munacita ife utumiki?
4. Kodi tisafunika kucitanji khala mwanaciro nyumba ndi wamankriadu?
5. Kodi mulongo unango akhala na maphindu anji thangwi ya kutawira mu njira yadidi?
6. Thangwi yanji ndi pyadidi kwa ife kuphatisira mafala akudzipa ninga aikhwa munyu mu utumiki?