Ife Tonsene Tinakwanisa Kupasa Cinthu Yahova
1 Kodi imwe musadziwa kuti anthu anakwanisa kupasa cinthu Mulungu? Abele apereka pingasi pya pifuyo pyace pyakufunika kakamwe ninga ntsembe kwa Yahova na Noa na Yobe acitambo pyakupereka pyakulandana na pyenepi. (Gen. 4:4; 8:20; Yobe 1:5) Mwandimomwene, pyakupereka pyenepi nee pyapfumisa Nciti tayu, nakuti iye ndi mwanacinthu wa pinthu pyonsene. Mbwenye ntsembe zenezi zapangiza kuti amuna anewa akukhulupirika akhafuna kakamwe Mulungu. Lero, ife tingakwanise kuphatisira ndzidzi wathu, mphambvu zathu na mpfuma zathu towera kupasa Yahova “ntsembe ya kunsimba.”—Aheb. 13:15.
2 Ndzidzi: Ndi pyakusimbika tani ‘kubanza’ ndzidzi wakuti mbitidaubvunga na pinthu pyakukhonda funika maka towera kucita khundu mwakukwana mu utumiki! (Aef. 5:15, 16) Panango tinakwanisa kucinja ndandanda wathu towera titumikire ninga mpainiya wakuphedza nthanda ibodzi peno zizinji zene pa caka. Pontho ife tingakwanise kuthimizira pang’ono ndzidzi unabvunga ife kazinji kene mu utumiki. Kukhala phindi zakuthimizirika 30 pa sumana ibodzi na ibodzi mbukudathimizira mphindi zakukhonda kucepa ziwiri pa nthanda m’basa yathu ya utumiki!
3 Mphambvu: Towera tikhale na mphambvu zakuti tinakwanisa kuziphatisira mu utumiki tisafunika kucalira masenzekero na basa yakuti inaticitisa kukhala akuneta kakamwe mbiticimwana kucita pyonsene pinakwanisa ife kwa Yahova. Pontho tisafunika kucalira pidzudzumiso pyakuti ‘pinatsukwalisa’ ntima wathu, mbipitimalira mphambvu zathu zakuti mbitidaziphatisira mu kutumikira Mulungu. (Mis. 12:25) Maseze tikhale na pidzudzumiso pikulu, ndi pyadidi tani ‘kusiyira Yahova pidzudzumiso pyenepi’!—Sal. 55:22; Afil. 4:6, 7.
4 Mpfuma: Ife tingakwanisembo kupereka mpfuma zathu zakumanungo towera kuphedza basa yakumwaza mphangwa. Paulu awangisa Akristu anzace kuti ‘akoye ndzidzi onsene kobiri’ towera akwanise kukhala na cinthu cakupasa anyakucerenga. (1 Akor. 16:1, 2) Mu njira ibodzibodzi, ife tisafunika kukoya kobiri pang’ono towera kuphedza pyakufuna pya mpingo wathu pabodzi na pya basa ya dziko yonsene yapantsi. Yahova asakomerwa na pyakupereka pyathu pyakubulukira mu ntima, ngakhale pikhale ping’ono.—Luka 21:1-4.
5 Yahova atipasa pizinji kakamwe. (Tgo. 1:17) Ife tisapangiza kupereka kwathu takhuta mu kubvunga mwakudzala manja ndzidzi wathu, mphambvu zathu na mpfuma zathu towera kuntumikira. Kucita kwathu pyenepi kusakomeresa Yahova, thangwi ‘Mulungu asafuna munthu anapasa mwakukomerwa.’—2 Akor. 9:7.