Khunganyani Anthu Apswa Towera Akwanise Kuthimbana Na Mpingizo
1 Anthu angatoma kupfunza Bhibhlya na ‘kufuna kukhala na moyo wakulemedza Mulungu,’ Sathani asawangisira kakamwe towera kuapingiza. (2 Tim. 3:12) Mpingizo unakwanisa kubwera kubulukira kwa anzawo a kubasa, anzawo a kuxikola, peno anyakuendekana awo. Pontho pinakwanisa kukhala pyakunentsa kakamwe angapingizwa na acibale akukhala ninga ali na cifuno cadidi.—Mat. 10:21; Mko. 3:21.
2 Mpingizo Walongerwatu: Anthu apswa asafunika kudziwa kuti mitcingo isafunika kudikhirwa na isapangiza kuti ndiwo anyakupfunza andimomwene a Kristu. (Jwau 15:20) M’midzidzi inango, anango anakwanisa kutipingiza thangwi yakukhala na maonero akuipa akulonga pya Mboni za Yahova. Kumbukani kuti kutsanzaya kukulu kusabwera tingatikanwa thangwi ya kutowerera Yezu na kubvera Mulungu. (Mach. 5:27-29, 40, 41) Pasani cibaso anthu apswa pya ciphedzo caufuni ca Yahova. (Sal. 27:10; Mko. 10:29, 30) Kukhala kwawo aumumphu kusaacitisa kukhala ku khundu ya Yahova mu kulonga pya nseru wa utongi ukulu wa kudzulu na pantsi.—Mis. 27:11.
3 Kufunika Kwa Cidziwiso Candimomwene: Pangizani anyakupfunza anu Bhibhlya kufunika kwa kuthimizira cidziwiso candimomwene mwakukhonda tsalakana mayesero akuti anakwanisa kuthimbana nawo. Kubulukira ku mpingizo, Sathani asacitisa kuti pinapfunza iwo pikhonde khala na mitcici m’mitima yawo yaciphiphiriso. (Mis. 4:23; Luka 8:13) Iwo asafunika kupitiriza kusaka cidziwiso candimomwene ca Mafala a Mulungu towera akhale na cikhulupiro cakuwanga.—Sal. 1:2, 3; Akol. 2:6, 7.
4 Kufunika Kwa Kupirira: Mu n’khaliro wakunentsa kakamwe, kupirira ndi kwakufunika na kunakwanisa kubweresa maphindu adidi. (Luka 21:16-19) Anthu apswa angapirira mpingizo, iwo asaphindula okhene pabodzi na anango. Iwo asaona luso ya Yahova yakupasa nkhombo ale anapirira mwakukhulupirika.—Tgo. 1:12.
5 Mpostolo Paulu akomerwa na kuthambaruka kwauzimu kwa abale ace ku Tesalonika. Iye apereka takhuta kwa Mulungu thangwi ya iwo, azinji akuti iye aaphedza kudziwa undimomwene. (2 Ates. 1:3-5) Ife tinakwanisambo kukhala akukomerwa na akutsanzaya tingakhunganya anyakupfunza athu a Bhibhlya towera akwanise kuthimbana na mpingizo na kupirira.