Munakwanisa Kuphedza Basa ya Utumiki m’Madimingu?

1. Tinapfunzanji ku macitiro a Paulu na axamwali ace ku Filipi?

¹ Ikhali Sabudu, ntsiku yakuti Ayuda azinji Akufilipi akhapuma. Paulu na axamwali ace akhacedzera nzinda unoyu m’maulendo awo aumisionaryo. Mbadaphatisirambo ntsiku ineyi toera kupuma mu utumiki wawo, nkhabepo munthu akhafuna kuapokanya. Nakuti Paulu na axamwali ace akhadziwa kuti Ayuda akhagumanyikana kunja kwa nzinda toera kuphembera, iwo aphatisira mwai unoyu toera kumwaza mphangwa kwa Ayuda. Ndi kutsanzaya tani kudakhala na Paulu na axamwali ace pa ndzidzi udabvesera Lidya, pontho iye pabodzi na acibale ace onsene abatizwa! (Mach. 16:13-15) Nakuti anthu azinji lero asaphatisira Dimingu toera kupuma, thangwi yanji nkhabe kuphatisira ndzidzi ungasi wa ntsiku ineyi toera kumwaza mphangwa kwa iwo?

2. Ndi pinenso pipi pidathimbana na atumiki a Yahova toera kukhonda kumangwa pakumwaza mphangwa n’Dimingu?

² Kuwangisira Toera Kumwaza Mphangwa n’Dimingu: N’caka ca 1927, atumiki a Yahova awangiswa toera kuphatisira Dimingu mu utumiki. Pyenepi pyabweresa kutcingwa kwa akristu. Azinji ku Amerika amangwa thangwi ya kuphonya mwambo wa Sabudo n’Dimingu, kupingiza ntendere, na kugulisa kwakukhonda kutawiriswa. Mbwenye atumiki a Yahova nee alimira kumwaza mphangwa. Mu pyaka 1930, iwo acita masasanyiro a “makampanya akugawika,” akuti amwazi mphangwa a mipingo yapaduzi akhagumanyikana toera kumwaza mphangwa pacisa consene. M’midzidzi yakuti amwazi mphangwa akhamangwa, iwo akhali akunjipa kwakuti mautongi acimwana kualimirisa kumwaza mphangwa. Mukupereka takhuta thangwi ya kuwangisira kudacita abale anewa toera tikhonde kumangwa pakumwaza mphangwa n’Dimingu?

3. Ninji cinacitisa Dimingu kukhala ntsiku yakuthema toera kucita khundu mu utumiki?

³ Ntsiku Yakuthema Toera Kumwaza Mphangwa: Anthu azinji asagumanika panyumba n’Dimingu. Kazinji kene asakhala akusudzuka. Anthu auphemberi panango anakhala na cipendamiro cakubvesera mafala a Mulungu pa ntsiku ineyi. Khala tiri na nsonkhano n’Dimingu, tisabvala ninga tiri kuenda mu utumiki. Thangwi yanji nkhabe kucita masasanyiro a basa ya m’munda mbamudzati kutoma peno pakumala nsonkhano? Khala mphyakufunika, kwatani cakudya peno pyakubweza mata.

4. Ndi kutsanzaya kupi kunafuna khala na ife tingaphatisira ndzidzi ungasi n’Dimingu mu utumiki?

⁴ Tingaphatisira ndzidzi ungasi n’Dimingu mu utumiki, tinapitiriza kukhala na ndzidzi toera kupuma. Kupuma kwathu kunakhala kwakutsanzayisa thangwi yakucita khundu m’basa ya Mulungu. (Mis. 19:23) Panango tinatsanzaya kugumana munthu wa cipendamiro ninga ca Lidya!