Lekani Kunyinyirika
1. Ninji pisaphemba cipapo, pontho thangwi yanji?
1 Kodi mwanyinyirika pakupereka umboni kuxikola thangwi mukhagopa kusingirirwa? Mwandimomwene pasafunika cipapo toera kulonga, makamaka khala ndimwe wamanyadzo. Ninji pinafuna kukuphedzani?
2. Pisaphatanizanji kuphatisira mwadidi ndzeru pakupereka umboni kuxikola?
2 Phatisirani Mwadidi Ndzeru: Ngakhale xikola inaoniwa ninga cisa canu, kumbukani kuti nee musafunika kucedza pinthu pyauzimu na munthu onsene ninga mukumwaza mphangwa nyumba na nyumba. Phatisirani mwadidi ndzeru toera kudzindikira ndzidzi wakulonga. (Koel. 3:1, 7) Pinapfundziswa mu kalasi peno mabasa a kuxikola anakupasani mwai toera kulonga pya cikhulupiro canu. Peno xamwali wanu wa kuxikola panango anabvundza thangwi yanji imwe nkhabe kucita khundu m’mabasa anango a kuxikola. Akristu anango asalonga kuna apfundzisi awo pakutoma kwene kwa caka ca mapfundziro toera kuadziwisa kuti iwo ndi Mboni za Yahova, pontho asapasa apfundzisi mabukhu anafokotoza pikhulupiro pyathu. Anango asaikha mabukhu pa kartera yawo toera anyakupfundza andzawo aacite mibvundzo thangwi ya mabukhu anewa.
3. Munakhunganyika tani toera kupereka umboni kuxikola?
3 Khalani Wakukhunganyika: Khala muli akukhunganyika, cinyindiro canu cinadzathimizirika. (1 Ped. 3:15) Yeserani kunyerezera mwanyapantsi mibvundzo yakuti ingakwaniswe kucitwa, pontho nyerezerani kuti mbamudaitawira tani. (Mis. 15:28) Khala ndi pyakukwanisika, pakuenda kuxikola kwatani Bhibhlya yanu, mabukhu anango, ninga bukhu ya Raciocínios, mabukhu Os Jovens Perguntam, na mabukhu analonga pya pyakucitwa, toera kuaphatisira pa ndzidzi unaafuna imwe. Phembani anyakubalanu toera aphatanize makhundu akuyesera pa kulambira kwanu kwa banja.
4. Thangwi yanji tisafunika kupitiriza kupereka umboni kuxikola?
4 Khalani na Cinyindiro: Lekani kunyerezera kuti andzanu a kuxikola anakusingirirani ndzidzi onsene unalonga imwe pya undimomwene. Anango anadzadzuma cipapo canu, panango iwo anakubveserani. Mbwenye lekani kufewa manungo khala nee munthu m’bodzi abvesera. Yahova anadzakomerwa na kuyesera kwanu. (Aheb. 13:15, 16) Pitirizani kuphemba Yahova kuti akuphedzeni kukhala na ‘cipapo toera mulonge mwadidi mphangwa.’ (Mach. 4:29; 2 Tim. 1:7, 8) Nyerezerani kutsandzaya kukulu kunakhala na imwe munthu angabvesera. Munthu unoyu panango anadzakhala nyakutumikira ndzathu wa Yahova!