Phatisirani Mphambvu Zanu Mwandzeru
1. Lemba ya 1 Akorinto 9:26 isaphatisirwa tani mu utumiki?
1 Mpostolo Paulu alemba: ‘Ine pano ndinathamanga pyadidi, mbandikhonda kudodomeka pa njira. Ndinamenyambo na ndzeru, sinamenya muya tayu.’ (1 Akor. 9:26) Paulu akhalonga pya kudzudzumika kwace thangwi yakusaka kakamwe pifuno pya kutumikira Yahova. Mbwenye, mafala anewa asaphatisirwambo mu utumiki. Tisafunika kutsogolera mphambvu zathu mwandzeru toera kukwanirisa pinthu pizinji. Tinapikwanisa tani?
2. Tinasangizira tani Paulu na amwazi mphangwa anango a pyaka dzana yakutoma pakusankhula ndzidzi na mbuto yakumwaza mphangwa?
2 Ndokoni Kunagumanika Anthu: Paulu na amwazi mphangwa anango a mu pyaka dzana yakutoma akhamwaza mphangwa ku mbuto ikhadikhira iwo kuti mbadagumana anthu. (Mach. 5:42; 16:13; 17:17) Natenepa, khala anthu azinji mu cisa cathu asagumanika panyumba cakumaulo, unoyu unakhala ndzidzi wadidi toera kucita utumiki wa nyumba na nyumba. Kodi mbuto zinadikhira anthu miotokala peno maxitexi a xitima musagumanika anthu azinji namacibese peno cakumaulo pa ndzidzi unaenda anthu kubasa peno pakubwerera kunyumba? Ndi ndzidzi upi ku misika peno mbuto zamalonda za pacisa kusagumanika anthu azinji? Kupereka umboni wa mu nseu panango kunakhala kwakuphindulisa m’midzidzi ineyi.
3. Tinakwanisa tani kutsogolera mphambvu zathu mwandzeru kubulukira mu kuphata kwathu basa mu cisa cathu?
3 Phatani Basa Mwandzeru mu Cisa: Tisafunika kucita gaxugaxu toera kuphatisira mphambvu zathu mwandzeru pakuphata kwathu basa mu cisa cathu. Mwacitsandzo, mbuto mwa kukwata nsoka ukulu kuenda ku cisa cibodzi cene, kwakuti kunadzaphemba mphambvu na ndzidzi uzinji toera kutsalakana nsoka na kuphata basa, pinakhala pyadidi kugawa nsoka unoyu. Mu njira ibodzi ene, pakumwaza mphangwa mu pisa pyakuthaukirana na mizinda, tinadzakwanirisa pisa pyenepi mwakucimbiza mbatikhala na miyai yakulonga na anthu khala misoka nee ndi ikulu kakamwe. Tinakwanisa kukhala na cisa cathu cene cifupi na kunyumba kwathu, cakuti cinadzabweza ndzidzi wakucita ulendo?
4. Ninji cinafuna kudzatiphedza toera kukhala ‘anyakumedza a anthu’ akupembera’?
4 Yezu alandanisa amwazi mphangwa ninga ‘anyakumedza a anthu.’ (Mko. 1:17) Cifuno ca nyakumedza si kumedza kwene basi tayu mbwenye kumanga ntsomba. Natenepa, anyakumedza akuphindulisa asaenda ku mbuto, pontho mu ndzidzi unadikhira iwo kugumana ntsomba, iwo asatoma kumedza mwakukhonda dembuka. Mwandimomwene, iwo asaphatisira mphambvu zawo mwandzeru. Tendeni tipangizembo phinga ibodzi ene mu utumiki wathu.—Aheb. 6:11