Mathangwi Anu Ndi Api ‘Toera Kusekera’?
1. Ndi mathangwi api ali na ife toera kusekera pakumala kwa nthanda zonsene?
1 Pakumala kwa nthanda ibodzi na ibodzi, anthu onsene angaphembwa toera kupereka malipoti awo a basa ya m’munda, mathangwi anu ndi api ‘toera kusekera’? (Agal. 6:4, Tradução do Novo Mundo) Khala ndife apainiya akupambulika akuti asapereka midzidzi yakukwana 130 peno ndife amwazi mphangwa adatawiriswa kupereka mphindi 15, tonsene tisafunika kusekera thangwi tatumikira Yahova na ntima onsene.—Sal. 100:2.
2. Thangwi yanji tisafunika kuwangisira mu kutumikira kwathu Yahova?
2 Ninga Mbuya Ntongi wakudzulu na pantsi, Yahova athema kupaswa pyonsene pinakwanisa ife. (Mal. 1:6) Na thangwi yakufuna kwathu Yahova, tapereka umaso wathu toera kucita cifuno cace. Natenepa, pakumala kwa ntsiku peno nthanda, khala tiri na cinyindiro cakuti tapereka “misapo yakutoma” ya ndzidzi wathu, maluso, na mphambvu zathu m’basa ya Yahova, mwandimomwene tiri na mathangwi toera kusekera. (Mis. 3:9) Mbwenye khala cikumbuntima cathu cikutipanga kuti tinakwanisa kucita pizinji, mphyadidi kudinga ninji pisafunika ife kucita toera kuthimizira basa yathu.—Arom. 2:15.
3. Thangwi yanji ndi kwakukhonda thema kulandanisika tekhene na anthu anango?
3 “Tayu Mwakulandanisa Na Munthu Unango”: Nee ndi kwakuthema kulandanisa pinacita ife na pinacita anango peno kulandanisa pinacita ife lero na pikhacita ife m’midzidzi ikhakhala ife na mphambvu kakamwe. Makhaliro asacinja. Maluso asasiyana. Kulandanisa kazinji kene kusatsogolera kucita mapika peno kukhala na mabvero akuti nee ndife akuthema. (Agal. 5:26; 6:4) Yezu nee alandanisa pikhacita anthu. Mbuto mwace, iye asimba anthu mwakubverana na pikhakwanisa munthu kucita.—Mko. 14:6-9.
4. Ndi ntsonga zipi zakufunika kakamwe zinapfundza ife mu nsangani wa Yezu unalonga pya matalento?
4 Mu nsangani wa Yezu unalonga pya matalento, nyabasa m’bodzi na m’bodzi atambira matalento “ninga mukhakwanisira munthu.” (Mat. 25:15) Pidabwerera mbuya mbaphemba lipoti ya mabasa awo, ale adaphata basa mwakuwanga mwakubverana na maluso awo pabodzi na makhaliro awo asimbwa kakamwe mbapita mu kutsandzaya kwa mbuya wawo. (Mat. 25:21, 23) Munapitiriza ife kucita pizinji m’basa yakumwaza mphangwa za Umambo, tinakwanisa kukhala na cinyindiro ca kutawirwa na Mulungu mbitikhala na mathangwi toera kusekera!