Kumwaza Mphangwa Mu Ndzidzi Wa Nyatwa Mphangwa izi zabuluswa mu Anuário das Testemunhas de Jeová de—2012.

Tsamba 72 ndima 1-2—Indiya

KUPEREKA UMBONI NKAIDI. Ku Indiya, alongo awiri akhadamangwa mbatongwa kuikhwa nkaidi mu ntsiku zixanu thangwi yakumwaza mphangwa. M’bodzi wa iwo asalonga: “Pidafika ife kwene nkaidi, apolixa atibvundza thangwi yanji taikhwa nkaidi, pyenepi pyatipasa mwai wadidi toera kupereka umboni kwa iwo. Nakuti tamangiwa mu ndzidzi ukhakhala ife mu utumiki, tikhali na marevista na matratado mazinji. Tamwaza mphangwa kwa onsene mbitigawira mabukhu mazinji. Tawangisana unango na ndzace, tacita phembero mbitileri mabukhu akhali na ife.

“Buluka penepo, tadzacinjwa kuenda ku kaidi inango ku nzinda. Pidafika ife, anyakaidi andzathu acikazi atibvundzisa thangwi yanji taikhwa nkaidi. Pyenepi pyatipasa mwai toera kulonga nawo pya mphangwa zikhamwaza ife, na kupangizika kuti ndife Mboni za Yahova. Nkazi m’bodzi wakuti akhali muimiriri wa kaidi pidabva iye pikhalonga ife atipanga: ‘Imwe mwaikhwa nkaidi thangwi yakumwaza mphangwa kunja, cincino mukumwaza mphangwa nkaidi!’” Alongo athu akucita masasanyiro toera kuenda kacedza na anyakaidi adapangiza cifuno ku undimomwene.

Tsamba 156 ndima 2 mpaka tsamba 157 ndima 1—Noruega

KUMALISA MPHANGWA ZAUTHAMBI MU PYAKUPEREKA-MPHANGWA

Makamaka mu pyaka 1989 mpaka 1992, Mboni za Yahova ku Noruega zikhapambizirwa pyauthambi, pontho zikhalongwa mwakuipa m’matsamba a mphangwa, m’marevista a dziko, radyo na mu Televizau. Thangwi ikulu kakamwe ya kutcingwa kweneku ikhali kubvera kwathu pinalonga Bhibhlya thangwi ya anthu anabuluswa mu mpingo. (1 Akor. 5:9-13; 2 Jwau 10) Na thangwi ya mphangwa zakuipa zenezi, abale athimbana na makhaliro akunentsa mu utumiki, kubasa, kuxikola, pontho na acibale awo. Ngakhale kuti atowereri a Yezu nkhabe dzudzumika angatikanwa, mbwenye pikhanentsa kakamwe kuthimbana na makhaliro anewa.—Mat. 5:11, 12.

M’bale m’bodzi alonga: “Unoyu ukhali ndzidzi wakunentsa, mbwenye ukhalimbo na maphindu. Wandicitisa kudinga cikhulupiro canga. Kunyerezera mwacidikhodikho cakudya cauzimu cinatambira ife kubulukira kwa mbandazi wakukhulupirika na wandzeru kwawangisa cikhulupiro canga. Ninga maphindu, pyenepi pyatiwangisa toera kuthimbana na mayesero a cikhulupiro.”

Muyang’aniri wa cisa asakumbuka’ “Pikhali pyakuwangisa kuona cipapo ca abale na alongo mu ndzidzi unoyu. Tadzindikira kuti cinthu cakufunika kakamwe cikhafunika ife kucita cikhali kucita khundu kakamwe mu utumiki, kuphatanizambo kupereka umboni wa mu nseu. Mwakutsandzayisa, abale azinji atawira kucita pyenepi.”

Tsamba 180 ndima 1—Ruwanda

Phocas Hakizumwami asakumbuka mbamwetulira thangwi yakukomerwa: Abale a ku mpingo wa Nyabisindu akhali pa nsoka wa adatoma kumangwa. Nakuti tikhadziwa kuti mukupita kwa ndzidzi anango mwa ife mbadamangwambo, tadzindikira kuti mwakukhonda dembuka mbatidamwaza mphangwa basi ene nkaidi. Natenepa, tatonga kuti pakutoma timwaze mphangwa mu cisa cathu consene ‘ca kunja’ kwa kaidi. Taenda kamwaza mphangwa m’mbuto zamalonda, m’misika mbatigawira marevista na mabukhu mazinji. Taphembera kwa Yahova toera atiphedze kumwaza mphangwa mu cisa cathu consene mbatidzati kupitiswa nkaidi. Yahova atiphedza, thangwi tamalisa cisa cathu pa ntsiku 1 ya Malandalupya ya 1985. Taikhwa nkaidi pakupita sumana ibodzi.”

Tsamba 110.

“Iye Akhayetimira Ninga Dzuwa”

WILHELM UHRE

CAKA CAKUBALWA 1901 CAKA CAKUBATIZWA 1949

CIGWAGWA CA UMASO M’mwazi mphangwa wakugalamuka maseze athimbana na utenda wa uzingo.

◼ Na thangwi ya utenda wa uzingo, miyendo ya Wilhelm ikhadaphatwa na nfutete, pontho nee akhakwanisa kulonga mwadidi. Ngakhale tenepo, mudatoma iye kubva mphangwa zadidi mu pyaka 1930, atoma kulonga na anango pya undimomwene ukhapfundza iye. Iye akhaphatisira mota wace wa maroda matatu toera kuenda m’basa ya m’munda, pontho ndzidzi onsene akhaenda ku gombe ya Sortland ku dziko ya Vesterålen toera kuliza nkhani zakugravarwi za m’Bhibhlya mu kuphatisira gramafoni, na kugawira mabukhu. Nakuti akhali wakulamala, pontho akhakhala ekhene, Wilhelm adzabatizwa mu caka 1949. Mbwenye iye akhali m’mwazi mphangwa wacipapo. Azinji akhacita ulendo nkhundu-nkhundu mwa gombe abva pya undimomwene kubulukira kwa iye, anango adzakhala Mboni za Yahova.

Mudagwesera Wilhelm, aenda kakhala kunyumba yakutsalakanira anthu akukalamba na atenda ku Tromsø. Na ciphedzo ca amwazi mphangwa anango, iye apitiriza kupereka umboni mu kuphatisira matsamba. Nakuti akhali wauxamwali, akhali pfuli yaciwangiso kwa anango, kuphatanizambo anyabasa a pa mbuto ineyi. Mudalowa iye, nyakuonera mbuto ineyi alonga: “Ndzidzi onsene tikhakomerwa kakamwe tingaenda nkwartu mwace. Na thangwi ya cikhulupiro cace, iye akhayetimira ninga dzuwa.”