Mafala a Mulungu ndi Amphambvu—Mphangwa izi zabuluswa mu Anuário das Testemunhas de Jeová de 2013
Tsamba 57 ndima 1, mpaka tsamba 59 ndima 3—Azya
Mamuna Wakuoneka Ekhene Ninga Nkazi Acinja Umaso Wace
Rek akula m’banja yadidi ku Kambodia, kutomera muuwana wawo, iye na m’bale wace akuti akhali a mamphasa akhanyerezera kuti akhali akazi. Iwo akhasendzeka na maboneka, pontho akhafuna kakamwe kubvala nguwo zacitsikana. Mai wawo akhadzudzumika, akhali na manyadzo, pontho nee akhali na cakucita. Pakuenda kuxikola akhabvala nguwo zacimuna, mbwenye angafika kuxikola iwo akhacinja mbabvala nguwo zacitsikana. Mukhali iwo na pyaka 16 pyakubalwa, ana mamphasa anewa apita m’mpikisano wa amuna akubvala nguwo zacikazi zakubalika, mbabvekera kakamwe mu nsoka wa pyakubalangaza. Pyenepi pyaacitisa kuoneswa m’maprogramu a Televizau na macitiro anango a masendzekero a pyakubalangaza. Mu ndzidzi wakucepa, Rek atoma kupita m’mabonde na amuna andzace, pontho akhafuna kakamwe kucedza na amuna akuti akhaoneka okhene ninga akazi.
Mai wa Rek atoma kuenda ku gereja, pontho mbakakamiza Rek toera kuenda naye pabodzi. Ngakhale kuti atawira kubvala nguwo zacimuna, iye akhonda kucinga tsitsi yace yakulapha kakamwe. Kazinji kene ntsogoleri wa gereja akhapwaza na kusingirira makaliro a Rek. Ngakhale tenepa, Rek anyerezera kuti mbadayesera kupfundza Bhibhlya ku gereja. Pa sumana yakutoma, alamuka namacibese mbatcobva njinga makilometru mangasi mpaka ku gereja, mbwenye ntsogoleri wa gereja alonga kuti nee anakwanisa kumpfundzisa. Pa sumana yaciwiri ntsogoleri nee abwera, na thangwi ineyi Rek aipirwa kakamwe.
Natenepa, pidafika Rek kunyumba, m’bale wace ampanga kuti pakhadafika nkazi wakuti asapfundzisa Bhibhlya mwakukhonda lipa. Iye asiya bukhu yakuti Kodi Mwandimomwene Biblya Isapfunzisanji. Ana a mamphasa anewa atoma kupfundza na mulongo unoyu pabodzi na mamunace. Pakumala nthanda zitanthatu, m’bala wace Rek aona kuti nee akhali wakukhunganyika toera kucinja makhaliro ace, iye asiya kupfundza. Mbwenye, Rek akhuyiwa kakamwe na lemba ya 1 Akorinto 6:9, 10, iye aona mwadidi kuti ninji pikhafunika iye kucita. Mu kuwangisira kupfundza, kuleri Bhibhlya, kucita phembero na kugumanika pa misonkhano, iye akwanisa kucenesa umaso wace. Mai wace akupfundzambo Bhibhlya na akuthambaruka mwadidi. Mudabatizwa Rek, mai wace alonga na misozi m’maso “Ndiri wakutsandzaya kakamwe na kuona mwananga mbabatizwa ninga mamuna.” Lero, iye akutumikira ninga mpainiya wa ndzidzi onsene.
Ng’anga Asiya Kukhulupira Mizimu
Or-Ya akhali ng’anga wakukhulupira mizimu, nyakupereka uphungu na nyakulotera pya ntsogolo. Banja ibodzi ya apainiya akupambulika akuti akutumikira mu Haifa, ku Israele, agumana nkazi unoyu mu utumiki wawo wa nyumba na nyumba. Iye aamwanyika na mafala akuti: “Khala musafuna kulonga pya Mulungu, pitani!” N’nyumba mwace mukhali na pinthu pizinji pyakuphatana na kukhulupira mizimu. Iye alonga kuti akhatambira mphangwa zakubulukira kwa Mulungu, na zinango zakubulukira kwa “nzimu” wa mpfundzisi waciyuda wakuti afa.
Iye akomerwa kakamwe pidaphembwa iye toera kupfundza Bhibhlya mu kuphatisira bukhu Biblya Isapfunzisanji. Pa ntsiku ziwiri banja ineyi mbidzati kufika panyumba pace, iye akhadaphembera kwa Mulungu toera antumizire munthu wakuti anakwanisa kumpfundzisa Bhibhlya mwakukhonda kuphatisira pipfundziso pya Ciyuda. Nkati mwa nthanda ibodzi, iye abvundza, “Kodi alipo anthu anango asakhulupirambo pinakhulupira imwe?” Iye agumanika pa nsonkhano wa mpingo, pontho adzumatirwa na citsalakano na ufuni udapangizwa kwa iye. Kutomera penepo mpaka lero, iye asagumanika pa misonkhano mwakukhonda phonya.
Pakupita nthanda ziwiri mbakapfundza, Or-Ya abvundza pya nsonkhano unatowerera kuti: “Kodi munthu nee asabatizwa pa nsonkhano? Khala ndi tenepa, muna nthanda ziwiri za kundipfundzisa toera ndibatizwe!” Cakutoma, iye ataya pinthu pyonsene pyakukhulupira mizimu. Buluka penepo iye asiya basa ineyi, mbatoma kupereka umboni kuna anango, mukuphatisira bukhu Biblya Isapfunzisanji, na marevista kwa onsene akuti akhali atenda ace akale. Pidagwerwa iye na utenda, Or-Ya akhonda kuphatisira njira zace zakale zakuwangisa utenda. Pidasiya iye basa ya ung’anga, amala nthanda zinai nee kugumana kobiri. Ngakhale tenepa, iye acita masasanyiro toera kuphata basa—ntsiku zinai pa sumana, na midzidzi mitanthatu pa ntsiku—toera kukhala na ndzidzi wakupfundza, kuenda ku misonkhano, na mu utumiki. Mukupita kwa ndzidzi, iye agumana basa yadidi kakamwe. Natenepa, iye agulisa nyumba yace ikulu mbakhala n’nyumba ing’ono yakuti akhalipa kobiri.
Pakupita kwa ndzidzi, Or-Ya akhali wakuthema toera kubatizwa, mbwenye mbidzati kufika sumana ya nsonkhano, akhumuka mwendo. Mwakukhonda bwerera nduli, iye abatizwa tenepo, mbwenye mwendo wace ukhadaikhwa djeso. Lero, Or-Ya ndi m’mwazi mphangwa waphinga, asapereka umboni kwa atenda ace akale na kucitisa mapfundziro a Bhibhlya.