Mianmar

Tsamba 136-137

Udidi Wawo Wandicitisa Kutawira Undimomwene

ZAW BAWM

CAKA CAKUBALWA 1954

CAKA CAKUBATIZWA 1998

CIGWAGWA CA UMASO Kale iye akhagulisa mitombwe yakuledzeresa, pontho akhatcinga undimomwene, mbwenye ntima wace wakhuyiwa na udidi Wacikristu.

NKAZANGA, Lu Mai, pidatoma iye kupfundza Bhibhlya na Mboni za Yahova, ine ndikhantcinga kakamwe. Ndaponya mabukhu ace n’cimbuzi, mbandithamangisa Mboni za Yahova panyumba panga.

Mukupita kwa ndzidzi ndatoma kugulisa mitombwe yakuledzeresa, pyenepi pyandicitisa kuikhwa nkaidi. Pidalamuka ine pa ntsiku yakutoma yakugona nkaidi, Lu Mai anditumizira Bhibhlya na tsamba yaciwangiso yakuti ikhadadzala na malemba a Bhibhlya. Buluka penepo, iye anditumizira matsamba anango ninga anewa. Mudapita ntsiku zingasi, ndaona kuti mbidabvera uphungu wa Bhibhlya, nee mbidapita nkaidi.

Pikhakhala ine nkaidi, ndacedzerwa na amuna awiri akuti akhali Mboni za Yahova. Nkazanga akhadaphemba kuti abale anewa abwere kudzacedza na ine toera kundiwangisa. Iwo akhadacita ulendo wa ntsiku ziwiri. Ndadzumatirwa kakamwe mbandipereka takhuta thangwi ya kundicedzera kwawo. Nee m’bodzi wa acibale anga abwera kudzandiona — basi ene ale akhadatsalakana ine mwakuipa.

Buluka penepo ndikhali ku mbuto ya ungumi thangwi ya utenda wa tifoide, nee ndikhali na kobiri toera kulipa mitombwe. Pa ndzidzi unoyu, ndatambira munthu unango adabwera kudzandiona: Mboni ya Yahova adabwera kudzandiona, thangwi akhadaphembwa na nkazanga. M’bale andibvera ntsisi, mbalipa mitombwe ya utenda wanga. Ndakhala na manyadzo kakamwe, mbandipikira kuti mbidakhalambo m’bodzi wa Mboni za Yahova. Mudapita pyaka pixanu, pidabuluswa ine nkaidi, ndakwanirisa pikiro yanga.

[Cithundzithundzi pa tsamba 4]

Ndakwanirisa “pikiro” yanga, lero ndisacita pyonsene pinakwanisa ine mu kutumikira Yahova