Makhaliro Akutundusa a Matratado Mapswa!
1. Ndi maferamentu api a utumiki akuti ali na makhaliro mapswa?
1 Matratado maxanu mapswa abuluswa pa Nsonkhano wa Gawo wa 2013 wa nsolo wakuti “Mafala a Mulungu ndi Undimomwene!” Mwakuthimizira, Mphangwa za Umambo N.° 38, ya nsolo wakuti “Anyakufa Anakwanisadi kukhala Pontho Maso?” yaikhwambo pa ndandanda wa matratado. Matratado matanthatu anewa ali na makhaliro mapswa akutundusa. Thangwi yanji ali na makhaliro mapswa? Pa kuagawira m’basa ya nyumba na nyumba, tinaphatisira tani makhaliro mapswa anewa?
2. Ndi cipi cifuniro ca makhaliro mapswa a matratado?
2 Thangwi Yanji Ali Na Makhaliro Mapswa? Kazinji kene kupereka umboni nyumba na nyumba kusaphataniza njira zinai: (1) Kucita mbvundzo toera kudziwa maonero na kutomesa makani. (2) Kudinga pinalonga Bhibhlya. (3) Kugawira mwanaciro nyumba bukhu toera kuleri. (4) Kusiya mbvundzo toera kuutawira pa ulendo unafuna kudza, na kucita masasanyiro a ulendo wakubwereza. Makhaliro mapswa a matratado asatiphedza kucita pyenepi mwakukhonda nentsa.
3. Tinagawira tani matratado mapswa mu utumiki?
3 Tinaaphatisira Tani? (1) Pakumala kumwanyika, pangizani mwanaciro nyumba mbvundzo wakusankhula matawiro unagumanika pa tsamba yakutoma, mbamuphemba maonero ace. (2) Fungulani tratado, na dingani nsolo wakuti “Bhibhlya Isalonganji.” Pingakwanisika, lerini lemba kubulukira m’Bhibhlya. Mwanaciro nyumba angakhala na ndzidzi, dingani khundu yakuti “Pyenepi Pisabvekanji Kwa Imwe.” (3) Gawirani tratado, na muwangiseni toera kuleri makhundu anango a tratado. (4) Mbamudzati kubuluka, mpangizeni mbvundzo pa tsamba yakumalisa pa khundu yakuti “Nyerezerani,” citani masasanyiro toera kudinga ntawiro wa Bhibhlya paulendo unafuna kudza.
4. Tinaphatisira tani matratado mapswa paulendo wakubwereza?
4 Nkhabe nentsa kucita ulendo wakubwereza. Phatisirani basi ene malemba anagumanika pa tsamba yakumalisa ya tratado toera kutawira mbvundzo wakumalisa udacita imwe paulendo wakutoma. Mbamudzati kubuluka, mpangizeni cithundzithundzi ca Bruxura Mphangwa Zadidi, pangizani mwanaciro nyumba bruxura na nsolo unalonga mphangwa zakulandana na zidadinga imwe, na kugawira bruxura. Angaitambira, citani masasanyiro toera kudinga bruxura paulendo wanu unafuna kudza. Tepa, mwatomesa pfundziro ya Bhibhlya! Munjira inango, mbuto mwa kugawira bruxura, munakwanisa kugawira tratado inango mbamucita masasanyiro toera kuidinga na mwanaciro nyumba.
5. Kodi matratado ali na ntengo wanji mu utumiki wathu?
5 Matratado asaphatisirwa mu utumiki wathu mu pyaka pyakupiringana 130. Maseze asakhala akusiyana, iwo asapangiza kukhala maferamentu akuphindulisa kakamwe pakupereka umboni. Tendeni tiphatisire mwadidi makhaliro mapswa toera kupitiriza kumwaza cidziwiso ca Bhibhlya pa dziko yonsene.—Mis. 15:7a.