Kulemedzwa Thangwi Ya Makhaliro Athu Adidi, Na Unakatinakati Wacikristu—Mphangwa izi zabuluswa mu Anuário das Testemunhas de Jeová de 2014
Tsamba 120—Serra Leoa na Guiné
“Passaporte” Yathu Ikhali Karaxa
Mu caka 1987, anthu akupiringana 1.000 agumanika pa Nsonkhano wa Gawo wa nsolo wakuti ‘Kunyindira Yahova’ udacitwa ku Guékédou, mu dziko ya Guiné. Nakuti mbuto ya nsonkhano ikhali cifupi na madire a madziko a Serra Leoa na Liberya, anthu azinji a madziko anewa atonga kubwerera kunyumba ntsiku zonsene pakumala kwa nsonkhano. Mbwenye iwo nee akhali na maphaso akukwana toera kucita ulendo. Natenepa, abale angasi akhayang’anira nsonkhano wa gawo acedza na mautongi anaonera pya madire a dziko, mbacita cibverano. Iwo akhafunika kuphatisira phaso ibodzi basi—karaxa yawo ya nsonkhano! Apolixa akhaonera madire a dziko mukhaona iwo karaxa ya kore ya khare, mwakucimbiza iwo akhaapanga kuti pitani.”—Everett Berry, wakuti akhali misionaryo.
Tsamba 149
Tapulumuka M’manja Mwa Anyankhondo Akupanduka
Mukupita kwa ndzidzi, nkulu wa anyankhondo akupanduka na andzace anai akwata nyumba yanga. Iwo atipanga toera tipitirize kukhala panyumba, natenepa, tapitiriza kucita misonkhano mwakukhonda phonya, na kudinga lemba ya ntsiku panyumba. Anyankhondo anango alonga: “Imwe mukuleri lemba ya ntsiku. Mphapo ndimwe Mboni za Yahova.” Iwo nee akhafuna kudziwa pya Bhibhlya, mbwenye akhatilemedza.
Ntsiku inango, nkadamu wa anyankhondo abwera toera kuona pikhacita anyankhondo akhali panyumba yanga. Iye athukula nkono mbacita [continência,] kuna M’bale Amara, cilemedzo ca kumwanyika kwa anyankhondo mbapasana dakamau. Buluka penepo, nkadamu ayang’ana kuna anyankhondo mbalonga mwakugaluza: “Mamuna uyu ndi nkadamu wanga, na wanumbo. Munthu angagwetsa tsisi yace ibodzi, peno ya anthu ace, imwe munapionambo. Mwapibvesesa?” Iwo atawira: “Inde nkadamu!” Buluka penepo, nkadamu atipasa tsamba ikhalonga kuti nsoka wa Frente Revolucionária Unida, nee ukhafunika kuticita pyakuipa, thangwi ndife anthu antendere.
Mudapita nthanda zizinji, misoka ya anyankhondo akupanduka atoma kumenyana okha-okha, na thangwi ineyi tathawira ku dziko ya Liberya. Kweneku tathuswa na nsoka unango wa anyankhondo akupanduka. Ife taapanga: “Ife ndife Mboni za Yahova.” M’bodzi wawo atibvundza: “Mphapo lemba ya Jwau 3:16 isalonganji?” Pidalonga ife pinalonga lemba ineyi, iwo atisiya toera kuenda.
Mukupita kwa ndzidzi, tagumana nkadamu unango wa anyankhondo akupanduka. Iye panga M’bale Amara na ine toera kumperekera. Tikhagopa kuphiwa. Buluka penepo, iye atipanga kuti akhadapfundza Bhibhlya na Mboni za Yahova mbidzati kutoma nkhondo. Iye atipasa kobiri, mbakwata tsamba ikhali na ife toera kuenda kapasa abale a mpingo wacifupi. Mwakukhonda dembuka, abale awiri atibweresera pyakudya, mbatiendesa ku mbuto yacitsidzikizo.