Ufuni Usatidzindikirisa—Mphangwa izi zabuluswa mu Anuário das Testemunhas de Jeová de 2014
Afrika
Tsamba 48 ndima 1, mpaka tsamba 49 ndima 2
“Yahova Na Aanju Anadzakhala Axamwali Anga”
Mary wa pyaka 70 pyakubalwa anakhala ku Keniya akhali mu uphemberi wa Presbiteriana mu umaso wace onsene. Iye akhakwanisa kakamwe kuona ciphedzo ca kobiri, pontho aphedzera kumangwa kwa gereja ibodzi ya mu cisa cace. Mwanace pidadzakhala iye Mboni ya Yahova, Mary nee akomerwa. Mwanace akhamphemba toera kugumanika pa misonkhano, mbwenye iye akhakhonda, mbalonga kuti akhafuna kubva mphangwa za Bhibhlya mu cilongero cace, Quicuio, tayu mu Cisuaili. Mukupita kwa ndzidzi, Mary adzatawira kugumanika pa nsonkhano wa gawo wakuti mbudacitwa mu cilongero ca Quicuio. Pa nsonkhano iye akhala pa mbuto idakoyerwa ankhalamba. Iye akhuyiwa kakamwe na njira yadidi na yaufuni idatsalakanirwa iye. Mary alonga kuti cipo aona ufuni unoyu mu gereja yace. Iye abvesera mwadidi nkhani zonsene pontho akomerwa kakamwe na pidabva iye. Pidabvundzwa iye khala asafuna kupfundza Bhibhlya mu kuphatisira bruxura, Bverani Mulungu, mwakukhonda dembuka iye atawira.
Mudapita nthanda zingasi mbakapfundza Bhibhlya, Mary atonga kukhala Mboni ya Yahova. Iye asiyiratu kucita khundu ya gereja yace. Atsogoleri a gereja aipirwa kakamwe. Iwo acemeresa ntsogoleri wankulu akhakhala ku nzinda ukulu wa Nairóbi toera kulonga na iye. Ntsogoleri unoyu ayesera kulonga na iye toera akhonde kubuluka mu gereja, mbwenye Mary akhadatonga kubuluka. Ntsogoleri ambvundza: “Mbani anafuna kudzakhala axamwali ako ungabuluka mu gereja? Iwe uli na anyakuendekana pontho na axamwali azinji mu gereja.”
Mary atawira: “Yahova na aanju anadzakhala axamwali anga. Pontho, Mboni za Yahova zinadzakhalambo axamwali anga.”
Mudacimwana iye kucinja manyerezero a Mary, ntsogoleri aenda pyace. Mary akupitiriza kuthambaruka mu pfundziro yace ya Bhibhlya, ngakhale kuti asakhala kutali na mbuto inacitirwa misonkhano, iye asagumanika pa misonkhano Yacikristu. Mu pyaka pidapita, pidacimwana iye kugumana motokala toera kuenda ku misonkhano, Mary afamba midzidzi miwiri na miyendo madzi mbakabvumba toera kugumanika pa misonkhano. Maseze asatcingwa na anyakuendekana ace, Mary ali wakutonga toera kukwanirisa cifuno cace cakubatizwa.
Tsamba 69 ndima 1, mpaka tsamba 70 ndima 2
“Kodi Mwabwera Pa Mbuto Yakuphonyeka?”
Nkazi unango wa ku Somalya anakhala ku Suécia akhadaphembwa toera kugumanika pa misonkhano pa Nyumba ya Umambo, iye atonga kuenda. Mbwenye pinthu nee pyafamba mwadidi. Nee m’bodzi ancita bweraniko; onsene akhamuyang’ana kwene basi. Iye akhala na manyadzo kakamwe. Munthu unango adamuona kuti nee akhali wakusudzuka ambvundza: “Kodi mwabwera pa mbuto yaku- phonyeka?”
Iye atawira: “Ndimodi”. Buluka penepo, iye abuluka mbaenda pyace mwakuipirwa. Pidaonana iye na Mboni za Yahova zikhadamphemba toera kugumanika pa misonkhano, iye aapanga kuti cipo mbadabwerera pontho kweneku. Abale anyerezera kuti ninji pidacitika, thangwi nee akhakumbuka kuti amuona mu Nyumba ya Umambo. Mudapitiriza iwo kucedza, onsene adzindikira kuti iye adodomeka mbapita mu gereja!
Abale amuwangisa toera kuenda pontho ku Nyumba ya Umambo. Iye atawira, mbwenye alonga kuti angakhonda kukomerwa na misonkhano nee mbadakhala mphindi zakupiringana khumi. Pidapita iye mu Nyumba ya Umambo, onsene antambira mwauxamwali! Iye akomerwa kakamwe na misonkhano, mbadzakhala wakumalisa kubuluka pa Nyumba ya Umambo. Iye atoma kugumanika pa misonkhano yonsene, cincino iye ndi m’mwazi mphangwa wakubatizwa.
[Mphangwa pa tsamba 4]
Europa
[Mphangwa pa tsamba 4]
MADZIKO
47
ANTHU
741.892.871
AMWAZI MPHANGWA
1.601.915
MAPFUNDZIRO A BHIBHLYA
862.555