Bokosi Yathu Ya Maferamentu Akupfundzisa
1. Amwazi mphangwa Acikristu alandana tani na mesiri wa matabwa?
1 Mesiri wa matabwa asaphatisira maferamentu akusiyana-siyana. Ngakhale maferamentu anango asaaphatisira m’mabasa akupambulika, anango asaaphatisira ndzidzi onsene. Mesiri wa matabwa wakudziwa mwadidi basa yace, ndzidzi onsene asakhala na maferamentu akufunika m’bokosi yace ya maferamentu, pontho anewa asakhala maferamentu akuti asadziwa kuaphatisira mwadidi kakamwe. Bhibhlya isawangisa m’bodzi na m’bodzi wa ife kudzolowera mu utumiki na kukhala ‘nyabasa wakukhonda khala na manyadzo.’ (2 Tim. 2:15) Ndi ipi feramentu yakufunika kakamwe mu bokosi yathu ya maferamentu? Ndi Mafala a Mulungu—feramentu ikulu inaphatisira ife toera ‘kucita anyakupfundza.’ (Mat. 28:18, 19) Natenepa, tisafunika kuwangisira kukhala aluso toera ‘kulonga mwakutowezeka mafala a undimomwene.’ Mbwenye, pana maferamentu anango anaphatisirwa mwakubwereza-bwereza m’bokosi yathu yakupfundzisa akuti Akristu onsene asafunika kupfundza kuaphatisira mwaluso toera kupfundzisa anthu undimomwene.—Mis. 22:29.
2. Ndi api maferamentu athu makulu akupfundzisa?
2 Maferamentu Athu Makulu Akupfundzisa: Kusiyapo Bhibhlya, ndi api maferamentu anango akuti tisafunika kuaphatisira? Feramentu yakutoma iri na ife toera kupfundzisa undimomwene wa Bhibhlya ndi bukhu Kodi Mwandimomwene Biblya Isapfunzisanji? Nyakupfundza angamala kupfundza bukhu ineyi, tisaphatisira bukhu ‘Khalani Mu Ufuni Wa Mulungu’ toera kumpfundzisa kuphatisira midida ya Bhibhlya mu umaso wace wa ntsiku na ntsiku. Ndi thangwi yace tisafunika kukhala aluso pakuphatisira mabukhu anewa mawiri. Mabruxura anango asafunikambo kuphatanizwa m’bokosi yathu ya maferamentu. Bruxura Mphangwa Zadidi Za Mulungu! ndi ibodzi mwa maferamentu athu akufunika toera kutomesa mapfundziro a Bhibhlya. Khala cisa cathu ciri na anthu akuti nkhabe kwanisa kuleri mwadidi peno akuti asalonga cilongero cakuti mabukhu a cilongero ceneci tiri nawo akucepa, tinakwanisa kuphatisira Bverani Mulungu peno Bverani Mulungu toera Mukhale Kwenda na Kwenda. Feramentu ikulu toera kutsogolera munthu kupita mu gulu ndi bruxura Mbani Anacita Cifuno Ca Yahova Lero? Maferamentu akuphedza toera kucita anyakupfundza, pontho akuti tisafunika kupfundza kuaphatisira mwadidi ndi mavidyu Thangwi Yanji Tisafunika Kupfundza Bhibhlya?, Ninji Pinacitwa pa Nyumba ya Umambo? na Deus tem nome?
3. Kodi Utumiki Wathu Wa Umambo unadzatiphedzanji ntsogolo?
3 Ntsogolo, Utumiki Wathu Wa Umambo unadzatiphedza kukhala aluso mukuphatisira mabukhu ali na ife m’bokosi yathu ya maferamentu akupfundzisa. Munawangisira ife kuphatisira maferamentu anewa mwaluso, tinadzabvera uphungu wakupumirwa: ‘Cita mphole iwe wekhene na mapfundzisiro ako. Pitiriza kucita pyenepi, thangwi ungapicita unadzapulumusika wekha na ale anakubvera.’—1 Tim. 4:16.