Pakutoma Khazikisani Ntendere na M’bale Wanu—Tinacita Tani Pyenepi?

Nyerezerani kuti imwe mwabalwa mu ndzidzi wa Yezu, pontho musakhala cifupi na Galileya. Mwaenda ku Yerusalemu toera mugumanike pa Phwando ya Misasa. Nzinda wadzala na alambiri andzanu akuti abuluka mbuto zakusiyana-siyana. Imwe musafuna kupereka ntsembe kuna Yahova. Natenepa mwathukula mbuzi yanu paphewa mbamutoma kucita ulendo pakati pa nzinda toera kufika ku templo. Pidafika imwe, mwagumana kuti templo yadzala na anthu akuti asafunambo kupereka ntsembe. Buluka penepo, wafika ndzidzi wanu toera kupereka mbuzi yanu kuna anyantsembe. Mbwenye mu ndzidzi unoyu musakumbuka kuti mwadawisirana na m’bale peno mulongo wakuti panango ali pakati pa mwinji unoyu peno mu nzinda. Yezu alonga pinafunika imwe kucita. (Lerini Mateo 5:24.) Kodi imwe na m’bale peno mulongo adadawisirana na imwe munapangiza tani kuti musafuna kukhazikisa ntendere ninga pidalonga Yezu? Ikhani cidzindikiro pa ntawiro wadidi pa ndandanda ziri pantsi apa.

IMWE MUSAFUNIKA . . .

• kucedza na m’bale peno mulongo basi ene mungaona kuti ali na thangwi yadidi yakuipirwa

• kuyesera kumphedza mukumpanga kuti iye atsukwala mwakucimbiza kakamwe peno iye aphedzerambo kuti paoneke kukhonda kubverana

• kubvesera mwacidikhodikho pinalonga m’bale peno mulongo, maseze mukhonde kubvesesa pinalonga iye, kuphemba kulekererwa thangwi yakuntsukwalisa peno nyatwa zinango zidaoneka thangwi ya pidacita imwe

M’BALE PENO MULONGO ASAFUNIKA . . .

• kulonga kuna anthu onsene mu mpingo thangwi ya madodo adacita imwe

• kukusandikani na kulonga madodo onsene adacita imwe mbadikhira kuti imwe mulonge kuti mwadawa

• kudzindikira kucepeseka na cipapo cidacita imwe toera kucedza naye na kukulekererani na ntima onsene

Maseze lero nee tisapereka ntsembe za pinyama pakulambira, kodi Yezu alonga kuti matsalakaniro athu abale na alongo asakhuya tani ulambiri wathu kwa Mulungu?