Tinaphatisira Tani Mafala Akukhonda Nentsa Toera Kutomesa Makani?

Kutomera mwezi wa Janeiro wa 2018, mafala akukhonda nentsa toera kutomesa makani asagumanika pa tsamba yakutoma ya Umaso Wathu Wacikristu na Utumiki—Programu ya Misonkhano. Mphapo tinaaphatisira tani?

Mungapaswa Khundu pa Xikola: Musafunika kuphatisira mbvundzo, lemba na mbvundzo toera kuutawira paulendo wakubwereza. Mbwenye pyenepi nee pisabveka kuti imwe musafunika kucita sawasawa ninga pidapangizwa mu vidhyu. Imwe munakwanisa kuphatisira mafala anu toera kutomesa makani. Pontho munakwanisa kugawira ibodzi mwa mabukhu anagumanika m’Bokosi Yathu Yakupfundzisa, maseze nee yaphembwa pa khundu inacita imwe.

Mu Utumiki: Khundu yakuti mafala akukhonda nentsa toera kutomesa makani isaphedza kakamwe. Khala munthu anacedza na imwe apangiza cifuno, pontho asafuna kudziwa pizinji, panango munapitiriza kucedza naye, peno munasiya mbvundzo toera kudzautawira paulendo unango. Panango munakwanisa kuphatisira mafala akusiyana na anagumanika pa khundu yakuti mafala akukhonda nentsa toera kutomesa makani. Kodi mibvundzo na malemba adaphatisirwa mwezi udamala akhuya mitima ya anthu a mucisa canu? Ndi mphangwa zipi peno ndi pinthu pipi pinakomerwa na anthu a mucisa canu? Mwakukhonda tsalakana munjira inaphatisira ife khundu ineyi, cifuno cathu ndi ‘kucita pinthu pyonsene thangwi ya mphangwa zadidi, toera tikwanise kuzimwazira anango.’—1 Akor. 9:22, 23.