Yahova na Yezu Anadzatisudzula

Ndi nyatwa zipi zisathimbana na imwe ntsiku zonsene? Kodi imwe ndimwe nsolo wa banja, pontho musatsalakana mabasa mazinji? Kodi imwe musatsalakana mwekhene ananu? Kodi imwe ndimwe m’phale peno ntsikana wakuti musatsalakanwa mwakuipa kuxikola? Kodi imwe muli kuthimbana na utenda, peno nee musakwanisa kucita pizinji thangwi yakukalamba? Ife tonsene tisathimbana na nyatwa zibodzi zene. Abale na alongo azinji asathimbana na nyatwa zizinji mu ndzidzi ubodzi ene. Mbwenye ife tisadziwa kuti mwakukhonda dembuka, Yahova anadzamalisa nyatwa zenezi zonsene.—2 Akor. 4:16-18.

Kusiyapo pyenepi, ife tiri akutsandzaya thangwi tisadziwa kuti Yahova asadziwa nyatwa zinathimbana na ife, pontho iye asakomerwa kakamwe tingakhala akukhulupirika na akupirira. Natenepa iye anadzatipasa nkhombo zizinji kakamwe ntsogolo. (Yer. 29:11, 12) Yezu asatsalakanambo m’bodzi na m’bodzi wa ife. Na thangwi ineyi, tingathimbana na pinentso m’basa idatipasa iye, tisafunika kunyindira mafala adalonga iye kuti: “Ine ndiri na imwe.” (Mat. 28:20) Natenepa, tinganyerezera mwacidikhodikho ufulu unafuna kubweresa Umambo wa Mulungu, pinatiphedza toera kuwangisa cidikhiro cathu na kupirira nyatwa.—Aroma 8:19-21.

ONANI VIDHYU YA NSOLO WAKUTI NAKUTI CONDZI CIRI CIFUPI, PITIRIZANI KUTOWEZERA YEZU!—NKHOMBO ZINAFUNA KUBWERESA UMAMBO, BULUKA PENEPO TAWIRANI MIBVUNDZO IYI:

• Kodi anthu akhala tani kutali na Mulungu, pontho pyenepi pyabweresanji?

• Ndi nkhombo zipi zinafuna kukhala na atumiki akukhulupirika a Yahova?

• Kodi tsogolo ineyi yakudzumatirisa inakwanisika tani?

• Ndi pinthu pipi pinadikhira imwe mu dziko ipswa?