Mbani Axamwali Anu mu Interneti?

Fala yakuti xamwali isabveka “anthu akuti asafunana kakamwe unango na ndzace.” Mwacitsandzo, Yonatani na Dhavidhi adzakhala axamwali a ponda ndipondembo pidamala Dhavidhi kupha Goliati. (1 Sam. 18:1) M’bodzi na m’bodzi wa iwo akhapangiza makhaliro akuti akhakomeresa unango. Natenepa, anthu asakhala na uxamwali wakuwanga angadziwana mwadidi. Toera kudziwa munthu unango kazinji kene pisakwata ndzidzi, pontho pisaphemba kuwangisira. Mbwenye mu interneti munthu anakwanisa kukhala na “axamwali” mu mphindi zakucepa, pontho nee pisaphemba kuwangisira. Mu interneti anthu asakwanisa kukhunganya mafala anafuna iwo kulonga, pontho anakwanisa kucitisa anthu anango kunyerezera kuti iwo ali na makhaliro adidi. Na thangwi ineyi mphyakukhonda nentsa kubisa makhaliro awo andimomwene. Natenepa mphyadidi kunyerezera mwadidi kuti mbani anafuna ife kutawira toera akhale xamwali wathu. Munthu wakuti nee musandziwa angakuphembani toera mukhale xamwali wace, lekani kutawira thangwi yakugopa kuntsukwalisa. Thangwi yakugopswa kwa kucita axamwali mu interneti, anango asasankhula kukhonda kuphatisira interneti toera kucita axamwali. Mphapo, khala imwe mwasankhula kuphatisira interneti toera kucita axamwali, musafunika kukumbukanji?

ONANI VIDHYU YA NSOLO WAKUTI PHATISIRANI MWANDZERU INTERNETI, BULUKA PENEPO TAWIRANI MIBVUNDZO IYI:

• 

  Musafunika kucitanji mbamudzati kulemba, kulonga peno kuikha mafoto mu interneti?

• 

  Thangwi yanji musafunika kusankhula mwadidi anthu anacedza na imwe mu interneti?

• 

  Thangwi yanji tisafunika kukhazikisa madire thangwi ya ndzidzi unamala ife mbatikaphatisira interneti?—Aef. 5:15, 16