Munaphatisira Tani Khundu Yakuti Mafala Toera Kutomesa Makani

Abale asaphata basa mwakuwanga kakamwe toera kukhunganya khundu ineyi yakuti mafala toera kutomesa makani, pontho amwazi mphangwa azinji asaona kuti khundu ineyi isaphedza kakamwe n’cisa cawo. Nakuti makhaliro ndi akusiyana mu cisa cibodzi na cibodzi pa dziko yonsene, amwazi mphangwa ali akusudzuka toera kuphatisira njira zakusiyana mu utumiki wawo, peno kulonga pinthu pyakuti pinacitisa anthu a pacisa cawo kukhala na cifuno cakubvesera mphangwa zathu. Ndimomwene kuti tonsene tisafunika kutowezera pitsogolero mu ndzidzi wa kampanya, mbwenye cifuno cathu ndi kukwanirisa basa idatipasa Yezu yakumwaza mphangwa zadidi za Umambo.—Mat. 24:14.

Amwazi mphangwa angacita khundu pa xikola, asafunika kuphatisira khundu yakuti mafala toera kutomesa makani inagumanika mu Umaso Wathu Wacikristu na Utumiki. Ngakhale tenepo, iwo ali akusudzuka toera kuphatisira mbvundzo wakusiyana, lemba yakusiyana, mbvundzo wa ulendo wakubwereza wakusiyana peno pinthu pinango pyakuti pinacitisa anthu a mu cisa cawo kufuna kubvesera mphangwa. Pitsogolero pyenepi pisapitira mbuto pitsogolero pinagumanika patsamba 8 ya programu yathu ya misonkhano ya mwezi wa Junho wa 2020.