Kodi Imwe Mukhapidziwa?

Ndi ntundu upi wa ngolo idakwira mamuna wa ku Etiopya mu ndzidzi udanfendedzera Filipi?

FALA yakuti “ngolo” idaphatisirwa m’Bhibhlya ya Dziko Ipswa, isabveka pinthu pyakusiyana-siyana pyakuti anthu anakwanisa kupiphatisira toera kufamba napyo. (Mabasa 8:28, 29, 38) Pisaoneka kuti ngolo idaphatisira mamuna wa ku Etiopya ikhali ngolo ikulu kupiringana ngolo ya anyankhondo peno ya anyakucita mapika. Onani mathangwi mangasi anapangiza kuti ngolo ineyi ikhali yakusiyana na ngolo zinango.

Mamuna wa ku Etiopya akhali wa cidzo, pontho akhadacita ulendo wakulapha. Iye “akhali nyabasa wankulu wa utongi wa Kandasi, mambo wankazi wa ku Etiopya. Mamuna unoyu akhatsalakana mpfuma yonsene ya Kandasi.” (Mabasa 8:27) Dziko ya Etiopya ya mu ndzidzi wakale cincino isaphataniza dziko ya Sudhau na kunterero kwa dziko ya Ejitu. Panango mamuna unoyu wa ku Etiopya nee akhakwira ngolo ibodzi ene pakucita ulendo, pontho pisaoneka kuti akhali na mitolo mizinji pakucita ulendo unoyu wakulapha. Ngolo za mu ndzidzi wa apostolo zakuti zikhaphatisirwa toera kukwata anthu, zikhali na maroda manai. Mwakubverana na mafala analonga pya bukhu ya Mabasa, “ngolo zenezi zikhaphedza anthu toera kukwata mitolo mizinji mbazicitisa kuti ulendo ukhonde kukhala wakunetesa. Pontho pyenepi pikhaphedza anthu toera acite ulendo m’misindzo yakulapha kakamwe.”

Mamuna wa ku Etiopya akhaleri mu ndzidzi udanfendezera Filipi. Bhibhlya isalonga kuti “Filipi athamanga nʼkhundu mwa ngolo, mbabva kuti iye akuleri mwakugaluza bukhu ya mprofeta Izaiya.” (Mabasa 8:30) Ngolo zakucita nazo ulendo nee zacitwa toera zifambe mwakucimbiza. Nakuti ngolo ineyi ikhafamba pang’ono-pang’ono, pyenepi pyaphedza mamuna wa ku Etiopya toera kuleri, pontho pyaphedza Filipi toera kufika mpaka pana ngolo.

Mamuna wa ku Etiopya “aphemba Filipi kuti akwire toera akhale pabodzi na iye.” (Mabasa 8:31) Ale anatsogolera ngolo za mapika asakhala dzololo. Mbwenye mu ngolo zakucita nazo ulendo, mukhali na mbuto yakuti mamuna wa ku Etiopya na Filipi mbadakwanisa kukhala.

Mwakubverana na mphangwa zinagumanika pa Mabasa kapitulu 8 na mphangwa zinango zakunyindirika, cincino mabukhu athu asapangiza foto ya mamuna wa ku Etiopya mbali mu ngolo ikulu, tayu mu ngolo ing’ono ninga zinaphatisirwa na anyankhondo peno anyakucita mapika.