Wangisirani Toera Kupfundza Pinthu Pipswa

Mu ndzidzi unakhunganyika ife toera kupfundza, tinakwanisa kubvundzika: ‘Ninji pinafuna ine kupfundza?’ Ngakhale tenepo, tisafunika kucita mphole-mphole toera tikhonde kunumpha pinthu pyakuti Yahova asafuna kutipfundzisa basi ene thangwi ndi pyakusiyana na pire pinafuna ife kupfundza. Tinacitanji toera tikwanise kupfundza pinthu pipswa?

Phembani udziwisi. Phembani Yahova toera akuphedzeni kuona pinthu pinafuna iye kuti imwe mupipfundze mu ndzidzi unoyu. (Tiya. 1:5) Lekani komerwa basi ene na pinthu pinadziwa imwe kale.—Mis. 3:5, 6.

Tawirisani kuti mphambvu ya mafala a Mulungu iphate basa mu umaso wanu. “Mafala Mulungu ndi a m’maso.” (Aheb. 4:12) Natenepa, ndzidzi onsene unaleri imwe Bhibhlya, iyo inakupfundzisani pinthu pipswa, pontho inakuphedzani munjira zakusiyana-siyana. Mbwenye pyenepi basi ene pinacitika mungakhala dzololo toera kupfundza pinthu pinakupfundzisani Yahova.

Perekani takhuta thangwi ya pinthu pinaphatisira Yahova toera kutipfundzisa. Cakudya cauzimu cinatipasa Yahova ndi ninga “phwando ya pyakudya pyadidi.” (Iza. 25:6) Natenepa, lekani khonda kudya ‘cakudya’ cinanyerezera imwe kuti nee munakomerwa naco. Tawirisani Yahova toera akuphedzeni kukhala munthu wadidi, pontho imwe munakomerwa na pinthu pinakupfundzisani iye.