Anju Aenda Kaona Mariya

NKAZI wakubalika uyu ndi Mariya. Iye ndi Muisrayeli, akakhala m’nzinda wa Nazareti. Mulungu akhadziwa kuti iye akhali munthu wadidi kakamwe. Ndi thangwi ineyi Mulungu atuma anju wace Gabriyeli kuenda kalonga na Mariya. Kodi musadziwa kuti Gabriyeli aenda kapanganji Mariya? Tendeni tione.

Gabriyeli alonga kwa iye: ‘Ntsiku yadidi, iwe wakuthema kakamwe. Yahova ali na iwe.’ Cipo Mariya akhadaona kale munthu unoyu. Iye anenseka, thangwi nee akhadziwa pikafuna kulonga iye. Mbwenye m’nzidzi uneule ene Gabriyeli athondolesa kugopa kwace.

Iye alonga: ‘Leka kugopa, Mariya. Yahova akomerwa kakamwe na iwe. Ndi thangwi ineyi iye anadzakucitira cinthu cakudzumatirisa. Mwakukhonda dembuka iwe unadzakhala na khombwani. Unadzancemera Yezu.’

Gabriyeli apitiriza na kufokotoza: ‘Mwana unoyu anadzakhala wankulu, na anadzacemerwa Mwana wa Mulungu Wapadzuludzulu. Yahova anadzamuikha mambo, ninga Davidi. Mbwenye Yezu anadzakhala mambo kwenda na kwenda, na umambo wace cipo unadzamala!’

Mariya abvunza: ‘Pinadzacitika tani pyonsene ipi? Ine nee kukwatiwa kwene nkhabe. Ine nee ndatoma kukhala na mamuna, natenepa pinadzacitika tani kuti ndikhale na khombwani?’

Gabriyeli atawira: ‘Mphambvu ya Mulungu inadzakugwera. Natenepa mwana anadzacemerwa Mwana wa Mulungu.’ Buluka penepo iye apanga Mariya: ‘Kumbuka wacibale wako Elizabeti. Anthu akhalonga kuti iye akalamba kakamwe kuti akhale na ana. Mbwenye mwakukhonda dembuka iye anadzakhala na mwana wamamuna. Natenepa, ona kuti nkhabe cinthu cinakhonda kwanisa Mulungu kucita.’

M’nzidzi uneule ene Mariya alonga: ‘Ine ndine nzakazi wankazi wa Yahova! Mbipicitike kwa ine sawasawa ninga mudapilongera imwe.’ Buluka penepo anju ansiya.

Mariya athamanga kuenda kaona Elizabeti. Mudabva Elizabeti fala ya Mariya, khombwani m’mimba mwa Elizabeti anumpha na kukomerwa. Elizabeti adzala na nzimu wa Mulungu, mbalonga kwa Mariya: ‘Ndiwe wankhombo mwakupambulika pakati pa akazi.’ Mariya akhala na Elizabeti cifupi na miezi mitatu, buluka penepo abwerera kwawo ku Nazareti.

Mariya akhali duzi na kukwatiwa na mamuna wakucemerwa Zuze. Mbwenye mudadziwa Zuze kuti Mariya mbadadzakhala na khombwani, iye anyerezera kukhonda kumkwata. Buluka penepo, anju wa Mulungu ampanga: ‘Leka kugopa kukwata Mariya kuti akhale nkazako. Thangwi ndi Mulungu adampasa mwana wamamuna.’ Natenepa Mariya na Zuze akwatirana, mbadikhira kuti Yezu abalwe.