Pfunziro 6
Kodi Umambo Wa Mulungu Ndi Ninji?
Kodi Umambo wa Mulungu uli kupi? (1)
Kodi Mambo wace mbani? (2)
Kodi alipo anango anatonga pabodzi na Mambo unoyu? Khala alipo, ndi angasi? (3)
Kodi ndi ninji cinapangiza kuti tikukhala mu ntsiku zakumalisa? (4)
Kodi Umambo wa Mulungu unadzacitiranji anthu kutsogolo? (5-7)
1. Pikhakhala Yezu pa dziko yapantsi, iye apfunzisa atowereri ace kuphemberera Umambo wa Mulungu. Umambo ndi utongi unatsogolerwa na mambo. Umambo wa Mulungu ndi utongi wakupambulika. Iwo wakhazikiswa kudzulu na unadzatonga dziko ino yapantsi. Iwo unadzacenesa, peno kucitisa kuti dzina ya Mulungu ikhale yaungwiro. Iwo unadzacitisa kuti cifuno ca Mulungu cicitwe pa dziko yapantsi ninga cikucitwa kudzulu.—Mateo 6:9, 10.
2. Mulungu apikira kuti Yezu anadzakhala Mambo wa Umambo Wace. (Luka 1:30-33) Pikhakhala Yezu pa dziko yapantsi, iye apangiza kuti anadzakhala Ntongi wakukoma ntima, waulungami na waungwiro. Mudabwerera iye kudzulu, iye hadaikhwa mu nzidzi ene unoyu ninga Mambo wa Umambo wa Mulungu tayu. (Ahebere 10:12, 13) Mu caka 1914, Yahova apasa Yezu utongi ukhadampikira Iye. Kutomera nzidzi uneule, Yezu akutonga kudzulu ninga Mambo wakuikhwa wa Yahova.—Danyele 7:13, 14.
3. Yahova asankhulambo amuna na akazi anango akukhulupirika pa dziko yapantsi towera kuenda kudzulu. Iwo anadzatonga pabodzi na Yezu ninga amambo, atongi na anyantsembe kwa anthu. (Luka 22:28-30; Apokalipse 5:9, 10) Yezu acemera anyakutonga anzace anewa mu Umambo wace ‘nkumbi ung’ono.’ Cilengesero cawo ndi 144.000.—Luka 12:32; Apokalipse 14:1-3.
4. Pakumala kwene Yezu kukhala Mambo, iye athamangisa Sathani na mademonyo ace akuipa kudzulu mbabwera duzi na dziko yapantsi. Ndi thangwi yace pinthu pyadzakhala pyakuipa kakamwe pa dziko yapantsi kutomera caka 1914. (Apokalipse 12:9, 12) Nkhondo, njala, miliri, kuthimizirika kwa makhaliro akuswa mwambo—pyonsene ipi pisacita khundu ya “chidzindikiro” cinapangiza kuti Yezu akutonga na kuti makhaliro ano a pinthu ali mu ntsiku zawo zakumalisa.—Mateo 24:3, 7, 8, 12; Luka 21:10, 11; 2 Timoti 3:1-5.
5. Mwakukhonda dembuka, Yezu anadzatonga anthu, mbaapambula ninga munapambulira nkumbizi mabira na mbuzi. “Mabira” ndi ale akuti anadzapangizika kukhala anthu ace akungonjera mwakukhulupirika. Iwo anadzatambira umaso okhonda mala pa dziko yapantsi. “Mbuzi” ndi ale anafuna kudzakhonda Umambo wa Mulungu. (Mateo 25:31-34, 46) Patsogolo apa, Yezu anadzafudza anthu onsene akukhala ninga mbuzi. (2 Atesalonika 1:6-9) Khala imwe musafuna kukhala m’bodzi wa “mabira” a Yezu, musafunika kubvesera mphangwa za Umambo na kucita pinthu mwakubverana na pinapfunza imwe.—Mateo 24:14.
6. Lero dziko yapantsi iri yakugawika m’madziko mazinji. Dziko ibodzi na ibodzi iri na utongi wayo. Madzinza anewa kazinji kene asamenyana inango na inzace. Mbwenye Umambo wa Mulungu unadzapitira mbuto mautongi onsene a anthu. Iwo unadzatonga ninga utongi ubodzi basi pa dziko yonsene yapantsi. (Danyele 2:44) Buluka penepo nee panadzaonekabve nkhondo, upandu na uphanga. Anthu onsene anadzakhala pabodzi mu ntendere na mwakubverana.—Mikeya 4:3, 4.
7. Nkati mwa Utongi wa Yezu wa Piaka Cikwi, anthu akukhulupirika anadzakhala aungwiro, na dziko yonsene yapantsi inadzakhala paradizu. Mpaka kunkhomo kwa piaka cikwi, Yezu anadzacita pyonsene pidampanga Mulungu kuti apicite. Buluka penepo, iye anadzabwezera Umambo kwa Babace. (1 Akorinto 15:24) Thangwi yanji nkhabe panga axamwali na anyakufunika anu pya pinafuna kudzacita Umambo wa Mulungu?
[Foto pa tsamba 13]
Pantsi pa utongi wa Yezu, nee panadzaonekabve udani peno tsankhu