Khundu 8

Khondani Relijiau Yauthambi; Citani Relijiau ya Undimomwene

1. Pathangwi ya kulambira, kodi anthu asagumanikana na kusankhula kupi lero?

YEZU alonga kuti: “Anakhonda khala kukhundu kwanga asathimbana na ine.” (Mateyu 12:30) Tiri kukhundu ya Yahova peno ya Satana. Anthu azinji asanyerezera kuti akutumikira Mulungu mwakutawirika, mbwenya Bibilya isati Satana “alikupambusa dziko yakukhaliwa yonsene yapantsi.” (Chidziwiso 12:9) Pikwi na pikwi pya anthu asakhulupira kuti ali kulambira Mulungu, mbwenye mwandimomwene ali kutumikira Satana, Diyabu! Anthu lero asagumanikana na cisankhulo: Kutumikira Yahova, “Mulungu wa undimomwene,” peno Satana, “baba wa unthawatawa.”—Masalimo 31:5; Juwau 8:44.

Bulukani m’Relijiau Yauthambi

2. Kodi inango mwa njira zinaphatisa basa Satana towera kukhondesa anthu kulambira Yahova njipi?

² Kusankhula kutumikira Yahova ndiko kwa nzeru, nkhusankhula kwakubweresa kutawirika kwa Mulungu. Mbwenye khala munthu asatumikira Mulungu, Satana nkhabe khala wakutsanzaya tayu; iye asabweresa pinenso kwa ale anacita tenepa. Ibodzi mwa njira zinacita na iye pyenepi ndi kucitisa anthu anango kutiseka peno kutipingiza, ngakhale axamwali athu ene na abale. Yezu acenjeza: “Andedi, anyamwalwa a munthu anadzakhala anthu apabanja yace.”—Mateyu 10:36.

3. Khala abale anu peno axamwali anu akukhondesani kulambira Mulungu, kodi munadzacita tani?

³ Kodi pyenepi pikakucitikirani, munadzacita tani? Anthu azinji asadziwa kuti kulambira kwawo nkhwakudodomeka, mbwenye asapenula kukusiya. Asanyerezera kuti kucita tenepa ndi kukhonda khulupirika kwa abale. Kodi pyenepi mphyanzeru? Mukadziwa kuti abale anu apaduzi asaphatisira basa mitombwe yakuledzeresa yakugoswa, kodi mbumudaacenjeza tayu kuti mitombwe yakuledzeresa inadzaaphekesa? Imwe mbumudaphatana nawo tayu m’kuphatisira basa mitombwe yakuledzeresa, si tenepa tayu?

4. Kodi Yobzwa alonganji kwa Aisrayeli pya kulambira m’ntsiku zace?

⁴ Yobzwa akulumiza Aisrayeli kusiya macitiro na miyambo yakudodomeka ya relijiau ya anyakuwabala. Iye ati: “Cincino, gopani Yahova ntumikireni na ntima wakucena na undimomwene, na bulusani milungu idatumikira makholo anu ku ntunda unango wa Nkulo m’Ijitu, ntumikirani Yahova.” (Yobzwa 24:14) Yobzwa akhali wakukhulupirika kwa Mulungu, natenepa Yahova ampasa nkhombo. Tingakhala akukhulupirika kwa Yahova, iye anadzatipasambo nkhombo.—2 Samueli 22:26.

Pipfunziso pya Marelijiau—A Undimomwene na Authambi

Utatu: Marelijiau mazinji asapfunzisa kuti Mulungu ndi Utatu. Asalonga kuti “Baba ndi Mulungu, Mwana [Yezu] ndi Mulungu na Nzimu Wakucena ndi Mulungu, mbwenye kuti nkhabepo Alungu atatu, mbwenye Mulungu mbodzi basi.”

Bibilya nkhabe tculula na pang’ono pene fala yakuti “Utatu,” nkhabe pfunzisa na pang’ono pene kuti Yahova ndi anthu atatu mwa Mulungu. Yahova basi ndiye Mulungu. Akorintu wakutoma 8:6 isati kuti: “Mwandimomwene kwa ife kuna Mulungu mbodzi basi, Baba.” Yahova ndiye Wapadzuludzulu. Yezu si Mulungu tayu, mbwenye “Mwana wa Mulungu.” (1 Juwau 4:15) M’njira ibodzibodzi, nzimu wakucena si Mulungu tayu. Nzimu wakucena si munthu tayu. Ndi mphambvu ya Mulungu.—Machitiro 1:8; Aefesu 5:18.
Moyo: Marelijiau mazinji asapfunzisa kuti moyo ndi cithu cakukhonda kufa mwa munthu. Bibilya isapfunzisa kuti moyo ndi munthu, ndimomwene kuti, munthu angakwanise kufa.—Genesi 2:7; Ezekieli 18:4.
Imfernu ya moto: Marelijiau authambi asapfunzisa kuti miyoyo ya anthu akuipa isanenswa kwenda na kwenda m’imfernu. Bibilya isalonga kuti akufa “nkhabe dziwa cithu tayu.” (Mlaliki 9:5) Bibilya isapfunzisa pontho kuti “Mulungu ndi kufuna.” (1 Juwau 4:8) Yahova, Mulungu wa kufuna, cipo aganense anango na moto.

Kwadru: Kodi Bibilya isapfunzisanji thangwi ya Utatu, moyo na imfernu ya moto?

Tayani Pinthu Pinaphatisirwa Basa m’Relijiau Yauthambi

Nkazi akupisa pinthu pyace pya madimonyo

5. Kodi thangwi yanji tisafunika kutaya pinthu pya masalapita?

⁵ Kubuluka m’relijiau yauthambi pisabveka pontho kuti tisafunika kufudza pinthu pyonsene pya masalapita pyakuti panango tinapyo, ninga pithumwa, mphete na madzango a masalapita na pinthu pyakulandana. Mphyakufunika kucita pyenepi, nakuti pisapangiza kuti tisanyindira Yahova na ntima onsene.

6. Kodi Akristu akutoma acitanji na mabukhu awo a masalapita?

⁶ Dingani pidacita Akristu anango akutoma mudatongewo kucita relijiau ya undimomwene. Bibilya isati: “Nsoka ukulu wa iwo akhacita masalapita agumanyiza mabukhu awo, mbaapisa pamaso pa anthu onsene.”—Machitiro 19:19.

7. Kodi madimoni akatinensa tisafunika kucitanji?

⁷ Anango adatoma kutumikira Yahova akuti ndulimu akhacita ufiti, ung’anga peno masalapita panango anganenswe na madimoni. Pingacitika pyenepi na imwe, phemberani kwa Yahova mwakugaluza, mbamuphatisira basa dzina yace. Yahova anadzakuphedzani.—Misanje 18:10; Yakobo 4:7.

8. Kodi Akristu asaaona tani adzimunthu, mafanikizo na pithunzithunzi pinaphatisirwa basa m’kulambira?

⁸ Anafuna kutumikira Yahova nkhabe funika kukoya peno kuphatisira basa adzimunthu, mafanikizo peno pithunzithunzi pya ulambiri wa uthambi. Akristu andimomwene “asafamba mwa cikhulupiro, tayu mwa kuona.” (2 Akorintu 5:7) Asalemedza mwambo wa Mulungu unakhondesa kuphatisira basa fanikizo ya ntundu onsene wa kulambira.—Ekisodo 20:4, 5.

Gumanyikanani na Anzakazi a Yahova

Mama pabodzi na mwanace wantsikana akukhunganya cakudya

9. Kodi Bibilya isapasa uphungu wanji khala munthu asafuna kukhala wa nzeru?

⁹ Bibilya isati: “Ule anafamba na anthu anzeru anadzakhalambo wa nzeru.” (Misanje 13:20) Tingafuna kukhala anzeru, tisafunika kufamba, peno kugumanyikana, na Mboni za Yahova. Anthu anewa ndiwo anafamba m’njira inatsogolera ku umaso.—Mateyu 7:14.

10. Kodi Mboni za Yahova zinakuphedzani tani kutumikira Mulungu?

¹⁰ Mboni za Yahova zisatsalakanadi anthu. Basa yawo ndi kuphedza anthu akuona ntima kubvesesa undimomwene wa Bibilya unatsogolera ku umaso okhonda mala. Zinakwanisa kukuphedzani m’kupfunza na imwe Bibilya, mwakukhonda kulipisa. Zinadzakuphedzani kutawira mabvunzo anu na kukuonesani maphatisiro basa a Bibilya m’umaso wanu.—Juwau 17:3.

11. Kodi munadzaphedzwa tani m’misonkhano ya Cikristu?

¹¹ Pamisonkhano yawo, kazinji kene inacitwa m’Nyumba ya Umambo, munadzapfunza pizinji pya njira za Yahova. Cifuno canu ca kucita relijiau ya undimomwene cinadzawangiswa. Pontho munadzapfunziswa njira yakuphedza nayo anango kupfunza undimomwene wa Bibilya.—Ayeberi 10:24, 25.

12. Kodi phembero inakwanisa tani kukuphedzani kutumikira Mulungu?

¹² Mungapitiriza na kupfunza pizinji pya cifuno na cifuniro ca Yahova, mwakukhonda penula kupereka kwanu takhuta na njira zace za kufuna kunadzathimizika. Musafunikambo kuthimizira cifuno canu ca kucita pinthu pinankomera na kucalira pinthu pinamuipira. Kumbukani kuti imwe munakwanisa kufendedzera kwa Mulungu m’phembero, mbamumphemba kuti akuphedzeni kucita cadidi na kucalira kucita cakudodomeka.—1 Akorintu 6:9, 10; Afilipi 4:6.

Banja ikuleri Bhibhlya pabodzi — Kodi munakwanisa tani kucita ulambiri wa undimomwene?

13. Kodi munakwanisa tani kukomeresa ntima wa Yahova?

¹³ M’kupita kwa nzidzi, munakulemwe mwa uzimu, mwakukhonda penula munadzaona kufunika kwa kukhala Mboni yakupipereka na yakubatizwa ya Yahova. M’kugumanyikana na anzakazi a Yahova, munadzakomeresa ntima wa Yahova. (Misanje 27:11) Munadzakhala pakati pa anthu akutsanzaya ale akuti Mulungu asati kwa iwo: “Ndinadzakhala pakati pawo na ndinadzafamba pakati pawo, ine ndinadzakhala Mulungu wawo, iwombo anadzakhala mbumba yanga.”—2 Akorintu 6:16.

Ndasudzuka ku Madimoni

Ntsiku inango na masiku pikhagonene na mamunanga, ndabva fala kucemera dzinanga katatu. Buluka penepo ndaona ntsoyi kupanduka na cinthu cakupisa cakulandana na mpira candigwera pamimba. Ndimomwene kuti, mamunaga hadaona na cibodzi ca pinthu pyenepi. Mbwenye, kubuluka penepo ndabva cinthu kundipisa kakamwe m’miyezi mingasi.

Pakupita miyezi mitanthatu, ndabva pontho fala kundicemera. Mwakucimbiza, nyumba yonsene yakhala ninga yakubizwa m’madzi. M’madzi mwabuluka nyoka ikulu na mbilungira m’nkono mwanga. Ndayesera kugubudza nkono wanga kuti nyoka ibuluke mbwenye nee pidaphedza tayu. Ndakhala wakugopa. Patsogolo, madzi na nyoka pyasoweka, ndaponyiwa pantsi mwamphambvu. Ndakhala wakukomoka midzidzi mingasi. Buluka penepo fala yandipanga kuti ndiyende ku tempulu ya mizimu ya ang’anga m’mudzi. Mudabvunzene dzina ya nzimu, iwo wadipanga dzina inabveka “wakukhala na pfuma, mbwenye wakusowa mwana.” Wandipikira kundipfumisa kubulukira ku mphambvu ya kuwangisa.

Anthu akuduwala akubulukira konsene kwene akabwera kuna ine. Mbadzati kufika panyumba panga, akaoneka pasupeyu yanga. Natenepa, munthu akafika, ndikamenya dzanja yanga na yace, tenepa ndikhali wakudziwa utenda wace peno nyatwa yace pabodzi na mitombwe, pyonsene ndikhadziwiswa. Nzimu ukandipanga pontho kobiri yakuti munthu akafunika kulipa.

Na thangwi ya kukwanisa kuwangisa, ndikhatambira kobiri na masagwati mazinji. ‘Ndakhaladi wa pfuma,’ pontho ndabvesesa mabvekero a “wakusowa mwana.” Nzidzi onsene ndikabala mwana, nkulu wace akafa. Pyenepi pikhali pyakutsukwalisa kakamwe. M’piaka 12 pidatumikirene nzimu unoyu, ananga atanthatu afa.

Ndatoma kuphembera kwaMulungu kuti adiphedze. Ndikaphembera na ntima onsene. Ntsiku inango, Mboni za Yahova zamenya nsuwo wanga. Ngakhale kuti ndikaathamangisa, mbwenye ntsiku ineire ndatonga kuwabvesera. Kuceza kwakutoma, ndapfunza kuti ndikhatumikira madimoni! Ndasankhula kusiya kukhulupira mizimu.

Mudapangene nzimu pyenepi, iwo wandipanga kuti ndikhonde kucita pyenepi. Mbwenye ine ndaupanga kuti: “Nkhabebve cinthu naiwe.”

Ndapisa pinthu pyonsene pikhaphatisirene basa m’kuombedza. Ndapfunza Bibilya na Mboni, ndakhala nzakazi wa Yahova, pontho ndabatizwa m’1973. Cincino ndina ana axanu augumi wadidi. Mamunanga akhalambo Mboni ya Yahova yakubatizwa. —Pyalongwa na Josephine Ikezu.

Kwadru: Kodi nkazi unango acitanji kuti asudzuke ku madimoni?