‘Padzulu Pa Pyonsene, Funanani Na Ntima Onsene’
“Kumala kwa pinthu pyonsene kuli chifupi. . . . Padzulu pa pyonsene, funanani unango na mwanzache na mtima onsene.”—1 PETURO [PEDRU] 4:7, 8, CC.
YEZU akhadziwa kuti midzidzi yace yakumalisa na apostolo ace ikhali yakufunika. Iye akhadziwa pikhafuna kudzaacitikira kutsogolo. Iwo akhali na basa ikulu kuti acite, mbwenye iwo mbadaidiwa na kutcingwa, ninga pidancitikira. (Juwau 15:18-20) Namasiku ale akumalisa akukhala pabodzi, iye aakumbusa mwakuphindikiza kuti asafunika “kufunana.”—Juwau 13:34, 35; 15:12, 13, 17.
2 Mpostolo Pedru, ule akhagumanika namasiku aneale, aphata ntsonga. Piaka pingasi patsogolo, mudalemba iye duzi na kufudzwa kwa Yerusalemu, Pedru agomezera kufunika kwa kufunana. Iye apasa Akristu uphungu: “Kumala kwa pinthu pyonsene kuli chifupi. . . . Padzulu pa pyonsene, funanani unango na mwanzache na mtima onsene.” (1 Peturo 4:7, 8) Mafala a Pedru ali na mabvekero adidi kakamwe kwa ale anakhala ‘m’ntsiku zakumalisa’ za makhaliro ano apinthu. (2 Timoti 3:1, CC) Kodi ‘kufunana na mtima onsene’ kusabvekanji? Thangwi yanji mphyakufunika kukhala na kufunana kweneku? Kodi tinakwanisa tani kupangiza kuti tiri na kufuna kweneku?
‘Kufunana Na Ntima Onsene’—Kusabvekanji?
3 Azinji asaona kufuna ninga kupibva kwakutaikira kokhene. Mbwenye Pedru nee akhalonga pya mitundu yonsene ya kufuna tayu; iye akhalonga pya kufuna kwa ciimiriro cikulu kakamwe. Fala yakuti ‘kufuna’ pa 1 Pedru 4:8 ndi thumburuzo ya fala Yacigerego a·gaʹpe. Fala ineyi isapangiza kufuna kwakukhonda saka phindu yace ene kwakutsogolerwa, peno kutongwa, na midida. Bukhu inango isalonga: “Kufuna kwa agape kungakwanise kutongwa thangwi pakutoma si kupibva tayu mbwenye ndi kusankhula kwa cifuno cakutsogolera ku macitiro.” Nakuti tiri na cipendamiro cakubalwa naco ca kucenama, tisafuna kukumbuswa kuti tifunane, mbiticita pyenepi m’njira zinatsogolerwa na midida yaumulungu.—Genesi 8:21; Aroma 5:12.
4 Pyenepi nee pisabveka kuti tisafunika kufunana basi ene thangwi tisatongwa kucita pyenepi. A·gaʹpe nkhabe sowa kupisirwa na kupibva. Pedru alonga kuti tisafunika ‘kufunana na ntima onsene [pinabveka, “kutatamuka”] kwa unango na nzace.’a (Kingdom Interlinear) Ngakhale tenepa, kufuna kweneku kusaphemba kuwangisira. Kulonga pya fala Yacigerego inathumburuzwa “ntima onsene,” wakudziwisa unango alonga: “Ineyi isafokotoza nyakuthamanga anatatamula piwalo pyace m’nzidzi unaphatisira iye mphambvu yace yonsene kunkhomo kwa mapika.”
5 Natenepa, nee tisafunika kuonesa kufuna kwathu basi ene m’pinthu pyakukhonda nensa peno kwa anthu angasi akusankhulika. Kufuna Kwacikritu kusaphemba ‘kutatamula’ ntima wathu, kufuthula kufuna ngakhale kuti ndi kwakunensa kukuonesa. (2 Akorintu 6:11-13) Mwapakweca, tisafunika kusakulira ntundu unoyu wa kufuna na kuuphatira basa, ninga nyakuthamanga asafunika kutatamula na kuphata basa towera kuendesa kutsogolo luso yace. Mphyakufunika kuti tifunane tenepa. Thangwi yanji? Tendeni tione mathangwi matatu.
Thangwi Yanji Tisafunika Kufunana?
6 Yakutoma, “thangwi kufuna nkhwa Mulungu.” (1 Juwau 4:7) Yahova, Mphuno ya kufuna kweneku kwapantima, atifuna pakutoma. Mpostolo Juwau asalonga: “Kuti funa kwace Mulungu kwapangizika tenepa: atuma Mwanache mbodzi ekha pantsi pano, towera thangwi ya iye atipase moyo upswa.” (1 Juwau 4:9) Mwana wa Mulungu ‘atumwa’ m’kudzakhala munthu, mbakwanirisa utumiki wace, mbafa pa ntanda wakusikimiza—pyonsene ipi towera “atipase moyo upswa.” Kodi tinakwanisa tani kupereka takhuta ku cipangizo ici cikulu ca kufuna kwa Mulungu? Juwau asalonga: “Thangwi Mulungu atifuna tenepa, ifembo tinatongwa kufunana.” (1 Juwau 4:11) Yang’anani kuti Juwau alemba, “thangwi Mulungu atifuna tenepa”—tayu imwe mbwenye ife. Ntsonga iri pakweca: Khala Mulungu asafuna alambiri anzathu, mphapo ife tisafunika kuafunambo.
7 Yaciwiri, kufunana nkhwakufunika kakamwe lero towera timwaze ciphedzo kwa abale athu akusowa thangwi “kumala kwa pinthu pyonsene kuli chifupi.” (1 Peturo 4:7) Tisakhala mu “nzidzi wakugoswa.” (2 Timoti 3:1, CC) Makhaliro a dziko, pidengwa pyacibaliro na mpingizo pisatibweresera pinenso. M’makhaliro anewa akutiyesera, tisafunika kufendedzerana kakamwe. Kufuna na ntima onsene kunadzatigumanya na kutikulumiza ‘kutsalakanana unango na nzace.’—1 Akorinto 12:25, 26, CC.
8 Yacitatu, tisafunika kufunana thangwi ife nkhabe funa “pasa danga Satana” kuti atinyengerere. (Aefeso [Aefesu] 4:27, CC) Satana ali maso kuti aphatisire kusowa ungwiro kwa anyakukhulupira anzathu—kufewa, kudawa na madodo awo—ninga miyala yakutigwegwedusa. Kodi manyerezero akukhonda kwana peno pyakucita pyakuipa pingakwanise kuticitisa kubuluka m’mpingo? (Misanje 12:18) Tikafunana na ntima onsene nee tinadzabuluka! Kufuna kweneku kusatiphedza kukoya ntendere na kuphatana towera kutumikira Mulungu na “ntima ubodzi.”—Zefania 3:9.
Munapangiza Tani Kuti Musafuna Anango
9 Kupangiza kufuna kusafunika kutoma pa banja. Yezu alonga kuti anyakupfunzace andimomwene mbadadzindikirwa na kufunana. (Juwau 13:34, 35) Kufuna nee kusafunika kuoneka pa mpingo basi tayu mbwenye na pa banja pene—pakati pa anyakukwatana, anyakubala na ana. Kubva kufuna kwa piwalo pya banja kudakwana basi tayu; ife tisafunika kukupangiza m’njira zadidi.
10 Kodi anyakukwatana anakwanisa tani kupangiza kufunana? Mamuna anafunadi nkazace asacitisa kuti iye adziwe pyenepi m’mafala na pyakucita—pakweca na pakhundu—kuti iye asantsalakana. Iye asalemedza kuthema kwace na kutsalakana manyerezero ace, maonero na kupibva kwace. (1 Pedru 3:7) Iye asaikha udidi wa nkazace patsogolo pa udidi wace, na asacita pyonsene pinakwanisa iye kuti atsalakane pinafuna nkazace m’njira ya kumanungo, uzimu na kupibva kwa ntima. (Aefesu 5:25, 28) Nkazi anafuna mamunace mwandimomwene ‘asamulemedza,’ ngakhale kuti m’midzidzi inango iye nkhabe kwanirisa cidikhiro cace. (Aefesu 5:22, 33) Iye asaphedza mamunace na kungonjera, nkhabe phemba pizinji, mbwenye asabverana na iye mbapitiriza na kuyang’ana pinthu pyauzimu.—Genesi 2:18; Mateyu 6:33.
11 Anyakubala, munakwanisa tani kupangiza kufuna kwa ana anu? Kuphata kwanu basa mwakuwanga towera muapase pyakusowa pyakumanungo kusapangiza kufuna kwanu. (1 Timoti 5:8) Mbwenye ana asafuna pizinji kupiringana cakudya, pyakubvala na pakukhala. Kuti iwo akule m’kufuna na kutumikira Mulungu wandimomwene, asafunika kupfunziswa mwauzimu. (Misanje 22:6) Pyenepi pisabveka kukhala na nzidzi wakupfunza Bibilya na banja, kwenda m’utumiki na kugumanika pa misonkhano Yacikristu. (Deuteronomi 6:4-7) Kukhala wakukhonda jomba m’mabasa anewa kusaphemba kuwangisira, makamaka m’ntsiku zino zakugopswa. Kudzudzumika na kuwangisira kwanu kutsalakana pyakusowa pyauzimu pya ana anu kusaonesa kufuna, natenepa musapangiza muntima mwanu kuti musafuna kuti iwo akhale mwadidi kwenda na kwenda.—Juwau 17:3.
12 Mphyakufunika pontho kuti anyakubala apangize kufuna m’kutsalakana pyakusowa pyamuntima pya ana awo. Ana nkhabe nensa khuiwa; mitima yawo ya uwana isafuna cithondoleso ca kufuna kwanu. Apangeni kuti musaafuna, na apaseni kufuna kwanu kukulu, thangwi mafala anewa asaapasa cibaso cakuti mbakufunika na autumbi. Apaseni kusimba kwakupisirwa na kwandimomwene, thangwi pyenepi pisaadziwisa kuti musaona kuwangisira kwawo na musakukuza. Alangeni na kufuna, thangwi kusandika kweneku kusaapanga kuti musatsalakana ntundu wa munthu unafuna kudzakhala iwo. (Aefesu 6:4) Pipangizo pyonsene ipi pyadidi pyakufuna pisaphedza kuwangisa banja yakutsanzaya na yakuphedzana yakuti iri dzololo kupirira pinenso pya ntsiku zino zakumalisa.
13 Kufuna kusaticitisa kuduwala madawo a anango. Kumbukani kuti mudakulumiza anyakuleri ace kuti ‘afunane unango na nzace na ntima onsene,’ Pedru alonga kuti thangwi yanji pyenepi mphyakufunika kakamwe: ‘Thangwi kufunana kusaphimbira madawo mazinji.’ (1 Peturo 4:8) ‘Kuphimbira’ madawo nee pisabveka ‘kubisa’ madawo makulu tayu. Madawo makulu anewa asafunika kulongwa mwakukhonda dembuka kwa ale ali na kupitawirira m’mpingo towera aatsalakane. (Levitiko 5:1; Misanje 29:24) Kusiya anyakudawa kupitiriza na kuphekesa peno kukhuya anyakusowa mulando ndi kusowa kufuna kukulu—na pyakuphonyana na Bibilya.—1 Akorintu 5:9-13.
14 Kazinji kene, madodo na madawo a anyakukhulupira anzathu si pinthu pikulu tayu. M’midzidzi inango ife tonsene tisagwegweduka m’mafala peno m’pyakucita, mbitiphatisana mwala peno kucitisa unango kuipirwa. (Yakobo 3:2) Kodi tisafunika kubvekesa mwakucimbiza madodo a anango? Ipi pingakwanise kubweresa nthonga m’mpingo basi. (Aefesu 4:1-3) Tikatongwa na kufuna, nee ‘tinadzabvekesa madodo’ a alambiri anzathu. (Masalimo 50:20) Ninga matope akusambisa nyumba na ntoto pisabisa madonthi pa pfufu, kufuna kusabisa kusowa ungwiro kwa anango.—Misanje 17:9.
15 Kufuna kunadzaticitisa kuphedza ale ali na kusowadi. Nakuti makhaliro a ntsiku zakumalisa akupitiriza na kugwa pantsi, midzidzi inango anyakukhulupira anzathu angakwanise kufuna ciphedzo cakumanungo. (1 Juwau 3:17, 18) Mwacitsanzo, kodi ciwalo ca mpingo wathu ciri kunenseka na kusowa kobiri peno kuluza basa? Panango tingakwanise kucipasa ciphedzo cakumanungo, mwakubverana na makhaliro athu. (Misanje 3:27, 28; Yakobo 2:14-17) Kodi alipo nzice wankazi wakukalamba wakuti nyumba yace isafunika kusasanywa papswa? Panango tingakwanise kunyerezera kumphedza na mabasa anango.—Yakobo 1:27.
16 Kupangiza kwathu kufuna kwa anango nee kusadromera kwa ale anakhala cifupi na ife basi tayu. M’midzidzi inango, tisabva mphangwa za anzakazi a Mulungu ku madziko anango adagwerwa na conzi cikulu, piteketeke, peno nkhondo ya adziko ibodzi ene. Iwo angakwanise kukhala na kusowa kukulu kwa cakudya, nguwo na pinango. Khala iwo ndi a ntundu unango peno nsoka wadzinza inango nkhabe pinthu. ‘Tisafuna abale athu akristu.’ (1 Pedru 2:17) Ninga mipingo ya piaka dzana yakutoma, tina cifuno cakuphedza mphambvu zidamala kupambwa towera kuapasa ciphedzo. (Machitiro 11:27-30; Aroma 15:26) Tikapangiza kufuna m’njira zonsene izi, tisawangisa uxamwali ukulu unatigumanya m’ntsiku zino zakumalisa.—Akolose 3:14.
17 Kufuna kusaticitisa kugawana na anango mphangwa zadidi za Umambo wa Mulungu. Onani citsanzo ca Yezu. Thangwi yanji iye amwaza mphangwa na kupfunzisa? Iye ‘akhala na ntsisi’ na mwinji thangwi ukhali wakucerenga mwauzimu. (Marki 6:34) Iwo akalekezwa na kupeuswa na akumbizi a ulambiri wauthambi, akuti akhafunika kuapfunzisa undimomwene wauzimu na kuapasa cidikhiro. Natenepa, m’kukulumizwa na kufuna na ntsisi yakuzika na ya m’ntima, Yezu athondolesa anthu na “mphangwa zadidi za umambo wa Mulungu.”—Luka 4:16-21, 43.
18 Anthu azinji lero, alekezwambo na kupeuswa mwauzimu mbasowa cidikhiro. Ninga Yezu, tikadziwadi pifuno pyauzimu pya ale akuti nkhabe dziwa Mulungu wandimomwene, tinadzakulumizwa tenepa na kufuna na ntsisi towera kugawana nawo mphangwa zadidi za Umambo wa Mulungu. (Mateyu 6:9, 10; 24:14) Nakuti kwasala nzidzi wakucepa, ndi kwakucimbiza kakamwe kumwaza mphangwa zenezi za upulumusi.—1 Timoti 4:16.
“Kumala Kwa Pinthu Pyonsene Kuli Chifupi”
19 Kumbukani kuti Pedru atoma uphungu wace wa kufunana na mafala awa: “Kumala kwa pinthu pyonsene kuli chifupi.” (1 Peturo 4:7) Mwakukhonda dembuka dziko ino yakuipa inadzapitirwa mbuto na dziko ipswa yakulungama ya Mulungu. (2 Pedru 3:13) Natenepa, uno si nzidzi wakukhala theriye tayu. Yezu aticenjeza: “Chitani mphole! Lekani kuinjipirwa tayu na kuchita maphwando akumwa na akudya, peno na pya pa nyumba, gopa munanyukirwa na ntsiku iyo.”—Luka 21:34.
20 Natenepa, m’njira zonsene tendeni ‘tikhale akulindira,’ tikhale maso na kudziwa panagumanika ife m’nzidzi uno. (Mateyu 24:42) Tendeni tiyang’anire mayesero onsene a Satana akuti angakwanise kutidzudzumisa. Mbatilekeni kutawirisa dziko ino yakuthondola na yakusowa kufuna kuticitisa kukhonda kupangiza kufuna kwathu kwa anango. Padzulu pa pyonsene, tendeni tifendedzere duzi kakamwe Yahova, Mulungu wandimomwene, ule wakuti Umambo Waumesiya cincino unadzakwanirisa cifuniro cace cambiri towera dziko ino yapantsi.—Chidziwiso 21:4, 5.
[Cidzindikiro capantsi]
a M’Mabibilya anango 1 Pedru 4:8 asalonga kuti tisafunika kufunana “mwandimomwene,” “mwakuzika” peno “mwamphambvu.”
MABVUNZO A PFUNZIRO
• Kodi ndi uphungu upi wampanganizano udapasa Yezu anyakupfunzace, na ndi ninji cisapangiza kuti Pedru aphata ntsonga? (Ndima 1-2)
• Kodi ‘kufunana na ntima onsene’ pisabvekanji? (Ndima 3-5)
• Thangwi yanji tisafunika kufunana? (Ndima 6-8)
• Kodi munakwanisa tani kuonesa kuti musafuna anango? (Ndima 9-18)
• Thangwi yanji uno si nzidzi wakukhala theriye tayu, na tisafuna kupitonga kucitanji? (Ndima 19-20)
[Foto pa tsamba 29]
Banja yakuphedzana iri dzololo kupirira pinenso pya ntsiku zino zakumalisa
[Foto pa tsamba 30]
Kufuna kusaticitisa kuphedza ale ali na kusowadi
[Foto pa tsamba 31]
Kugawana na anango mphangwa zadidi za Umambo wa Mulungu ndi cipangizo ca kufuna