Ndi Munjira Ipi Profesiya Ya Dhanyeli Yalongeratu Pya Kufika Kwa Mesiya

MPROFETA Dhanyeli akhala maso mu pyaka pyakupiringana 500 Yezu mbadzati balwa. Ngakhale tenepa, Yahova apanga Dhanyeli mphangwa zakuti mbizidacitisa kudzindikira ndzidzi wakudzodzwa kwa Yezu, peno kuikhwa kwace ninga Mesiya, peno Kristu. Dhanyeli apangwa: ‘Khala mbupidziwa kuti kutomera kutongwa kwa kumangiswa papswa kwa Yerusalemu mpaka kubwera kwa Ntongi, Mesiya, panapita masumana 7 na masumana 62. Penepo Yerusalemu anadzamangwa paswa na miseu na malinga akuwanga.’​—Danyele 9:25.

Toera kudziwa ndzidzi wakufika kwa Mesiya, cakutoma tisafunika kudziwa kuti watoma lini ndzidzi unoyu. Mwakubverana na profesiya, watoma ‘mudatongwa kumangiswa papswa kwa Yerusalemu.’ Kodi “kutongwa” kweneku kwacitika lini? Mwakubverana na mulembi wa Bhibhlya, Nehemiya, kumangiswa papswa kwa malinga akuzungulira Yerusalemu kwatongwa ‘mu caka ca makumawiri ca utongi wa Artaserse.’ (Nehemiya 2:1, 5-8) Anyakulonga pya mbiri asatawirambo kuti caka cakutoma camumphu ca utongi wa Artaserse cikhali 474 M.N.W. Natenepa, caka 20 ca utongi wace cikhali 455 M.N.W. Cincino tadzindikira ndzidzi udatoma profesiya ya Dhanyeli inalonga pya Mesiya, caka 455 M.N.W.

Dhanyeli asapangiza kulapha kwa ndzidzi unoyu unatsogolera kufika kwa “Ntongi,” Mesiya. Profesiya isalonga pya ‘masumana 7’ na ‘masumana 62,’ akuti angagumanyizwa asakwana masumana 69. Kodi ndzidzi unoyu ndi wakulapha tani? Mabhibhlya mazinji asapangiza kuti anewa nee ndi masumana a ntsiku zinomwe, mbwenye masumana a pyaka. Pyenepi pisabveka kuti sumana ibodzi isaimirira pyaka pinomwe. Malengesero anewa a masumana a pyaka, peno pyaka pinomwe na pinomwe akhali akudziwika kwa Ayuda a midzidzi yakale. Mwacitsandzo, pakupita pyaka pinomwe, iwo akhakumbukira caka ca Sabudu. (Eksodo 23:10, 11) Natenepa, masumana 69 a profesiya ineyi ndi makhundu 69, akuti ibodzi na ibodzi ikhali na pyaka 7, peno pyaka 483 pingagumanyizwa pabodzi.

Cincino, pyonsene pinafunika ife kucita ndi kulengesa. Tingalengesa kubulukira caka 455 M.N.W., pyaka 483 pisatitsogolera ku caka 29 N.W. Ici ndi caka cidabatizwa Yezu mbakhala Mesiya!a (Luka 3:1, 2, 21, 22) Kodi kweneku si kukwanirisika kwakudzumatirisa kwa profesiya ya m’Bhibhlya tayu?