Yezu Kristu Akhali Mesiya Wakupikirwa

TOERA kutiphedza kudzindikira Mesiya, Yahova Mulungu apumira aprofeta azinji analongwa m’Bhibhlya toera apereke mphangwa zizinji zinalonga pya kubalwa, utumiki na kufa kwa Mpulumusi unoyu wakupikirwa. Maprofesiya onsene awa a m’Bhibhlya akwanirisika mwa Yezu Kristu. Undimomwene wace na kutowezeka kwace ndi kwakudzumatirisa. Mwacitsandzo, tendeni tidinge maprofesiya mangasi adalongeratu pya kubalwa na uwana wa Mesiya.

Mprofeta Izaiya alongeratu kuti Mesiya mbadakhala mbeu ya Mambo Dhavidhi. (Izaiya 9:7) Yezu abalwadi mu nzera wa Dhavidhi.​—Mateo 1:1, 6-17.

Mprofeta unango wa Mulungu, Mikeya, alongeratu kuti mwana unoyu mbadamalisira na kukhala ntongi na kuti iye mbadabalwa ku ‘Betlehemu wa ku Eufrate.’ (Mikeya 5:2) Mu ndzidzi udabalwa Yezu, pakhali mizinda miwiri ku Israele ikhacemerwa Betlehemu. Ubodzi ukhagumanika cifupi na Nazarete kumulolo kwa dziko, unango ukhagumanika cifupi na Yerusalemu, mu Yudeya. Kalene, Betlehemu akhali cifupi na Yerusalemu akhacemerwa Eufrate. Yezu abalwa mu nzinda unoyu, ninga mudalongeratu profesiya!​—Mateo 2:1.

Profesiya inango ya Bhibhlya yalonga kuti Mwana wa Mulungu mbadacemerwa toera ‘kubuluka mu Ejito.’ Mukhakhala Yezu khombwani, akwatwa kuenda ku Ejito. Iye abwereswa mudamala kufa Herode, mbakwanirisa tenepa profesiya ineyi.​—Ozeya 11:1; Mateo 2:15.

M’bokosi ya nsolo wakuti “Maprofesiya Analonga Pya Mesiya,” pana malemba adandandaliswa pantsi pa nsolo “Profesiya,” akuti asalonga pya Mesiya. Taphata miyendo, landanisani malemba anewa na ale adandandaliswa pantsi pa nsolo “Kukwanirisika.” Kucita pyenepi kunadzawangisa cikhulupiro canu ku undimomwene wa Mafala a Mulungu.

Munadinga imwe malemba anewa, kumbukani kuti maprofesiya anewa alembwa madzana a pyaka Yezu mbadzati kubalwa. Yezu alonga: ‘Picitike pyonsene pidalembwa m’bukhu ya Mwambo wa Mose na ya aprofeta na ya Masalmo.’ (Luka 24:44) Mungadzadinga m’Bhibhlya yanu, munadzaona kuti maprofesiya onsene akwanirisika!