“Njira, Undimomwene na Umaso”

1, 2. Thangwi yanji nee mbapidakwanisika kudziwa Yahova mwakusowa ciphedzo, pontho Yezu acitanji toera kutiphedza?

KODI imwe mwatayika kale? Panango imwe musakumbuka ntsiku idaenda imwe kaona xamwali wanu peno wacibale wanu mbamutayika. Mu ndzidzi unoyu, kodi imwe mwaphemba anango toera akupangizeni njira? Mbamudapibva tani khala munthu unoyu m’mbuto mwa kukupangizani kwene njira, iye akupangani tenepa: “Tendeni kakuperekerani. Ndinaenda kakusiyani kunaenda imwe.” Mwandimomwene, mbamudakomerwa kakamwe!

² Yezu Kristu asacitambo pibodzi pyene kuna ife. Mbatidasowa ciphedzo nee mbatidakwanisa kufendedzera Mulungu. Thangwi ya madawo na kusowa ungwiro, anthu onsene atayika, pontho “ali kutali na umaso unapereka Mulungu.” (Aefesi 4:17, 18) Ife tisafuna ciphedzo toera tigumane njira yadidi. Yezu ndi ninga ntsogoleri wadidi. Iye asacita pizinji kupiringana kupereka pitsogolero na kupangiza njira, iye asapangiza citsandzo toera titowezere. Ife taona mu nsolo wakutoma kuti Yezu asaticemera, mbalonga: “Bwera ukhale nyakupfundza wanga.” (Marko 10:21) Iye atipasambo mathangwi adidi toera kutawira ncemerero unoyu. Pa ndzidzi unango, Yezu alonga: “Ine ndine njira, undimomwene na umaso. Nkhabe munthu anaenda kuna Baba mbakhonda kupita na pana ine.” (Juwau 14:6) Tendeni tidinge mathangwi mangasi akuti thangwi yanji tinakwanisa kufendedzera Baba basi ene kubulukira kuna Mwana. Buluka penepo, tinadzindikira kuti Yezu ndiyedi “njira, undimomwene na umaso.”

Yezu Ali na Basa Yakufunika Kakamwe Toera Kukwanirisa Cifuniro ca Yahova

3. Thangwi yanji tinakwanisa kukhala na uxamwali wakuwanga na Mulungu basi ene kubulukira mwa Yezu?

³ Thangwi yakutoma ndi yakuti, tinakwanisa kukhala na uxamwali wakuwanga na Mulungu basi ene kubulukira mwa Yezu, thangwi Yahova aona kuti mphyakuthema kupasa Mwanace basa yakufunika kakamwe kupiringana onsene.a Baba ampasa basa ineyi yakufunika toera kukwanirisika cifuniro Cace. (2 Akorinto 1:20; Akolose 1:18-20) Toera tibvesese basa yakufunika ya Mwana, tisafunika kudziwa pidacitika m’munda wa Edheni, mu ndzidzi wakuti banja yakutoma pabodzi na Sathani apandukira Yahova.—Genesi 2:16, 17; 3:1-6.

4. Pidacitika m’munda wa Edheni pyabweresa mbvundzo upi, pontho Yahova acitanji toera kutawira mbvundzo unoyu?

⁴ Kupanduka kudacitika mu Edheni kwabweresa mbvundzo wakuti onsene kudzulu na pantsi asafuna ntawiro: Kodi ndimomwenedi kuti Yahova ndi wakucena, wadidi, wakulungama na waufuni kakamwe? Toera kutawira mbvundzo unoyu, Yahova asankhula Mwanace waungwiro na wauzimu toera abwere pa dziko yapantsi. Basa ya Mwanace ikhali yakufunika kakamwe. Iye akhafunika kupereka umaso wace toera kucenesa dzina ya Babace na kulipa ciomboli toera kupulumusa anthu onsene. Thangwi yakukhala wakukhulupirika mpaka kufa, Mwana unoyu wakusankhulwa mbadakwanisa kumalisa nyatwa zonsene zidabwera thangwi yakupanduka kudatomesa Sathani. (Ahebheri 2:14, 15; 1 Juwau 3:8) Mbwenye Yahova ali na ana azinji auzimu na aungwiro. (Dhanyeli 7:9, 10) Kodi ndi upi adasankhula iye toera acite basa ineyi yakufunika kakamwe? Yahova asankhula “Mwanace m’bodzi ekha,” wakuti mukupita kwa ndzidzi adzacemerwa Yezu Kristu.—Juwau 3:16.

5, 6. Yahova apangiza tani kuti akhanyindira Mwanace, pontho thangwi yanji iye akhali na cinyindiro ceneci?

⁵ Kodi tisafunika kudzumatirwa na cisankhulo cidacita Yahova? Nkhabe! Baba akhanyindira kakamwe Mwanace m’bodzi ekha. Pyaka pizinji Mwanace mbadzati kubwera pa dziko yapantsi, Yahova akhadalonga kale kuti Mwana unoyu mbadapitiriza kukhala wakukhulupirika mwakukhonda tsalakana nyatwa zikhafuna kutamba iye. (Izaiya 53:3-7, 10-12; Mabasa 8:32-35) Tisapfundzanji na mafala adalonga Yahova? Ninga anthu pabodzi na aanju, Mwana unoyu akhali na ufulu wakucita pisankhulo. Nakuti Yahova akhanyindira kakamwe Mwanace, iye alongeratu kuti Mwana unoyu mbadakhala wakukhulupirika. Thangwi yanji Yahova akhali na cinyindiro ceneci? Thangwi Yahova asadziwa mwadidi Mwanace, pontho asadziwa kuti Mwanace asafuna kakamwe kunkomeresa. (Juwau 8:29; 14:31) Mwana asafuna Babace, munjira ibodzi ene, Baba asafunambo Mwanace. (Juwau 3:35) Ufuni uli na Baba na Mwanace usaacitisa kukhala akuphatana na kunyindirana kakamwe unango na ndzace, pontho nkhabepo cinthu cinafuna kumalisa ufuni unoyu.—Akolose 3:14.

⁶ Mwakubverana na basa yakufunika ya Mwana, cinyindiro ciri na Baba kuna Mwana na ufuni uli pakati pawo, kodi tisafunika kupenula kuti nee pinakwanisika kufendedzera Mulungu kubulukira kuna Yezu? Mbwenye pali na thangwi inango inaticitisa kunyindira kuti basi ene Mwana ndiye anafuna kutitsogolera toera kudziwa Baba.

Ndi Mwana basi Anadziwa Mwadidi Baba

7, 8. Thangwi yanji Yezu mbadakwanisa kulonga na cinyindiro consene kuti nkhabe munthu anadziwa mwadidi Baba “kupiringana Mwana”?

⁷ Pana pinthu pinafunika ife kucita toera tikhale axamwali a Yahova. (Masalmo 15:1-5) Yezu wakuti ndi Mwana wa Mulungu, asadziwa mwadidi pinafunika ife kucita toera kubvera mitemo ya Mulungu na kukhala akutawirika kuna iye. Yezu alonga: “Pinthu pyonsene ndapipaswa na Babanga. Nkhabe munthu anadziwa mwadidi Mwana kupiringana Baba; pontho nkhabe munthu anadziwa mwadidi Baba kupiringana Mwana na ule anafuna kupfundziswa na Mwana thangwi ya iye.” (Mateu 11:27) Tendeni tione kuti thangwi yanji Yezu alonga na cinyindiro kuti nkhabe munthu anadziwa mwadidi Baba “kupiringana Mwana.”

⁸ Ninga “mwana wautombo mu pinthu pyonsene pidacitwa,” Yezu ali na uxamwali wakupambulika kakamwe na Yahova. (Akolose 1:15) Nyerezerani uxamwali wa ponda ndipondembo ukhali na Baba na Mwana mu pyaka pizinji pikhali iwo awiri basi mpaka mu ndzidzi udacitwa aanju. (Juwau 1:3; Akolose 1:16, 17) Mu ndzidzi unoyu ukhali iye basi ene na Babace, Mwana akwanisa kudziwa mwadidi Babace, cifuniro Cace, mitemo na njira yace yakucita pinthu. Tinakwanisa kulonga na cinyindiro consene kuti Yezu asadziwa mwadidi Babace. Natenepa, uxamwali unoyu wacitisa Yezu kupangiza mwadidi kakamwe makhaliro a Babace kupiringana munthu unango.

9, 10. (a) Yezu apangiza tani makhaliro a Babace? (b) Tisafunika kucitanji toera titsandzayise Yahova?

⁹ Pinthu pidapfundzisa Yezu pisapangiza pakweca kuti iye asadziwa mwadidi mabvero na manyerezero a Yahova, pontho asadziwa mwadidi pinthu pinafuna Iye kuna alambiri ace.b Yezu apangiza makhaliro a Babace munjira inango. Yezu alonga: “Ule anandiona akuonambo Baba.” (Juwau 14:9) Yezu atowezera mwadidi kakamwe Babace mu pyonsene pikhalonga iye na pikhacita iye. Natenepa, tingaleri thangwi ya Yezu m’Bhibhlya, mafalace audziwisi, luso yace yakupfundzisa, ntsisi zidancitisa kuwangisa atenda na kulira, tisakwanisa kuona kuti Yahova asacita pinthu munjira ibodzi ene. (Mateu 7:28, 29; Marko 1:40-42; Juwau 11:32-36) Pikhalonga mwana na pikhacita iye pisapangiza mwadidi kakamwe makhaliro na cifuniro ca Baba. (Juwau 5:19; 8:28; 12:49, 50) Natenepa, toera titsandzayise Yahova, tisafunika kubvera pidapfundzisa Yezu na kutowezera citsandzo cace.—Juwau 14:23.

¹⁰ Nakuti Yezu asadziwa mwadidi Yahova, pontho asantowezera mwadidi kakamwe, nee ndi pyakudzumatirisa kuti tinakwanisa kundziwa kubulukira kuna Mwanace. Nakuti cincino tisadziwa kuti tinakwanisa kukhala na uxamwali na Yahova kubulukira kuna Yezu, cincino tendeni tione kuti asabvekanji mafala awa adalonga Yezu: “Ine ndine njira, undimomwene na umaso. Nkhabe munthu anaenda kuna Baba mbakhonda kupita na pana ine.”—Juwau 14:6.

“Ine Ndine Njira”

11. Thangwi yanji tinakwanisa kukhala na uxamwali wakuwanga na Mulungu basi ene kubulukira mwa Yezu?

¹¹ Ife taona kuti tinakwanisa kudziwa Mulungu basi ene kubulukira kuna Yezu. Tendeni tione mwadidi kuti pyenepi pisabvekanji kuna ife. Ife taona kuti Yezu ndi “njira” thangwi tinakwanisa kukhala na uxamwali na Mulungu basi ene kubulukira kuna iye. Munjira ipi? Thangwi yakukhala wakukhulupirika mpaka kufa, Yezu apereka umaso wace ninga ntsembe ya ciomboli. (Mateu 20:28) Mbatidasowa ciomboli, nee mbatidakwanisa kukhala axamwali a Mulungu. Madawo aticitisa kukhala kutali kakamwe na Mulungu thangwi Yahova ndi wakucena, pontho iye cipo akomerwa na madawo. (Izaiya 6:3; 59:2) Mbwenye ntsembe ya Yezu yaticitisa kukhala dhuzi na Mulungu, thangwi iyo yatiphedza toera tilekererwe madawo. (Ahebheri 10:12; 1 Juwau 1:7) Tingapangiza cikhulupiro kuna Mulungu kubulukira mwa Kristu ife tinakhala akutawirika kuna Yahova. Ndi pyenepi pinafuna kutiphedza kukhala “muntendere na Mulungu.”—Aroma 5:6-11.

12. Thangwi yanji tisalonga kuti Yezu ndi “njira”?

¹² Tingacita phembero, Yezu ndi “njira.” Basi ene kubulukira mwa iye, tinakwanisa kufika kuna Yahova m’phembero na cinyindiro cakuti anabvesera maphembero anacita ife kubulukira muntima. (1 Juwau 5:13, 14) Yezu alonga: “Pyonsene pinafuna imwe kuphemba kuna Baba mu dzina yanga, iye anadzakupasani. . . . Phembani, imwe munadzapaswa, toera imwe mutsandzaye kakamwe.” (Juwau 16:23, 24) Mu dzina ya Yezu, tinakwanisa kucita phembero kuna Yahova, mbatincemera “Babathu.” (Mateu 6:9) Tinakwanisambo kulonga kuti Yezu ndi “njira” thangwi iye apangiza citsandzo cadidi. Ninga pidaona ife, Yezu asatowezera mwadidi kakamwe Babace. Citsandzo ca Yezu cisapangiza kuti tinatsandzayisa tani Yahova. Natenepa, toera tikhale axamwali a Yahova tisafunika kutowezera mwadidi Yezu.—1 Pedhru 2:21.

“Ine Ndine . . . Undimomwene”

13, 14. (a) Ninji pinapangiza kuti Yezu akhalonga undimomwene? (b) Yezu akhafunika kucitanji toera akhale “undimomwene,” pontho thangwi yanji?

¹³ Ndzidzi onsene Yezu akhalonga undimomwene thangwi ya mafala aciprofesiya adalonga Babace. (Juwau 8:40, 45, 46) Yezu cipo alonga uthambi. (1 Pedhru 2:22) Anyamalwace akhatawirambo kuti iye akhapfundzisa “pinafuna Mulungu mwakubverana na undimomwene.” (Marko 12:13, 14) Natenepa, pidalonga Yezu kuti “ine ndine . . . undimomwene,” iye nee akhafuna kulonga kuti akhamwaza mphangwa na kupfundzisa undimomwene basi. Iye ndi undimomwene munjira zinango.

¹⁴ Kumbukani kuti Yezu mbadzati kubwera pa dziko yapantsi, Yahova atsogolera anyakulemba Bhibhlya toera alembe maprofesiya thangwi ya Mesiya peno Kristu. Maprofesiya anewa alonga pyonsene thangwi ya umaso wace, utumiki wace na kufa kwace. Kusiyapo pyenepi, Mwambo wa Mose uli na maprofesiya akuti basi ene mbadakwaniriswa na Mesiya. (Ahebheri 10:1) Kodi Yezu mbadakhala wakukhulupirika mpaka kufa? Kodi iye mbadakwanirisa pinthu pyonsene pidalongwa thangwi ya iye? Ndi pyenepi pikhafuna kupangiza kuti Yahova ndi Mulungu wakuti asalonga undimomwene. Mwandimomwene, Yezu akhali na basa ikulu kakamwe toera acite. Pyonsene pidalonga Yezu na pidacita iye pyapangiza pakweca kuti maprofesiya onsene a m’Bhibhlya ndi andimomwene. (2 Akorinto 1:20) Yezu akhali “undimomwene” thangwi pinthu pidacita iye pa dziko yapantsi pyapangiza kuti maprofesiya a Yahova ndi andimomwene.—Juwau 1:17; Akolose 2:16, 17.

“Ine Ndine . . . Umaso”

15. Kukhulupira Mwana kusabvekanji, pontho kucita pyenepi kunatibweresera nkhombo zipi?

¹⁵ Yezu ndi “umaso” thangwi ndiye basi anafuna kutiphedza toera tigumane “umaso wandimomwene.” (1 Timoti 6:19) Bhibhlya isalonga: “Ule anakhulupira Mwana ali na umaso wakukhonda mala; ule anakhonda kubvera Mwana nee anadzawina umaso, mbwenye anadzaona ukali wa Mulungu.” (Juwau 3:36) Pisabvekanji kukhulupira Mwana wa Mulungu? Mafala anewa asabveka kuti tisanyindira kuti ife nee mbatidakwanisa kugumana umaso mbatidasowa ciphedzo cace. Iwo asabvekambo kuti tisapangiza cikhulupiro cathu na pinacita ife na kucita pinakwanisa ife toera kutowezera pipfundziso na citsandzo cace. (Tiyago 2:26) Tingakhulupira Yezu, ife tinakwanisa kukhala na umaso wakukhonda mala. Akristu akudzodzwa anakhala na umaso unoyu kudzulu, mbwenye “mwinji ukulu” wa “mabira anango” anadzakhala na umaso unoyu m’paraizu pa dziko yapantsi.—Luka 12:32; 23:43; Apokalipse 7:9-17; Juwau 10:16.

16, 17. (a) Yezu anadzapangiza tani kuti ndi “umaso” ngakhale kuna ale adafa? (b) Ndi cinyindiro cipi ciri na ife?

¹⁶ Ndiye tani kuna ale adamala kufa? Yezu ndi “umaso” kuphatanizambo kuna iwo. Ndzidzi pang’ono mbadzati kulamusa Lazaro muli akufa, Yezu apanga Marta mwanankaziace Lazaro: “Ine ndine kulamuka muli akufa na umaso. Munthu anandikhulupira, maseze afe, anadzakhala pontho m’maso.” (Juwau 11:25) Yahova apasa Mwanace “maxavi a kufa na a Nthumbi,” pyenepi pisapangiza kuti iye apaswa mphambvu yakulamusa anthu muli akufa. (Apokalipse 1:17, 18) Na maxavi anewa, Yezu anadzafungula misuwo ya nthumbi, pontho anthu onsene ali mwenemo anadzabuluka.—Juwau 5:28, 29.

¹⁷ “Ine ndine njira, undimomwene na umaso” na mafala anewa akukhonda nentsa, Yezu alonga mwacigwagwa cifuniro ca umaso wace na utumiki wace pa dziko yapantsi. Mafala anewa ndi akufunika kakamwe kuna ife lero. Yezu alongambo: “Nkhabe munthu anaenda kuna Baba mbakhonda kupita na pana ine.” (Juwau 14:6) Mafala anewa a Yezu ndi andimomwene kuna ife lero. Natenepa, tinakwanisa kukhala na cinyindiro consene cakuti tingatowezera Yezu, cipo tinadzatayika. Ndiye basi anakwanisa kutipangiza njira yakuenda “kuna Baba.”

Kodi Imwe Munacitanji?

18. Pisabvekanji kukhala nyakupfundza wandimomwene wa Kristu?

¹⁸ Nakuti tadziwa basa yakufunika kakamwe ya Yezu, pontho iye asadziwa mwadidi Babace, tiri na mathangwi adidi toera kuntowezera. Mu nsolo udamala, tapfundza kuti kukhala nyakupfundza wandimomwene wa Yezu kusaphataniza pizinji kupiringana mafala peno mabvero basi. Toera tikhale anyakupfundza a Kristu, tisafunika kucita pidapfundzisa iye mbatitowezera citsandzo cace. (Juwau 13:15) Bukhu ino inakuphedzani kucita pyenepi.

19, 20. Ndi pinthu pipi piri m’bukhu ino pyakuti pinakuphedzani toera mukhale nyakupfundza wa Kristu?

¹⁹ M’misolo inatowera, tinapfundza thangwi ya umaso na utumiki wa Yezu. Bukhu ino iri na makhundu matatu. Khundu yakutoma inatipfundzisa thangwi ya makhaliro a Yezu na njira ikhacita iye pinthu. Khundu yaciwiri inapangiza phinga yace m’basa yakumwaza mphangwa na kupfundzisa. Khundu yacitatu tinadzapfundza kuti iye apangiza tani ufuni. Kutomera Nsolo 3, pana bokosi ya nsolo wakuti: “Munatowezera Tani Yezu?” Malemba na mibvundzo inagumanika m’bokosi ineyi aikhwa toera kutiphedza kunyerezera mwadidi pinafunika ife kucita toera titowezere Yezu kubulukira m’mafala na m’macitiro.

²⁰ Thangwi ya pidacita Yahova Mulungu, imwe munakwanisa kukhala na uxamwali wadidi na iye, mbuto mwakukhala kutali na iye thangwi ya madawo adathaphula imwe. Thangwi ya ufuni wace ukulu, Yahova atuma Mwanace toera atipangize kuti tinacitanji toera tikhale na uxamwali wakuwanga na Mulungu. (1 Juwau 4:9, 10) Natenepa, ufuni unoyu ukulu unakukulumizani toera kutawira ncemerero wa Yezu: “Bwera ukhale nyakupfundza wanga.”—Juwau 1:43.