Mbani M’bandazi Wakukhulupirika Na Wandzeru?

Mu ndzidzi wakucepa Yezu mbadzati kufa, acedza pakhundu na anyakupfundzace anai—Pedro, Tyago, Jwau, na Andrea. Mukhalonga Yezu pya cidzindikiro ca kudza kwace mu ntsiku zakumalisa, iye acita mbvundzo wakufunika kakamwe: Mbani ‘m’bandazi wakukhulupirika na wandzeru adapaswa na mbuyace basa yakuonera abandazi andzace, na yakuapasa na kweru phoso’? (Mateyu 24:3, 45, Mphangwa Zadidi; Marko 13:3, 4) Yezu akhanyindira anyakupfundzace kuti ninga “mbuya” wawo, iye mbadakhazikisa anthu akuti mbadapereka cakudya cauzimu kwa atowereri ace mu ndzidzi wakumalisa. Mbani akhafunika kucita khundu ya m’bandazi unoyu?

Ndi nsoka ung’ono wa atowereri akudzodzwa a Yezu. ‘Mbandazi’ ndi Mathubo Akutonga a Mboni za Yahova. Iwo asapereka cakudya cauzimu pa ndzidzi wakuthema kwa alambiri andzawo. Ife tisanyindira m’bandazi unoyu wakukhulupirika toera kupitiriza kutipasa “phoso pa ndzidzi wadidi.”—Luka 12:42.

Iwo asatsalakana anthu a panyumba ya Mulungu. (1 Timoti 3:15) Yezu apasa m’bandazi basa ikulu kakamwe yakutsalakana basa ya khundu ya gulu ya Yahova pa dziko yapantsi—kuyang’anira mpfuma za gulu yace, kutsogolera basa yakumwaza mphangwa, na kutipfundzisa kubulukira m’mipingo yathu. Natenepa, toera kutipasa pinthu pisafuna ife, pa ndzidzi unapifuna ife, ‘m’bandazi wakukhulupirika na wandzeru’ asagawira cakudya cauzimu mukuphatisira mabukhu anaphatisira ife mu utumiki wathu, pontho kubulukira mu maprogramu anacitwa m’misonkhano yathu ya mpingo na ya cisa.

M’bandazi ndi wakukhulupirika ku undimomwene wa Bhibhlya na kwa basa yakumwaza mphangwa zadidi, pontho ndi wandzeru mu njira inatsalakanira iye pifuno pya Kristu pa dziko yapantsi. (Machitiro 10:42) Yahova asapasa nkhombo basace yakupereka cakudya cakukwana kwa anthu akuthimizirika.—Izaiya 60:22; 65:13.

• Mbani adakhazikiswa na Yezu toera kupereka cakudya cauzimu kwa anyakupfundzace?

• Ndi mu njira zipi m’bandazi ndi wakukhulupirika na wandzeru?