Kodi Nyatwa Zinadzamala?

BHIBHLYA ISALONGANJI?

“Mulungu . . . anadzapukuta misozi yonsene mʼmaso mwawo, pontho nkhabe kudzaonekabve kufa, nee kutsukwala, nee kulira, nee kubva kupha.”—Apokalipse 21:3, 4, Bhibhlya ya Dziko Ipswa.

THANGWI YANJI MPHYADIDI KUDZIWA PYENEPI?

Kudziwa pyenepi kunatiphedza toera . . .

Kukhala na cinyindiro cakuti si Mulungu tayu anatibweresera nyatwa.—Tiyago 1:13.

Kubalangazwa thangwi yakudziwa kuti Mulungu asatsukwala tingathabuka.—Zakariya 2:8.

Kukhala na cidikhiro cakuti nyatwa zonsene zinadzamala.—Masalmo 37:9-11.

TINAKWANISADI KUKHULUPIRA PINALONGA BHIBHLYA?

Inde, pana mathangwi mawiri:

• Mulungu asaida nyatwa na ale anathabusa andzawo. Onani kuti Yahova Mulungu apibva tani pikhathabuswa mbumba yace mu ndzidzi wa kale. Bhibhlya isalonga kuti iye akhatsukwala thangwi ya “ale akhaatsalakana mwakuipa.”—Atongi 2:18, Bhibhlya ya Dziko Ipswa.

  Mulungu asaipirwa kakamwe na ale anathabusa andzawo. Bhibhlya isalonga kuti “manja anapha anthu akusowa mulando” ndi akunyanyasa kuna Mulungu.—Misangani 6:16, 17.

• Mulungu asatsalakana m’bodzi na m’bodzi wa ife. Mu ndzidzi unathabuka ife, m’bodzi na m’bodzi asadziwa nyatwa zace, mbwenye sife basi tayu anazidziwa, Yahova asazidziwambo!—2 Kronika 6:29, 30.

  Mwakukhonda dembuka, Yahova anaphatisira Umambo wace toera kumalisa nyatwa zonsene. (Mateu 6:9, 10) Mbwenye mu ntsiku zino, iye asabalangaza ale anansaka na ntima onsene.—Mabasa 17:27; 2 Akorinto 1:3, 4.