NSOLO 2
Rebeka Akhafuna Kukomeresa Yahova
Rebeka akhali nkazi wakuti akhafuna Yahova. Mamunace akhacemerwa Izaki. Iye akhafunambo Yahova. Kodi Rebeka adziwana tani na Izaki? Rebeka apangiza tani kuti akhafuna kukomeresa Yahova? Tende tipfundze pizinji thangwi ya iye.
Anyakubala a Izaki akhali Abrahamu na Sara. Iwo akakhala mu dziko ya Kanani, yakuti anthu nee akhalambira Yahova. Mbwenye Abrahamu akhafuna kuti mwanace asembe nkazi wakuti akhalambira Yahova. Natenepa, iye atuma nyabasa wace toera kusakira nkazi Izaki ku dziko inacemerwa Harane, kukakhala acibale anango a Abrahamu, panango nyabasa unoyu akhali Elyezere.
Rebeka aphata basa mwakuwanga mu kutunga madzi toera kumwesa makamero
Elyezere acita ulendo na anyabasa anango a Abrahamu. Ukhali ulendo wakulapha kakamwe. Iwo aenda na makamero khumi mbathukula cakudya na miyoni. Kodi Elyezere mbadadziwa tani nkazi akhafunika iye kusankhulira Izaki? Mudafika Elyezere na anyabasa anango ku Harane, alimira cifupi na ncera thangwi Elyezere akhadziwa kuti mwakukhonda dembuka, anthu mbadabwera kudzatunga madzi. Iye acita phembero kuna Yahova mbalonga: ‘Ntsikana anaphemba ine toera kundipasa madzi, iye angandipasa, mbapasambo madzi makamero anga, ndinadziwa kuti unoyu ndi nkazi adasankhula imwe.’
Buluka penepo, ntsikana Rebeka abwera kuncera. Bhibhlya isalonga kuti iye akhali wakubalika kakamwe. Elyezere amphemba madzi akumwa, Rebeka alonga: ‘Ndapibva. Ndinakupasani madzi, pontho ndinadzatunga madzi anango toera kupasambo makamero anu.’ Nyerezera basi! Makamero angakhala na nyota asamwa madzi mazinji, natenepa, Rebeka aenda kazinji kene kuncera. Ukuona pa cithundzithudzi basa yakuwanga inacita iye?— Elyezere adzumatirwa kakamwe mu njira idatawirwa phembero yace na Yahova.
Elyezere apasa Rebeka miyoni yadidi mizinji. Rebeka aphemba kuti Elyezere na anyabasa andzace toera kuenda kunyumba ya anyakubalace. Elyezere afokotoza thangwi yanji atumwa na Abrahamu, pontho kuti Yahova atawira tani phembero yace. Acibale a Rebeka akhali akukomerwa kutawirisa Rebeka toera kusembwa na Izaki.
Rebeka aenda na Elyezere ku Kanani mbamanga banja na Izaki
Mphapo, usanyerezera kuti Rebeka akhafuna kusembwa na Izaki?— Rebeka akhadziwa kuti Elyezere atumwa na Yahova. Natenepa, mudabvundzwa Rebeka na anyakubalace khala akhafuna kuenda ku Kanani toera kasembwa na Izaki, iye atawira: ‘Ande, ndisafuna.’ Buluka penepo, iye aenda pabodzi na Elyezere. Pidafika iwo ku Kanani, iye amanga banja na Izaki.
Nakuti Rebeka acita pikhafuna Yahova, Yahova ampasa nkhombo. Mudapita pyaka pizinji, Yezu abalwa mu dzindza yace! Ungakhala ninga Rebeka, mbukomeresa Yahova, iye anadzakupasambo nkhombo.