Cirengo Caciwiri Ku Kana

Pakumala ntsiku ziwiri ku Samariya, Yezu aenda ku cisa cidakulira iye. Iye acita basa ikulu kakamwe yakumwaza mphangwa ku Yudeya, mbwenye iye nee abwerera ku Galileya toera kupuma. Mbuto mwace, iye atoma utumiki wace ukulu ku dziko idakulira iye. Panango iye nee akhadikhira kutambirwa munjira yakupambulika, thangwi iye akhadalonga kuti ‘mprofeta nee asalemedzwa kucisa cace.’ (Juwau 4:44) M’mbuto mwakukhala na iye, anyakupfundzace abwerera m’mamidzi mwawo kuna mabanjawo na m’mabasa awo akale.

Ndi mphangwa zipi zidatoma Yezu kumwaza? Iye akhamwaza mphangwa zakuti ‘Umambo wa Mulungu uli cifupi. Tcunyukani, mbamukhulupira mphangwa zadidi.’ (Marko 1:15) Mphapo anthu acitanji? Anthu azinji a ku Galileya atambira mwadidi Yezu, mbamulemedza. Iwo acita pyenepi tayu basi thangwi ya mphangwa zace, mbwenye thangwi aona pirengo pyakudzumisa pidacita Yezu miyezi mingasi nduli pikhali iwo pa Paskwa ku Yerusalemu.—Juwau 2:23.

Pidafika Yezu ku Galileya, kodi iye atoma kupi basa yace ikulu yakumwaza mphangwa? Panango ku Kana, kudasanduza iye madzi kudza vinyu pa phwando yakumanga banja. Paulendo unoyu, Yezu abva kuti m’phale unango akhaduwala kakamwe, cifupi na kufa. Iye akhali mwana wa m’bodzi mwa amuna acidzo akhaphata basa na mambo Herodhi Antipa, wakuti mukupita kwa ndzidzi agwandisa nsolo wa Juwau m’batizi. Mamuna unoyu abva kuti Yezu abuluka ku Yudeya mbaenda ku Kana. Natenepa, iye abuluka ku nzinda wace wa Kafarnau mbaenda ku Kana toera kaonana na Yezu. Mwakutsukwala kakamwe iye alonga: ‘Mbuya, tendeni mwananga mbadzati kufa.’—Juwau 4:49.

Panango ntawiro wa Yezu wacitisa mamuna kudzumatirwa: ‘Bwerera kunyumba kwako, mwanako awanga.’ (Juwau 4:50) Mamuna unoyu wa cidzo akhulupira pidalonga Yezu mbabwerera kunyumba kwace. N’njira, iye agumanikana na anyabasace akuti akhabwera toera kumpanga mphangwa zadidi zakuti mwanace awanga, pontho ali na ungumi wadidi! Iye abvundzisa toera kudziwa pidacitika: ‘Ndi ndzidzi upi udawanga iye?’

Iwo atawira: ‘Iye awanga dzulo pa ndzidzi ubodzi wakumasikati.’—Juwau 4:52.

Mamuna wa cidzo adzindikira kuti ukhali ndzidzi unoyu udampanga Yezu kuti ‘mwanako awanga.’ Buluka penepo, mamuna unoyu wakuti akhali wakupfuma kakamwe, banja yace yonsene na anyabasace adzakhala anyakupfundza a Kristu.

Pyenepi pisapangiza kuti Yezu acita pirengo piwiri ku Kana. Kucinja madzi kudza vinyu na kuwangisa m’phale na kutali, nsindzo wa makilometru 26. Yezu nee acita pirengo pyenepi basi. Mbwenye cirengo ceneci ndi cakufunika thangwi ndi cidzindikiro cakubwerera kwace ku Galileya. Mwakukhonda penula iye ndi mprofeta wakutawirika kwa Mulungu. Kodi ‘mprofeta unoyu mbadalemedzwa mu cisa cace’ mpaka papi?

Pyenepi pinaoneka angabwerera kunyumba kwace ku Nazareti. Mphapo ninji pikhafuna kucitika kweneku?