KHUNDU WACIXANU

Bwererani Kuna ‘Nkumbizi Na Muyang’aniri Wa Umaso Wanu’

Mwa mipingizo idadinga ife mu bruxura ino, iripo idalandana na inathimbana na imwe? Khala ndi tenepo, cidikhiro ciripo kwa imwe. Atumiki azinji a Mulungu a mu ndzidzi wakale na a ntsiku zino athimbanambo na mipingizo ibodzi ene. Ninga mudatambira iwo ciphedzo ca Yahova toera kukunda mipingizo ineyi, imwe munakwanisambo.

“Ndatoma kuona kuti Yahova cipo andisiya; natenepa, ndikhafunika kusaka njira yakubwerera kuna iye”

KHALANI na cinyindiro cakuti Yahova anadzakhala na imwe mungabwerera kuna iye. Iye anadzakuphedzani toera kuthimbana na kupswipa ntima, kukunda mabvero akutsalakanwa mwakuipa, na kugumana ntendere wa manyerezero na wa muntima thangwi yakukhala na cikumbuntima cakucena. Natenepa, munadzakulumizika toera kutumikira pontho Yahova pabodzi na Akristu andzanu. Makhaliro anu anadzakhala sawasawa na a Akristu anango a pyaka dzana yakutoma. Kwa iwo mpostolo Pedhro alemba: ‘Kale mukhali ninga mabira akutayika mbwenye cincino mwabwerera kuna nkumbizi na muyang’aniri wa umaso wanu.’—1 Pedro 2:25.

Kubwerera kuna Yahova ndi cinthu cadidi kakamwe kwa imwe toera kucicita. Thangwi yanji? Thangwi munadzakomeresa ntima wa Yahova. (Misangani 27:11) Imwe musadziwa kuti Yahova ali na mabvero, natenepa iye asakhuyiwa na macitiro athu. Mwandimomwene, Yahova nkhabe kutikakamiza toera kunfuna na kuntumikira. (Deuteronomyo 30:19, 20) Nyakudziwisa pya Bhibhlya unango afokotoza pyenepi munjira iyi: “Kunja kwa ntima nkhabe mphatiro toera kufungula nsuwo wa ntima wa munthu. Iwo usafunguka basi ene na nkati.” Tingalambira Yahova thangwi yakunfuna na ntima wathu onsene, ife tinakwanisa kusankhula kufungula nsuwo unoyu. Tingacita pyenepi, ife tisampasa muoni wakufunika kakamwe—kukhulupirika kwathu. Natenepa, tisakomeresa kakamwe ntima wace. Mwandimomwene, nkhabe cinango cakulandana na kukomerwa kunakhala na ife thangwi yakupasa Yahova ulambiri wakuthema kwa iye.—Machitiro 20:35; Apokalipse 4:11.

Mulongo wakuti akhadasiya kutumikira Yahova akutambirwa na manja mawiri m’mpingo

Kusiyapo pyenepi, mungatoma pontho ulambiri wanu Wacikristu, pifuno pyanu pyauzimu pinadzakwaniriswa. (Mateo 5:3) Munjira yanji? Anthu azinji pa dziko yonsene asabvundzika: ‘Thangwi yanji ife tiripo?’ Iwo asafuna kakamwe kudziwa cifuniro ca umaso. Anthu asafuna kudziwa pyenepi thangwi Yahova aacita na cifuniro ceneci. Iye aticita toera tikhale akutsandzaya pa kuntumikira. Nkhabebve thangwi inango toera kukomerwa kusiyapo kudziwa kuti tikulambira Yahova mu kukulumizwa na ufuni.—Masalmo 63:1-5.

Taphata miyendo, dziwani kuti Yahova asafuna kakamwe kuti mubwerere kuna iye. Munakhala tani na cinyindiro ca pyenepi? Nyerezerani: Bruxura ino yacitwa pakumala kucita phembero kakamwe. Iyo yabwereswa kuna imwe, panango na nkulu wa mpingo peno nyakukhulupira ndzanu. Buluka penepo, imwe mwakulumizika toera kuileri mbamutawira pinalonga iyo. Pyonsene ipi ndi pipangizo pyakuti Yahova nee akuduwalani. Mbuto mwace, mwakukoma ntima iye ali kukukwewerani pontho kuna iye.—Jwau 6:44.

Mphyakuwangisa kudziwa kuti Yahova cipo asaduwala atumiki ace akutayika. Ndi pyenepi pidabvesesa mulongo anacemerwa Donna. Iye alonga: “Mwapang’ono pang’ono ndasiya undimomwene, mbwenye kazinji kene ndikhanyerezera mwacidikhodikho lemba ya Masalmo 139: 23, 24 inalonga kuti: ‘Mulungu, musake mwa ine mbamuona ntima wanga; mundidinge mbamudziwa manyerezero anga. Yang’anani khala ndisatoweza njira yakuipa, mbamundifambisa pa njira ya kwenda na kwenda.’ Ine ndikhadziwa kuti nee ndikhacita khundu ya dziko, pontho cipo ikhali yakuthema kwa ine. Ndikhadziwambo kuti ndikhafunika kucita khundu ya gulu ya Yahova. Ndatoma kuona kuti Yahova cipo andisiya; natenepa, ndikhafunika kusaka njira yakubwerera kuna iye. Ndiri wakutsandzaya kakamwe thangwi yakucita pyenepi!”

Yahova anadzakhala na imwe mungabwerera kuna iye

Tikucita phembero na ntima onsene toera mugumane pontho ‘kukomerwa kunapereka Yahova.’ (Nehemiya 8:10) Mungabwerera kuna Yahova, imwe cipo munadzatsumbikika.

Matawiro a Mibvundzo Thangwi Yakubwerera Kuna Yahova

NDINATOMA NA PAPI?

Munthu wakuti akhaduwala asafunika kutoma mabasa ace andzolowero mwapang’ono pang’ono. Munjira ibodzi ene, imwe munakwanisa kuwangisa umaso wanu Wacikristu mu kuyesera kudya pang’ono cakudya cauzimu ntsiku zonsene. Nee musafunika kunyerezera kuti musafunika kucita pyonsene mu ndzidzi ubodzi ene. Panango munakwanisa kuphatisira mphindi zingasi toera kuleri Bhibhlya peno kubvesera Bhibhlya yakugravarwi, kupfundza ibodzi mwa mabukhu athu, kupita mu Website ya jw.org, peno kuona ibodzi mwa maprogramu anapangizwa mu jw.org. Yeserani kugumanika pa misonkhano ya mpingo mwakukhonda dembuka. Cakufunika kakamwe, citani phembero kuna Yahova mbamuphemba ciphedzo cace. ‘Mutulire iye pyonsene pinakudzudzumisani, thangwi iye asakutsalakanani.’—1 Pedro 5:7.

“Pidasiya ine kutumikira, ndikhali na manyadzo kakamwe kwakuti ndikhacimwana kucita phembero. Pidakhala ine na cipapo toera kucita phembero, nkulu wa mpingo wa pacisa cathu abwera kudzandiona. Iye andiphedza toera kuona kuti Yahova nee andisiya. Nkulu wa mpingo unoyu andiphemba toera kutoma kuleri Bhibhlya ntsiku zonsene. Pidacita ine pyenepi, ndakhala na mphambvu toera kuenda ku misonkhano. Mukupita kwa ndzidzi ndatoma kuenda pontho mu utumiki. Ndiri wakutsandzaya kakamwe thangwi Yahova cipo andisiya.”—Eeva.

KODI MPINGO UNADZANDITAMBIRA TANI?

Khalani na cinyindiro cakuti abale na alongo m’mpingo anadzakutambirani na manja mawiri. Mbuto mwa kukusumulani peno kukulongani mwakuipa, iwo anadzapangiza ufuni wawo kwa imwe mbacita pyonsene pinakwanisa iwo toera kukuwangisani. —Ahebere 10:24, 25.

“Ndikhali na manyadzo toera kubwerera ku Nyumba ya Umambo. Ndikhanyerezera kuti axamwali anga mbadanditsalakana tani. Mulongo wathu unango wakugwesera wakuti akhali m’mpingo unoyu mu pyaka 30 nduli alonga kuna ine, ‘Bweraniko mwananga!’ Pyenepi pyakhuya kakamwe ntima wanga. Mwandimomwene, ndikhali panyumba.”—Javier.

“Ndaenda Kunyumba ya Umambo mbandikhala nduli kakamwe toera ndikhonde kuoniwa. Mbwenye azinji atoma kundidzindikira thangwi ndikhasonkhana pikhali ine mwana. Iwo anditambira mwadidi mbandikhumbatira mwaufuni, ndabva kuti ndikhali mu ntendere ukulu. Pikhali ninga ndikhadabwerera kunyumba.”—Marco.

KODI AKULU A MPINGO ANADZANDIPHEDZA TANI?

Akulu a mpingo anadzakutsalakanani mwaufuni. Iwo anadzakusimbani thangwi ya cifuno canu cakupangiza pontho ‘ufuni wanu wakutoma.’ (Apokalipse 2:4) Iwo anadzakuphedzani na ntima onsene toera kusasanyira madodo onsene adacita imwe, mbacita pyenepi na “ntima wakukhurudzika.” (Agalata 6:1; Misangani 28:13) Akulu a mpingo anakwanisa kukusakirani munthu toera kupfundza Bhibhlya na imwe, panango mukuphatisira bukhu ninga Achegue-se a Jeová peno ‘Khalani mu Ufuni wa Mulungu.’ Khalani na cinyindiro cakuti akulu a mpingo anadzakuwangisani na kukuphedzani munjira zonsene. —Izaiya 32:1, 2.

“Mu pyaka pisere pyakuti nee ndikhatumikira, akulu a mpingo apitiriza kundiphedza. Ntsiku inango nkulu wa mpingo andipangiza foto ikhadatibulusa iye. Iwo andikumbusa pinthu pizinji pyadidi, pyenepi pyandicitisa kukhala na citsuwo ca kukomerwa kukhali na ine mu ndzidzi ukhatumikira ine Yahova. Mwaufuni, akulu a mpingo andiphedza toera kutoma pontho mabasa anga auzimu.”—Victor.

“Mulungu Anadzakupasani Mphambvu”

Bukhu yathu ya nyimbo, Imbirani Yahova Mwakutsandzaya, iri na nyimbo zizinji zakuphata ntima zakuti zinakwanisa kukubalangazani na kukuwangisani mu ndzidzi unatoma imwe kucita pontho mabasa anu auzimu. Mwacitsandzo, onani mafala a nyimbo 38. Nyimbo ineyi yabuluswa m’mafala a 1 Pedro 5:10, iyo iri na nsolo wakuti: “Mulungu Anadzakupasani Mphambvu.”

Yahova akubulusani n’cidima,

Mbakupasani undimomwene.

Aona ntimanu wakufunisisa

Kundziwa na kumutumikira.

M’phembero imwe mwaperekeka;

Yahova anadzakuphedzani.
M’lungu apereka Mwanace kwa imwe;

Thangwi iye asakufunani.

Lekani penula, anakuphedzani,

Ngakhale Mwanace atipasa.

Yahova nkhabe kudzaduwala

Ufuni unapangiza imwe.

(KORO)

Cincino imwe muli m’manja mwa Mulungu.

Munapaswa mphambvu, pontho na cipapo.

Iye anadzakhala cifupi na imwe,

Mbakuwangisani, na kukukoyani.

Toera kubvesera nyimbo ineyi ya Umambo yakuimbwa mwakugaluza na zinango, citani scan pa cidzindikiro ici peno kupita mu jw.org.