Cikhulupiro ca Abhrahamu Cayeserwa

Abhrahamu ndzidzi onsene akhapfundzisa mwanace Izaki toera afune Yahova na kunyindira mapikiro ace onsene. Mbwenye pikhali Izaki na pyaka 25 pyakubalwa, Yahova aphemba Abhrahamu toera acite cinthu cakunentsa kakamwe. Cinthu ceneci cikhali cipi?

Mulungu apanga Abhrahamu: ‘Ndaphata miyendo, kwata mwanako m’bodzi basi, ndoko ku dziko ya Moriya toera umpereke kweneko ninga ntsembe paphiri.’ Abhrahamu nee akhadziwa kuti thangwi yanji Yahova am’phemba toera kucita pyenepi. Ngakhale tenepo iye abvera.

Mangwana mwace namacibese, Abhrahamu akwata Izaki na atumiki ace awiri mbaenda ku Moriya. Pidapita ntsiku zitatu iwo atoma kuona mapiri na kutali. Abhrahamu apanga atumiki ace toera adikhire pang’ono thangwi iye na mwanace akhafuna kuenda kapereka ntsembe. Abhrahamu akwata nkhuni mbapasa Izaki, mbwenye iye aphatira mpeni. Izaki abvundza babace: ‘Cinyama cace ciri kupi toera kupereka ntsembe?’ Abhrahamu atawira: ‘Mwananga, Yahova anadzatipasa.’

Pidafika iwo ku phiri, acita guwa ya ntsembe. Buluka penepo, Abhrahamu amanga mikono na miyendo ya Izaki, mbamuikha pa nkhuni zikhali padzulu pa guwa ya ntsembe.

Pidakwata Abhrahamu mpeni, anju wa Yahova ancemera kubulukira kudzulu: ‘Abhrahamu! Leka kupha mwanako! Cincino ndisadziwa kuti iwe usagopa Mulungu thangwi watawira na ntima onsene kupereka mwanako ninga ntsembe.’ Buluka penepo, Abhrahamu aona mwanabira pa thendere, iye ansudzula mbampereka ninga ntsembe m’mbuto mwa mwanace.

Kutomera pa ntsiku ineyi, Yahova acemera Abhrahamu xamwali wace. Thangwi yanji? Ndi thangwi yakuti Abhrahamu acita pyonsene pidam’phemba Yahova, maseze iye nee akhadziwa kuti thangwi yanji Yahova am’phemba toera kucita pyenepi.

Yahova alonga pontho pikiro yace kuna Abhrahamu: “Ndinadzakupasa nkhombo, pontho ndinadzanjipisa dzindza yako.” Pyenepi pisabveka kuti Yahova mbadadzapasa nkhombo anthu onsene adidi kubulukira kwa mbumba ya Abhrahamu.