Yana Aphemba Mwana

Mamuna unango wa ku Izraeli akhacemerwa Elikana akhali na akazi awiri, Yana na Penina. Mbwenye iye akhafuna kakamwe Yana kupiringana Penina. Penina akhali na ana, mbwenye Yana nee akhali na mwana. Na thangwi ineyi Penina akhasingirira Yana. Pyaka pyonsene, Elikana akhakwata banja yace toera kuenda ku Silo kalambira ku tabhernakulo. Ntsiku inango pikhali iwo kweneku, Elikana aona kuti Yana akhali wakutsukwala kakamwe. Iye alonga: ‘Yana leka kulira, iwe uli na ine, pontho ndisakufuna kakamwe.’

Pidapita ndzidzi ungasi, Yana abuluka mbaenda kacita phembero. Pikhadembetera iye kuna Yahova toera kumphedza, iye alira kakamwe mbapikira: ‘Yahova, mungandipasa mwana wamamuna, ine ndinadzampereka kuna imwe toera akutumikireni mu umaso wace onsene.’

Nyantsembe Wankulu Eli, pidaona iye kuti Yana akhadembetera anyerezera kuti iye akhadaledzera. Mbwenye Yana ampanga: ‘Nkhabe, mbuyanga, ine nee ndaledzera. Basi ene ndiri kulonga kuna Yahova pinandidzudzumisa.’ Eli adzindikira kuti akhadadawa, pontho ampanga: ‘Mulungu mbakupase pidam’phemba iwe.’ Yana akhurudzika mbaenda mwakutsandzaya. Nkati mwa caka cibodzi, Yana abala mwana mban’thula Samweli. Mwakukhonda penula, Yana atsandzaya kakamwe.

Yana nee aduwala pikiro idacita iye kuna Yahova. Samweli pidasiya iye kuyamwa, Yana ankwata mbaenda kansiya ku tabhernakulo toera atumikire kweneko. Yana apanga Eli: ‘Khombwani adaphemba ine ndi uyu. Iye anadzatumikira Yahova mu umaso wace onsene.’ Natenepa, pyaka pyonsene Elikana na Yana akhaenda kaona Samweli, pontho akhampasa nguwo zipswa. Yahova aphedza Yana toera kukhala na ana anango amuna atatu na anango awiri akazi.