Pikiro ya Yefite

Aizraeli akhadasiya pontho kulambira Yahova mbatoma kulambira alungu apezi. Alungu anewa nee aphedza Aizraeli pidamenyana iwo na Amoni. Na thangwi ineyi, iwo athabuka kakamwe mu pyaka pizinji. Pakumalisa, iwo apanga Yahova: ‘Ife tadawa, tipulumuseni m’manja mwa anyamalwa athu.’ Buluka penepo, Aizraeli afudza alungu awo apezi mbatoma pontho kulambira Yahova. Yahova nee akhafuna kuaonabve mbakathabuka.

Nyankhondo akhacemerwa Yefite asankhulwa toera kutsogolera Aizraeli pakumenyana na Amoni. Iye apanga Yahova: ‘Mungandiphedza kuwina, munthu wakutoma anafuna kubuluka pansuwo wa nyumba yanga toera kudzanditambira anadzakhala wanu.’ Yahova abvesera phembero ya Yefite mbam’phedza kuwina nkhondo.

Pidabwerera Yefite kunyumba, munthu adatoma kuonana na iye akhali mwanace m’bodzi basi wankazi. Penepo mwanace abwera kudzantambira mbakaimba pandero na kubvina. Yefite mbadacitanji? Iye akumbuka pikiro yace mbalonga: ‘Mama ine mwananga! Iwe wanditsukwalisa kakamwe! Ndacita pikiro kuna Yahova. Toera ndikwanirise pikiro ineyi, ndisafunika kukutumiza ku tabhernakulo ku Silo toera ukatumikire kweneko.’ Mbwenye mwanace ampanga: ‘Baba, khala mwapikira kuna Yahova, musafunika kukwanirisa pikiro yanu, mbwenye mbandidzati kuenda nditawiriseni ndikhale ndekhene miyezi miwiri toera ndiende na andzanga ku mapiri. Buluka penepo, ndinaenda ku Silo.’ Mwana wa Yefite atumikira mwakukhulupirika pa tabhernakulo mu umaso wace onsene. Mu pyaka pyonsene axamwali ace akhaenda ku Silo toera kamuona.