Samisoni Apaswa Mphambvu na Yahova

Aizraeli azinji atoma pontho kulambira alungu authambi. Natenepa Yahova atawirisa kuti Afilisti aathabuse. Mbwenye pakhali na Aizraeli anango akuti akhafuna Yahova. M’bodzi wa iwo akhali Manowa. Iye na nkazace nee akhali na ana. Ntsiku inango Yahova atuma anju toera kulonga na nkazace Manowa. Anju ampanga: ‘Unadzabala mwana wamamuna. Iye anadzakhala Nazireu, pontho anadzapulumusa Aizraeli m’manja mwa Afilisti.’ Kodi Anazireu akhali ani? Anazireu akhali atumiki akupambulika a Yahova, pontho nee akhatawiriswa kucinga tsisi.

Mukupita kwa ndzidzi, Manowa na nkazace adzakhala na mwana mban’thula Samisoni. Pidakula iye, Yahova ancitisa kukhala wamphambvu kakamwe. Na thangwi ineyi, iye akwanisa kupha nkhalamu na manjace. Ntsiku inango Samisoni apha Afilisti akukwana 30. Pyenepi pyacitisa Afilisti kumuida mbafuna kumupha. Ntsiku inango namasiku pikhagona Samisoni ku Gaza, Afilisti aenda pa nsuwo wa nzinda mbadikhira Samisoni toera kumupha namacibese. Mbwenye iye alamuka tcititciti, mbaenda pa nsuwo wa nzinda mbaukhutca. Iye auikha paphewa pace mbaenda nawo padzulu paphiri dhuzi na Ebhroni!

Buluka penepo, Afilisti aenda kuna mankhadzi wa Samisoni, Dhalila, mbampanga: ‘Ungatipanga pinacitisa Samisoni kukhala na mphambvu, tinadzakupasa kobiri zizinji za parata. Ife tisafuna kumuikha nkaidi.’ Dhalila atawira thangwi iye akhafuna kakamwe kobiri. Pakutoma, Samisoni akhakhonda kumpanga cikhancitisa kukhala na mphambvu. Mbwenye Dhalila akakamiza Samisoni mpaka kumpanga cibisobiso cace. Iye alonga: ‘Tsisi yanga cipo yacingwa, thangwi ndine Nazireu. Ndingacingwa, mphambvu zanga zinamala.’ Samisoni nee akhafunika kulonga pyenepi. Thangwi yanji?

Mwakukhonda dembuka Dhalila apanga Afilisti: ‘Ndisadziwa cibisobiso cace!’ Dhalila acitisa Samisoni kuphatwa na citulo mbagona pa miyendo pace, buluka penepo apanga munthu toera kucinga tsisi ya Samisoni. Dhalila akhuwa: “Samisoni, Afilisti ali pano!” Pidalamuka iye, nee akhalibve na mphambvu. Afilisti am’phata mbam’phola maso, pontho amuikha nkaidi.

Ntsiku inango, Afilisti azinji agumanyikana mu templo ya mulungu wawo Dhagoni, mbakhuwa: ‘Mulungu wathu atipasa Samisoni! M’bwereseni toera adzatisekese.’ Iwo amulimirisa pakati pa mizati miwiri, mbansingirira. Samisoni aphembera: “Yahova, ndaphata miyendo, ndikumbukeni, pontho ndipaseni mphambvu ulendo uno basi.” Mu ndzidzi unoyu, tsisi ya Samisoni ikhadakula pontho. Iye asukhuma mizati ya templo na mphambvu zace zonsene, templo mbigwa. Natenepa iye pabodzi na anthu onsene akhali mwenemo afa.