Dhavidhi na Sauli

Pidamala Dhavidhi kupha Goliyati, Mambo Sauli amuikha ninga nkulu wa anyankhondo ace. Dhavidhi awina nkhondo zizinji, pontho iye adzakhala wakubvekera kakamwe. M’maulendo onsene akhabuluka Dhavidhi ku nkhondo, akazi akhabvina mbaimba tenepa: ‘Sauli apha anthu 1.000, mbwenye Dhavidhi apha 10.000.’ Natenepa Sauli adzakhala na bibvu na Dhavidhi mbafuna kumupha.

Dhavidhi akhadziwa mwadidi kuimba arpa. Ntsiku inango, iye akhaimbira arpa Sauli. Buluka penepo Sauli amponyera dipa toera kumulasa. Dhavidhi andzwenga, dipa mbilasa pa paredhi. Sauli ayesera kazinji kene kupha Dhavidhi. Mbwenye Dhavidhi athawa mbaenda kabisala n’thando.

Sauli akwata anyankhondo 3.000 mbaenda kasaka Dhavidhi. Sauli apita m’mphako ibodzi ene mukhadabisala Dhavidhi na amuna akhali na iye. Amuna anewa alonga mwaciwerewere: ‘Uyu ndi mwai wako toera kupha Sauli.’ Dhavidhi afika cifupi mbagwanda phindi ya nguwo ya Sauli. Sauli nee adzindikira cinthu. Buluka penepo, Dhavidhi apasika mulando thangwi yakukhonda pangiza cilemedzo kuna mambo wakudzodzwa na Yahova. Iye nee atawirisa kuti amuna akhali na iye aphe Sauli. Buluka penepo iye acemera Sauli, mbampanga: ‘Ndikhali na mwai toera kukuphani, mbwenye nee ndacita pyenepi.’ Kodi Sauli acinja manyerezero ace akufuna kupha Dhavidhi?

Nkhabe. Sauli apitiriza kusaka Dhavidhi. Ntsiku inango namasiku, Dhavidhi na ndzukulu wace, Abhisai, aenda ku misasa ya Sauli. Onsene akhagona kuphatanizambo Abhineri, nyakutsidzikiza mambo Sauli. Abhisai alonga: ‘Uyu ndi mwai wathu! Ndisiyeni ndimuphe!’ Dhavidhi alonga: ‘Yahova anadzantcunyusa. Basi ene tende tikwate dipa yace na mulinga wace wa madzi tiende.’

Dhavidhi akwira phiri ikhali dhuzi na misasa ya anyankhondo a Sauli. Iye akhuwa: ‘Abhineri, thangwi yanji nee watsidzikiza mambo wako? Uli kupi mulinga wace wa madzi na dipa yace?’ Sauli adzindikira fala ya Dhavidhi, mbalonga: ‘Iwe mbudandipha, mbwenye nee wacita pyenepi. Ndisadziwa kuti iwe unadzakhala mambo wa Izraeli.’ Buluka penepo Sauli abwerera kunyumba kwace. Mbwenye nee ndi onsene a banja ya Sauli akhatcinga Dhavidhi.