Yeoyadha Akhali Wacipapo

Yezabheli akhali na mwana wankazi akhacemerwa Ataliya. Iye akhacita pinthu pyakuipa kakamwe ninga mai wace, pontho akhadasembwa na mambo wa ku Yuda. Pidafa mamunace, mwanace wamamuna adzakhala mambo. Mbwenye pidafa mwanace, Ataliya aikhika ekhene ninga mambo wa ku Yuda. Iye apha anthu onsene a akuti mbadakhala amambo, kuphatanizambo adzukulu ace. Natenepa anthu onsene akhan’gopa.

Nyantsembe Wankulu Yeoyadha na nkazace Yeosebha, akhadziwa kuti pikhacita Ataliya pikhali pyakuipa kakamwe. Mbwenye iwo akhala na cipapo, mbakwata Yeowasi wakuti akhali ndzukulu wa Ataliya, pontho akhali wang’ono kakamwe mbam’bisa mu templo na kuntsalakana mwenemo.

Pikhali Yeowasi na pyaka pinomwe, Yeoyadha acemeresa akulu onsene a mbumba na Alevi, mbaapanga: ‘Onerani misuwo ya templo, lekani tawirisa munthu kupita.’ Buluka penepo, Yeoyadha akhazikisa Yeowasi ninga mambo wa Yuda, pontho am’bvazika nthimba munsolo mwace. Mbumba ya mu Yuda yakhuwa: “Mbakuzwe mambo!”

Mambo wankazi Ataliya pidabva iye mbumba mbikakhuwa, iye athamanga mbaenda mu templo. Pidaona iye mambo mupswa, iye akhuwa: “Mwandisandukira! Mwandisandukira!” Natenepa atsogoleri a misoka aphata Ataliya, abuluka naye kunja mbamupha. Kodi pinthu pyakuipa pikhacita iye kuna mbumba pikhadamalambo?

Yeoyadha aphedza mbumba toera kucita cibverano na Yahova cakuti iwo mbadalambira basi ene Yahova. Yeoyadha apanga mbumba toera kufudza templo ya Bhaale na madzimunthu onsene. Iye asankhula anyantsembe, Alevi na anyakuonera misuwo toera kuphata basa pa templo. Natenepa iwo mbadakwanisa kulambira pontho Yahova munjira yadidi. Yeoyadha na akulu a mbumba akwata Yeowasi mbaenda naye kunyumba ya mambo, pontho iwo an’khazikisa pa mpando waumambo. Mbumba ya mu Yuda yatsandzaya kakamwe thangwi iyo mbidakwanisa pontho kutumikira Yahova mwakukhonda dzudzumiswa na Ataliya, pontho na ulambiri wa Bhaale. Mwandimomwene cipapo ca Yeoyadha caphedza anthu azinji kakamwe.