Yosiya Akhafuna Mwambo wa Mulungu

Yosiya akhala mambo wa Yuda pikhali iye na pyaka pisere. Mu ntsiku zenezi, anthu akakhulupira mizimu na kulambira madzimunthu. Pikhali Yosiya na pyaka 16, iye apfundzisa mbumba toera kulambira Yahova munjira yakutawirika. Na pyaka 20, iye atoma kufudza madzimunthu na maguwa akhali mu dziko yonsene ya Yuda. Pikhali iye na pyaka 26 pyakubalwa, iye acita masasanyiro toera templo ya Yahova isasanyirwe.

Nyantsembe wankulu Hilkiya agumana bukhu ya Mwambo wa Yahova yakuti panango ikhadalembwa na Mose. Mulembi wa mambo akhacemerwa Safani, akwata bukhu ineyi ya Mwambo mbaenda nayo kuna Yosiya, buluka penepo atoma kuileri mwakugaluza. Yosiya pikhabvesera iye, adzindikira kuti mbumba ikhadasiya kubvera Yahova mu pyaka pizinji. Mambo Yosiya apanga Hilkiya: ‘Yahova aipirwa kakamwe na ife. Ndoko ukalonge naye toera atipange pinafunika ife kucita.’ Yahova aphatisira mprofeta wankazi akhacemerwa Uldha toera kutawira: ‘Anthu a ku Yuda asiya kundibvera, natenepa ine ndinadzaatcunyusa, mbwenye nee ndinadzacita pyenepi mu utongi wa Yosiya, thangwi iye acepeseka.’

Mambo Yosiya pidabva iye mphangwa zenezi, aenda ku templo mbacemeresa mbumba ya Yuda toera igumanyikane. Buluka penepo, iye aleri Mwambo wa Yahova mwakugaluza kuna mbumba yonsene. Yosiya na mbumba apikira kuti anabvera Yahova na ntima wawo onsene.

Mbumba ya Yuda nee ikhacita Paskwa mu pyaka pizinji. Mbwenye pidaleri Yosiya Mwambo mbaona kuti Paskwa ikhafunika kucitwa pyaka pyonsene, iye apanga mbumba: ‘Tendeni ticitire Yahova phwando ya Paskwa.’ Buluka penepo, Yosiya apereka ntsembe zizinji, pontho acita masasanyiro toera mu templo mugumanike nsoka wa anyakuimba. Mbumba yacita Paskwa, buluka penepo yacita Phwando ya Mikate Yakusowa Pyakutupisa mu ntsiku zinomwe. Ulendo wakumalisa udacita iwo Paskwa ninga ineyi ukhali mu ntsiku za Samweli. Yosiya akhafuna kakamwe Mwambo wa Mulungu. Imwembo musakomerwa kupfundza thangwi ya Yahova?