PFUNDZIRO 14

Kugomezera Ntsonga Zakufunika

Ahebheri 8:1

MUSAFUNIKA KUCITANJI: Phedzani anyakubvesera anu toera akutowezereni mu ndzidzi unacita imwe nkhani, pontho bvekesani kuti ntsonga ibodzi na ibodzi isabverana tani na nsolo wa nkhani.

MUNACITA TANI PYENEPI:

Khalani na cifuniro. Ndi cipi cifuniro ca nkhani yanu? Ndi toera kudziwisa? Kuphedza anthu toera kukhulupira? Peno toera kukulumiza? Khalani na cinyindiro cakuti ntsonga zonsene zinakuphedzani kukwanirisa cifuniro canu.

Bvundzikani: ‘Ndi ipi mibvundzo yakuti panango anyakubvesera anaicita thangwi ya nkhani yanga? Thangwi yanji anacita mibvundzo ineyi?’ Buluka penepo, gumanyani mwadidi ntsonga zanu toera anyakubvesera anu akwanise kukutowezerani, kubvesesa, pontho atawire mphangwa zanu.
Gomezerani nsolo wa nkhani yanu. Toera kugomezera nsolo wa nkhani, musafunika kubwereza mafala akufunika a nsolo wa nkhani peno kuphatisira mafala akulandana.
Longani ntsonga zanu mwakubveka mwadidi. Sankhulani ntsonga zakufunika zakuti zisabverana na nsolo wa nkhani, pontho zakuti zinakuphedzani toera kupfundzisa mwadidi mwakubverana na ndzidzi udapaswa imwe. Longani ntsonga zakucepa, pontho bvekesani ntsonga ibodzi na ibodzi yakufunika. Limirani pa ntsonga ibodzi na ibodzi, pontho lekani cimbiza kulonga ntsonga inango mbamudzati kumalisa kubvekesa mwadidi ntsonga inalonga imwe.

Mu ndzidzi unatoma imwe nkhani yanu, longani ntsonga zakufunika toera anyakubvesera anu akwanise kukutowezerani, peno zilongeni mu ndzidzi unamalisa imwe nkhani yanu toera anyakubvesera anu akwanise kuzikumbuka.