NSOLO WA REVISTA | MUNAKWANISA KUKHALA NA UXAMWALI NA MULUNGU
Kodi Musadziwa Mbamuphatisira Dzina Ya Mulungu?
Kodi alipo xamwali wanu wapantima wakuti nee musadziwa dzinace? Panango nkhabe. Nkazi wa ku Bulgária anacemerwa Irina alonga: “Nkhabe kwanisika kukhala na uxamwali na Mulungu khala iwe nkhabe kudziwa dzinace.” Mbwenye ninga pidalongwa mu nsolo udamala, Mulungu asafuna kuti mufendedzere kuna iye. Natenepa, kubulukira m’Bhibhlya, Mulungu apangizika pakweca kuna imwe mu kulonga kuti: “Ine ndine Yahova. Ineyi ndi dzina yanga.”—Izaiya 42:8, Tradução do Novo Mundo.
Kodi Yahova asafunadi kuti mudziwe dzinace mbamuiphatisira, peno nkhabe? Onani basi: Dzina ya Mulungu, yalembwa na malembo manai Acihebere anadziwika ninga Tetragrama. Dzina ineyi isagumanika m’malembo akutoma Acihebere maulendo akukwana 7.000. Dzina ineyi yabwerezerwa kakamwe m’Bhibhlya kupiringana madzina anango onsene. Mwandimomwene, pyenepi pisapangiza kuti Yahova asafuna kuti tidziwe dzinace na mbatiiphatisira.a
Mbwenye anango anakwanisa kunyerezera kuti Mulungu ndi wakucena na wamphambvu zonsene, natenepa, kuphatisira dzinace mbapidapangiza kusowa cilemedzo. Ndimomwene kuti mphyakuipa kuphatisira dzina ya Mulungu munjira yakukhonda thema, ninga imwe nee mbamudaphatisira mwakuipa dzina ya xamwali wanu wapantima. Mbwenye cifuno ca Yahova ndi cakuti ale ananfuna, alemedze dzinace na kuidziwisa kuna anango. (Masalmo 69:30, 31; 96:2, 8) Kumbukani kuti Yezu apfundzisa atowereri ace toera kuphembera: “Baba wathu wakudzulu, dzina yanu iceneswe.” Ife tinakwanisa kucita khundu mu kucenesa dzina ya Mulungu kubulukira mu kudziwisa dzina yace kuna anango. Kucita pyenepi kusatifendedzera kuna iye.—Mateo 6:9, NM.
Bhibhlya isapangiza kuti Yahova asayang’ana mwaufuni kuna ale ‘ananyerezera peno anapasa ntengo dzinace.’ (Malakiya 3:16) Kwa anthu anewa, Yahova asapikira: ‘Ndinadzantsidzikiza thangwi asadziwa dzina yanga. Iye angandicemera, ine ndinadzantawira, ndinadzakhala na iye panyatwa.’ (Masalmo 91:14, 15) Kudziwa na kuphatisira dzina ya Yahova mphyakufunika kakamwe toera kukhala na uxamwali wapantima na iye.
[Cidzindikiro capantsi]
a Mwakutsukwalisa, azinji adathumburuza Bhibhlya abulusa dzina ya Mulungu, mwakukhonda kutsalakana kuti iyo isagumanika mwakubwereza-bwereza m’Malemba Acihebere, akuti kazinji kene asacemerwa Unthaka Wa Kale. Mbuto mwace, iwo acinja dzina ya Mulungu mbaikha pidzo ninga “Mbuya” peno “Mulungu.” Toera kudziwa pizinji thangwi ya pyenepi, onani matsamba 195-197 a bukhu Kodi Mwandimomwene Biblya Isapfunzisanji?, yakubuluswa na Mboni za Yahova.
[Ntsonga ikulu pa tsamba 4]
Kubulukira m’Bhibhlya, Mulungu apangizika pakweca kuna imwe mu kulonga kuti: “Ine ndine Yahova. Ineyi ndi dzina yanga.”—Izaiya 42:8, NM.