Thangwi Yanji Tisakumbuka Cakudya Cancidodo Ca Mbuya?

“Pitirizani kucita ipi toera mundikumbukire.”​—1 AKOR. 11:24, Tradução do Novo Mundo.

MUNATAWIRA TANI?

Thangwi yanji tisafunika kukumbuka Cakudya Cancidodo Ca Mbuya?

Kodi pidzindikiro pya Cikumbuso ndi pipi, pontho ipyo pisaimiriranji?

Kodi Akristu asaona tani cidikhiro cidapaswa iwo na Mulungu?

1, 2. Ninji pidacita Yezu n’cidodo ca ntsiku 14 ya Nisane ya caka 33 N.W.? (Onani cithundzithundzi cakutoma.)

AKHALI masiku a ntsiku 14 ya Nisane ya caka 33 N.W., mwezi wakudzala ukhamwanikira mwadidi Yerusalemu. Yezu na apostolo ace akhadacita Paskwa toera kukumbuka kuombolwa kwa Aisraele mu Ejito mu pyaka 1.500 nduli. Pabodzi na apostolo ace 11 akukhulupirika, Yezu akhazikisa cakudya cakupambulika toera kukumbuka kufa kukhafuna kuthimbana na iye pa ntsiku ineyi.a​—Mat. 26:1, 2.

² Yezu acita phembero yakuphemba nkhombo mbapereka nkate wakusowa cakutupisa kwa apostolo ace, mbalonga: ‘Kwatani mudye.’ Iye akwata ndiko ya vinyu mbacita pontho phembero yakupereka takhuta mbalonga: ‘Mwerani mwenemu mwonsene.’ (Mat. 26:26, 27) Nkate na vinyu pikhali na mabvekero akupambulika, atowereri akukhulupirika a Yezu apfundza pinthu pizinji pa masiku anewa akufunika kakamwe.

3. Ndi mibvundzo ipi inafuna kudzadingwa mu nsolo uno?

³ Ndi munjira ineyi idakhazikisa Yezu Cikumbuso ca kufa kwace cakuti cisacemerwambo ‘Cakudya Cancidodo Ca Mbuya.’ (1 Akor. 11:20) Mbwenye anango anakwanisa kubvundza: Thangwi yanji tisafunika kukumbuka kufa kwa Yezu? Ndi api mabvekero a nkate na vinyu? Tinakhunganyika tani toera kucita Cikumbuso? Mbani asafunika kudya nkate na kumwa vinyu? Kodi Akristu asafunika kuona tani pinalonga Bhibhlya thangwi ya cidikhiro cawo?

THANGWI YANJI TISAKUMBUKA KUFA KWA YEZU?

4. Kodi kufa kwa Yezu kwakwanirisanji?

⁴ Ninga ana a dzindza ya Adhamu, ife tatambira madawo na kufa. (Arom. 5:12) Nee munthu m’bodzi wakusowa ungwiro anakwanisa kupereka ciomboli toera kupulumusa umaso wace peno wa anango. (Sal. 49:6-9) Mbwenye kufa kwa Yezu kwalipa ntengo wa ciomboli cibodzi basi cakutawirika​—manungo ace aungwiro na ciropa cace. Mudapereka iye ntengo wa ciomboli cace kuna Mulungu, Yezu acitisa kuti tiombolwe m’madawo na kufa, mbatitambira muoni wa umaso wakukhonda mala.​—Arom. 6:23; 1 Akor. 15:21, 22.

5. (a) Tisadziwa tani kuti Mulungu na Kristu asatifuna? (b) Thangwi yanji tisafunika kugumanika pa cikumbuso ca kufa kwa Yezu?

⁵ Masasanyiro a ciomboli asapangiza kuti Mulungu asafuna anthu pa dziko yapantsi. (Jwau 3:16) Yezu apangizambo ufuni wace kwa ife mu kupereka ntsembe ya umaso wace. Mbadzati kubalwa ninga munthu pa dziko yapantsi, ninga ‘mesiri wa basa’ wa Mulungu, Yezu ‘akhakomerwa kakamwe na ana a anthu.’ (Mis. 8:30, 31) Kupereka takhuta kuna Mulungu na kuna Mwanace, kusafunika kutikulumiza toera kugumanika pa cikumbuso ca kufa kwa Yezu mbatipangiza kubvera ntemo wakuti: “Pitirizani kucita ipi toera mundikumbukire.”​—1 Akor. 11:23-25, NM.

KODI PIDZINDIKIRO PISABVEKANJI?

6. Tisafunika kuona tani nkate na vinyu inaphatisirwa pa Cikumbuso?

⁶ Pidakhazikisa iye Cikumbuso, Yezu nee acinja mwacirengo nkate na vinyu kudza manungo ace na ciropa cace. Mbuto mwace, iye alonga: “Nkate uyu usaimirira manungo anga.” Thangwi ya vinyu, iye alonga: “Vinyu iyi ikuimirira ‘ciropa canga mu cibverano’ cinadzatsanulirwa toera kuphindulisa anthu azinji.” (Marko 14:22-24, NM) Natenepa, pisaoneka pakweca kuti nkate na vinyu pikhafunika kuoniwa ninga pidzindikiro.

7. Kodi nkate unaphatisirwa pa Cikumbuso usaimiriranji?

⁷ Pa ndzidzi unoyu wakufunika kakamwe mu caka 33 N.W., Yezu aphatisira nkate wakusowa cakutupisa udasala pa phwando ya Paskwa. (Eks. 12:8) M’Bhibhlya, pyakutupisa, midzidzi inango pisaimirira uipi peno madawo. (Mat. 16:6, 11, 12; Luka 12:1) Natenepa, nkate wakusowa cakutupisa udaphatisira Yezu ukhali na mabvekero thangwi iwo usaimirira mwakukwana manungo ace akusowa madawo. (Aheb. 7:26) Ndi na thangwi ineyi kuti ife tisaphatisira ntundu unoyu wa nkate pa Cikumbuso.

8. Kodi ndiko ya vinyu inaphatisirwa pa Cikumbuso isaimiriranji?

⁸ Vinyu idaphatisira Yezu pa ntsiku 14 ya Nisane ya caka 33 N.W., isaimirira ciropa ca Yezu. Lero, ndiko ya vinyu pa Cikumbuso isaimirirambo ciropa ca Yezu. Pa Golgota mbuto yakuti iri kunja kwa Yerusalemu, ciropa ca Yezu catsanulirwa toera “kulekerera madawo.” (Mat. 26:28; 27:33) Nakuti nkate na vinyu pinaphatisirwa pa Cikumbuso isaimirira ntsembe ya ntengo ukulu idapereka Yezu toera kuphindulisa anthu akubvera, pontho ife tisapasa ntengo masasanyiro anewa, mphyakuthema kakamwe kuti m’bodzi na m’bodzi wa ife akhunganyike toera kukumbuka Cakudya Cancidodo Ca Mbuya pacaka.

NJIRA ZINGASI TOERA KUKHUNGANYIKA

9. (a) Thangwi yanji tisafunika kuphatisira malemba a Bhibhlya analonga pya Cikumbuso? (b) Ndi api mabvero anu thangwi ya ciomboli?

⁹ Njira ibodzi toera kukhunganyika Cikumbuso ndi kuphatisira malemba a Bhibhlya analonga pya Cikumbuso anagumanika mu calendário wathu peno mu Examine as Escrituras Diariamente toera kunyerezera mwacidikhodikho pinthu pidacita Yezu mbadzati kufa. Pyenepi pinatiphedza kukhunganya ntima wathu toera kugumanika pa Cakudya Cancidodo Ca Mbuya.b Mulongo unango alemba: “Tisadikhira kakamwe Cikumbuso. Ico cisakhala cakupambulika caka cibodzi na cibodzi. Ndisakumbuka pikhali ine dzololo n’nyumba inakoyerwa anthu akufa . . . mbandiyang’ana baba wanga wakufunika, pyenepi pisakhuya ntima wanga toera kupasa ntengo ciomboli. . . . Oh, ndikhadziwa malemba onsene na kuafokotoza! Mbwenye pidathimbana ine na kutsukwala kwa kuferwa, ntima wanga wadzala na kukomerwa thangwi yakudziwa pinafuna kudzakwaniriswa na ciomboli ceneci cakufunika kakamwe.” Inde, pakukhunganyika Cikumbuso, mphyadidi kunyerezera mwacidikhodikho kuti ntsembe ya Yezu isatisudzula tani mu nyatwa ya madawo na kufa.

10. Kodi kukhunganyika cikumbuso kusafunika kukhuya tani utumiki wathu?

¹⁰ Njira inango toera kukhunganyika Cikumbuso ndi kuthimizira ndzidzi unaphatisira ife mu utumiki wathu, panango kutumikira ninga apainiya akuphedza mu ndzidzi wa Cikumbuso. Mu ndzidzi unacemera ife anyakupfundza Bhibhlya toera kugumanika pa Cikumbuso, tinadzakhala akutsandzaya mu kulonga pya Mulungu, Mwanace, na nkhombo zinadikhira ale anakomeresa Yahova na kunsimba.​—Sal. 148:12, 13.

11. Kodi Akorinto anango akhadya tani pidzindikiro pya Cikumbuso munjira yakukhonda thema?

¹¹ Munakhunganyika imwe toera kugumanika pa Cakudya Cancidodo Ca Mbuya, dingani mwacidikhodikho pidalemba mpostolo Paulu kwa Akristu a mpingo wa ku Korinto. (Lerini 1 Akorinto 11:27-34.) Paulu alonga kuti munthu onsene anadya nkate mbamwa vinyu mwakukhonda thema, iye ‘ali kupwaza manungo na ciropa ca Mbuya’ Yezu Kristu. Natenepa, munthu wakudzodzwa asafunika “anyerezere pyadidi ekhene,” angamala kucita pyenepi anakwanisa kudya na kumwa pidzindikiro. Angakhonda kucita pyenepi, iye ali ‘kudya mbamwa kudawa na kutongwa kwace.’ Na thangwi ya macitiro akuipa, ku Korinto akhalipo ‘anthu azinji akuduwala na akusowa mphambvu, azinji ene akhadafa mwauzimu.’ Pisaoneka kuti anango akhadya mbamwa mwakupiringana midida Cikumbuso mbicidzati kutoma, peno nkati mwa Cikumbuso, natenepa iwo nee akhakwanisa kunyerezera mwadidi, mbaodzira mwauzimu. Kudya pidzindikiro munjira ineyi yakukhonda thema nee kukhakomeresa Mulungu.

12. (a) Kodi Paulu alandanisa Cikumbuso ninganji, mphapo ndi cenjezo ipi idapereka iye kuna ale anadya? (b) Khala munthu anadya pidzindikiro acita madawo makulu asafunika kucitanji?

¹² Paulu alandanisa Cikumbuso ninga cakudya, natenepa iye acenjeza ale anadya: ‘Munacimwana kumwa na ndiko ya Yahova mbamumwambo na ndiko ya mademonyo; munacimwana kudya pa meza ya Yahova mbamudyambo pa meza ya mademonyo.’ (1 Akor. 10:16-21) Khala munthu wakuti asadya pidzindikiro pa Cakudya Cancidodo Ca Mbuya acita madawo makulu, asafunika kusaka ciphedzo cauzimu. (Lerini Tyago 5:14-16.) Angamala kupangiza ‘misapo yakutcinyuka kwace,’ angadya pidzindikiro pya Cikumbuso, iye nee ali kupwaza ntsembe ya Yezu.​—Luka 3:8.

13. Thangwi yanji tisafunika kucita phembero thangwi ya cidikhiro cidapaswa ife na Mulungu?

¹³ Munakhunganyika ife toera kugumanika pa Cikumbuso, mphyadidi kakamwe kucita phembero mbatinyerezera pya cidikhiro cidapaswa ife na Mulungu. Nee ntumiki m’bodzi wa Yahova peno ntowereri wakukhulupirika wa Mwanace mbadafuna kupwaza ntsembe ya Yezu mu kudya pidzindikiro pya Cikumbuso khala mwandimomwene iye nkhabe cipangizo cakukwana cakuti iye ndi Nkristu wakudzodzwa. Mphapo, munthu anadziwa tani khala athema peno nee athema toera kudya na kumwa pidzindikiro?

MBANI ASAFUNIKA KUDYA NKATE NA KUMWA VINYU?

14. Kodi cibverano cipswa cisabvekanji kwa ale anadya mbamwa pidzindikiro pya Cikumbuso?

¹⁴ Ale anadya mbamwa pidzindikiro pya Cikumbuso, ali na cinyindiro cakukwana cakuti asacita khundu ya cibverano cipswa. Thangwi ya vinyu, Yezu alonga: ‘Ndiko iyi ndi unthaka peno cibverano cipswa mu ciropa canga.’ (1 Akor. 11:25) Kubulukira mwa mprofeta Yeremiya, Mulungu apikira kuti Mbadacita cibverano cipswa cakusiyana na cibverano ca Mwambo cidacita iye na Aisraele. (Lerini Yeremiya 31:31-34.) Mulungu acita cibverano cipswa na Israele wauzimu. (Agal. 6:15, 16) Cibverano ceneci cakhazikiswa mu ntsembe ya Kristu mbacitoma kuphata basa kubulukira mu ciropa cace. (Luka 22:20) Yezu ndi Muimiriri wa cibverano cipswa, anyakudzodzwa akukhulupirika anapita mu cibverano ceneci anadzakhala na Yezu kudzulu.​—Aheb. 8:6; 9:15.

15. Mbani anacita khundu ya cibverano ca Umambo, ndi mwai upi unadikhira iwo angapangiza kukhulupirika?

¹⁵ Anyakudzodzwa anadya pidzindikiro pya Cikumbuso, asadziwa kuti iwo asacita khundu ya cibverano ca Umambo. (Lerini Luka 12:32.) Atowereri akudzodzwa akukhulupirika a Yezu, akuti mbadapirira nyatwa zibodzi zene ninga za Yezu, mbadatonga pabodzi na iye kudzulu. (Afil. 3:10) Nakuti iwo ali mu cibverano ca Umambo, anyakudzodzwa akukhulupirika anadzatonga na Kristu ninga amambo akudzulu kwenda na kwenda. (Apok. 22:5) Anyakudzodzwa anewa ndi akuthema toera kudya na kumwa pidzindikiro pa Cakudya Cancidodo Ca Mbuya.

16. Fokotozani mwacigwagwa mabvekero a Aroma 8:15-17.

¹⁶ Basi ene ale akuti ali na umboni wa nzimu wakuti iwo ndi ana a Mulungu asafunika kudya pidzindikiro pya Cikumbuso. (Lerini Aroma 8:15-17.) Onani kuti Paulu aphatisira fala ya Ciaramaki, “Abba,” yakuti isabveka “Baba!” Mwana anakwanisa kuphatisira fala ineyi pa kucemera babace, thangwi ineyi ndi fala yacilemedzo inapangiza fala yauxamwali na yacilemedzo, “baba.” Ale adatambira ‘nzimu wa kuacitisa kukhala ana,’ ndi ana a Mulungu ‘akubalwa na nzimu.’ Nzimu wa Mulungu usapereka umboni pabodzi na nzimu wawo, na kuapasa cidzindikiro cakuti iwo ndi ana akudzodzwa a Yahova. Pyenepi nee pisabveka kuti iwo basi ene aluza cifuno cakukhala pa dziko yapantsi. Iwo ali na cinyindiro consene cakuti angapangiza kukhulupirika mpaka kufa kwawo, anadzatonga pabodzi na Yezu mu Umambo wakudzulu. Lero, ana anewa akudzodzwa a Yahova adasalikira mwa anthu 144.000 anatowerera Kristu ndi akucepa pa dziko yapantsi. (1 Jwau 2:20; Apok. 14:1) Na ciphedzo ca nzimu wa Mulungu, iwo asakwanisa kukhuwa, “Abba, Baba!” Iwo ali na nkhombo ya uxamwali wapantima na Mulungu!

PASANI NTENGO CIDIKHIRO CANU CAKUBVERANA NA BHIBHLYA

17. Ndi cipi cidikhiro ca anyakudzodzwa, mphapo asaona tani cidikhiro ceneci?

¹⁷ Khala ndimwe Nkristu wakudzodzwa, longani kazinji kene pya cidikhiro canu pakucita phembero yanu pamwekha. Bhibhlya ingalonga pya kumanga banja kwa Yezu Kristu na “Mankhadzi” kudzulu, imwe musaona kuti pyenepi pisaphatisirwa kwa imwe, pontho musadikhira kucita khundu ya “mankhadzi” wa Kristu. (2 Akor. 11:2; Jwau 3:27-29; Apok. 21:2, 9-14) Mafala a Mulungu angapangiza ufuni wace kwa anace auzimu, imwe musaona kuti, “Akulonga na ine.” Mafala a Yahova angapereka pitsogolero kwa anace akudzodzwa, nzimu wakucena usakukulumizani toera kubvera mbamulonga muntima mwanu, “Pyenepi pisaphatisirwa kwa ine.” Natenepa, nzimu wa Mulungu usaphatana na nzimu wanu mu kupereka umboni wakuti imwe muli na cidikhiro cakudzulu.

18. Kodi “mabira anango” ali na cidikhiro cipi? Kodi imwe musaona tani cidikhiro ceneci?

¹⁸ Mbwenye khala ndimwe m’bodzi wa “mwinji ukulu” wa “mabira anango,” Mulungu akupasani cidikhiro cakukhala pa dziko yapantsi. (Apok. 7:9; Jwau 10:16) Imwe musafuna kakamwe kukhala mu Paradizu kwenda na kwenda, pontho musakomerwa munganyerezera pinalonga Bhibhlya thangwi ya umaso ntsogolo pa dziko yapantsi. Musadikhira kukhala mu dziko yantendere pabodzi na acibale anu na anthu anango akulungama. Musadikhira na cifuno cikulu ndzidzi wakuti anthu nkhabe kudzathabukabve na njala, utcerengi, nyatwa, mautenda, na kufa. (Sal. 37:10, 11, 29; 67:6; 72:7, 16; Iza. 33:24) Imwe musafuna kakamwe kutambira anthu anafuna kudzalamuswa muli akufa mbadikhira kukhala maso kwenda na kwenda pa dziko yapantsi. (Jwau 5:28, 29) Imwe musapereka takhuta kakamwe thangwi Yahova akupasani nkhombo ya cidikhiro cakukhala pa dziko yapantsi. Maseze imwe nkhabe kudya na kumwa pidzindikiro, imwe musagumanika pa Cikumbuso toera kupangiza kupereka kwanu takhuta ku ciomboli ca ntsembe ya Yezu Kristu.

KODI IMWE MUNADZAGUMANIKA?

19, 20. (a) Munakwanisa tani kukhala maso kwenda na kwenda? (b) Thangwi yanji munadzagumanika pa Cikumbuso?

¹⁹ Mwakukhonda tsalakana khala musadikhira kuenda kudzulu peno kukhala pa dziko yapantsi, cidikhiro ceneci cinadzakwanirisika basi ene mungakhulupira Yahova Mulungu, Yezu Kristu, na ciomboli. Kugumanika pa Cikumbuso, kunakupasani mwai toera kunyerezera mwacidikhodikho pya cidikhiro canu na ntengo ukulu wa kufa kwa Yezu. Natenepa, citani pyonsene toera kukhala m’bodzi wa pikwi na pikwi pya anthu anafuna kudzagumanika pa Cikumbuso ncidodo ca ntsiku 3 ya Bwinja ya caka 2015 pa Nyumba za Umambo na mbuto zinango pa dziko yonsene.

²⁰ Kugumanika pa Cikumbuso kunathimizira kupereka kwanu takhuta ku ciomboli ca ntsembe ya Yezu. Kubvesera mwadidi nkhani kunakukulumizani toera kupangiza ufuni kwa anyakuendekana anu mu kucedza na iwo pidapfundza imwe thangwi ya ufuni wa Yahova na cifuniro cace cikulu kwa anthu. (Mat. 22:34-40) Natenepa, khalani wakutonga toera kugumanika pa Cakudya Cancidodo Ca Mbuya.

[Pidzindikiro pyapantsi]