KUTAWIRWA KWA MIBVUNDZO YA BHIBHLYA

Kodi Ntsiku Yakutongwa Ninji?

M’midzidzi ya Bhibhlya, Mulungu aphatisira atongi toera kupulumusa anthu ace m’makhaliro akusowa ulungami. (Atongi 2:18) Bhibhlya isalonga Ntsiku Yakutongwa ya ntsogolo ninga ndzidzi wakutsandzayisa, wakuti Yahova, Ntongi wa dziko yonsene yapantsi anadzapulumusa anthu m’makhaliro akusowa ulungami.​—Lerini Masalmo 96:12, 13; Izaiya 26:9.

Mulungu asankhula Yezu toera kukhazikisa ulungami kwa anthu a maso na akufa. (Machitiro 10:42; 17:31) Anthu azinji asafa mbakhonda dziwa Mulungu. Mu Ntsiku Yakutongwa, Yezu anadzalamusa anthu anewa muli akufa toera akwanise kudziwa na kufuna Mulungu wandimomwene.​—Lerini Machitiro 24:15.

Thangwi Yanji Ntsiku Yakutongwa Inadzamala Pyaka Cikwi?

Anthu akufa anadzalamuswa nkati mwa pyaka cikwi. (Apokalipse 20:4, 12) Natenepa panadzafunika ndzidzi toera apfundze njira za Mulungu na kumbvera. Mwakusiyana na maonero a anthu azinji, Bhibhlya isapangiza kuti anthu anadzatongwa kubulukira mu pinthu pinadzacita iwo pakumala kulamuswa.​—Lerini Aroma 6:7.

Bhibhlya isalongambo kuti ntsiku yakutongwa inadzafika mwakututumusa, mbipidzati kutoma pyaka cikwi. Ntsiku ineyi isacemerwambo kumala kwa dziko ninga pidalongwa mu nsolo wa revista ino. Mu ntsiku ineyi, Mulungu anadzafudza anthu akukhonda lemedza Mulungu, akuipa. (2 Pedro 3:7) Natenepa, tisafunika kupitiriza kufuna Mulungu.​—Lerini 2 Pedro 3:9, 13.