“Khalani Akuwanga Mu Cikhulupiro”
“Khalani akuwanga mu cikhulupiro, . . . khalani amphambvu.”—1 AKOR. 16:13, Tradução do Novo Mundo.
NYIMBO: 23, 34
MUNATAWIRA TANI?
Thangwi yanji cikhulupiro ndi cakufunika kakamwe?
Tinadziwa tani khala cikhulupiro cathu catoma kufewa?
Tinawangisa tani cikhulupiro cathu mu kutowezera citsandzo ca Yezu?
1. (a) Ninji pidacitikira Pedhro mu ndzidzi wa condzi m’Bara ya Galileya? (Onani cithundzithundzi cakutoma.) (b) Thangwi yanji Pedhro atoma kulirima?
NTSIKU inango camasiku, mpostolo Pedhro na anyakupfundza anango akhanentseka na condzi toera kuwambuka Bara ya Galileya. Mwakukhonda dikhira, iwo aona Yezu mbakafamba padzulu pa bara. Pedhro acemera Yezu mbamphemba kuti afambe padzulu pa madzi toera aende kuna iye. Pidantawirisa Yezu, Pedhro abuluka m’mwadiya, mwacirengo afamba padzulu pa madzi mbaenda kukhali Yezu. Mbwenye thimize pang’ono, Pedhro atoma kulirima. Thangwi yanji? Iye ayang’ana condzi mbagopa. Pedhro akhuwa mbacemera Yezu, mwakucimbiza Yezu amphata mbapanga: “Iwe, wakukhulupira pang’ono, wapenuliranji?”—Mat. 14:24-32.
2. Tinadzadinganji mu nsolo uno?
2 Tendeni tidinge pinthu pitatu pya mbiri ya Pedhro thangwi ya cikhulupiro: (1) Kodi Pedhro apangiza tani cikhulupiro ku ciphedzo ca Mulungu? (2) Thangwi yanji Pedhro atoma kuluza cikhulupiro? (3) Ninji cidaphedza Pedhro toera kukhala pontho na cikhulupiro? Kudinga ntsonga zenezi kunatiphedza toera kuona kuti tinakwanisa tani “kukhala akuwanga mu cikhulupiro.”—1 Akor. 16:13, NM.
KHULUPIRANI CIPHEDZO CA MULUNGU
3. Thangwi yanji Pedhro abuluka m’mwadiya, pontho ndi munjira ipi tacitambo pibodzi pyene?
3 Pidabuluka Pedhro m’mwadiya mbafamba padzulu pa madzi, iye acita pyenepi mwacikhulupiro. Pidancemera Yezu, Pedhro anyindira kuti mphambvu ya Mulungu ikhaphedza Yezu mbidamphedzambo. Munjira ibodzi ene, pidaperekeka ife kwa Yahova mbatibatizwa, tacita pyenepi thangwi ya cikhulupiro cathu. Yezu aticemera toera kukhala atowereri ace na kulonda manyalo ace. Tisafunika kukhulupira Mulungu na Yezu, mbatinyindira kuti iwo anatiphedza munjira zakusiyana-siyana.—Jwau 14:1; lerini 1 Pedro 2:21.
4, 5. Thangwi yanji cikhulupiro ndi muoni wakufunika kakamwe?
4 Mwandimomwene, cikhulupiro ndi muoni wakufunika kakamwe. Ninga cikhulupiro ca Pedhro camphedza toera kufamba padzulu pa madzi, cikhulupiro cathu cisatiphedza toera kucita pinthu pyakuti anthu anapiona ninga pyakukhonda kwanisika. (Mat. 21:21, 22) Mwacitsandzo, azinji a ife tacinja maonero na macitiro athu munjira yakuti ale adatidziwa na makhaliro akale nkhabe kutidzindikira. Yahova aphedzera kuwangisira kwathu thangwi tacita pyenepi mwakubverana na cikhulupiro cathu kwa iye. (Lerini Akolose 3:5-10.) Cikhulupiro cathu catikulumiza toera kuperekeka kwa Yahova, natenepa, tadzakhala axamwali ace, cinthu cakuti nee mbatidakwanisa kucicita na mphambvu zathu.—Aef. 2:8.
5 Cikhulupiro cathu cisapitiriza kutipasa mphambvu. Na cikhulupiro, tisakwanisa kupirira mayesero a nyamalwa wathu wamphambvu kakamwe, Dyabo. (Aef. 6:16) Kusiyapo pyenepi, kunyindira Yahova kusatiphedza toera kukhala na maonero akulinganira m’midzidzi ya nyatwa. Yahova asalonga kuti cikhulupiro cathu cingatikulumiza toera kuikha Umambo pa mbuto yakutoma, iye anadzatsalakana pyakusowa pyathu pyakumanungo. (Mat. 6:30-34) Mu kupiringana pyonsene, thangwi ya cikhulupiro cathu, ife tinadzatambira umaso wakukhonda mala—muoni wakuti munthu nkhabe kuukwanisa na mphambvu yace.—Jwau 3:16.
KUSOWA CINYINDIRO KUSACITISA KULUZA CIKHULUPIRO
6, 7. (a) Kodi condzi na mabimbi pidaona Pedhro tinakwanisa kupilandanisa nanji? (b) Thangwi yanji tisafunika kudziwa kuti mphyakukwanisika kuluza cikhulupiro cathu?
6 Mphepo na mabimbi adaona Pedhro pikhafamba iye padzulu pa madzi pinakwanisa kulandaniswa na nyatwa na mayesero anathimbana na ife mu umaso wathu Wacikristu. Ngakhale kuti nyatwa ndi zikulu kakamwe, na ciphedzo ca Yahova tinakwanisa kukhala akuwanga. Kumbukani kuti Pedhro nee alirima thangwi ya mphepo peno mabimbi makulu. M’mbuto mwace, Bhibhlya isalonga: ‘Pakuona condzi cikulu, agopa.’ (Mat. 14:30) Pedhro asiya kuyang’ana kuna Yezu, buluka penepo cikhulupiro cace catoma kufewa. Ife tinatoma kulirima ‘tingayang’ana condzi,’ kunyerezera mphambvu yaco mbatitoma kupenula ciphedzo ca Yahova.
7 Tisafunika kudziwa kuti mphyakukwanisika kuluza cikhulupiro cathu. Thangwi yanji? Bhibhlya isalonga kuti kufewa peno kuluza cikhulupiro ndi ‘madawo akuti asatimanga mwakukhonda nentsa.’ (Aheb. 12:1) Ninga munapangiza mbiri ya Pedhro, cikhulupiro cathu cinakwanisa kufewa mwakucimbiza tingaikha manyerezero athu ku pinthu pyakuipa. Mphapo tinadziwa tani khala cikhulupiro cathu catoma kufewa? Dingani mibvundzo mingasi yakuti tinakwanisa kuiphatisira toera kudingika tekhene.
8. Kodi mapikiro a Mulungu anaoneka tani ninga nee si andimomwene kwa ife mwakusiyana na kale?
8 Kodi mapikiro a Mulungu asapitiriza kukhala andimomwene kwa ine ninga pikhacita ine kale? Mwacitsandzo, Mulungu asapikira kufudza makhaliro ano a pinthu. Mphapo, tisadzudzumiswa na mitundu yakusiyana-siyana ya ubalangazi inaperekwa na dziko ino? Kodi pyenepi pikufewesa cikhulupiro cathu ku mapikiro a Mulungu? Khala ndi tenepo, panango tinatoma kupenula khala kumala kuli cifupi. (Aheb. 2:3) Onani citsandzo cinango. Mulungu apikira kutilekerera kubulukira ku ciomboli. Mbwenye tinganyerezera kakamwe pya madawo athu akale, panango tinatoma kupenula khala Yahova alekereradi madawo athu. (Mach. 3:19) Natenepa, tinakwanisa kuluza kutsandzaya kwathu m’basa ya Mulungu mbatisiya kumwaza mphangwa.
9. Ninji pinafuna kudzacitika tingaikha manyerezero athu ku pifuno pyakumanungo?
9 Kodi ndiciri waphinga m’basa ya Mulungu ninga kale? Mpostolo Paulu apangiza kuti kuphatira basa Yahova mwakuwanga kusatiphedza toera ‘kukhala na cidikhiro cakukwana mpaka kumamalisiro.’ Mphapo ninji pinafuna kucitika tingatoma kuikha manyerezero athu ku pifuno pyakumanungo, ninga kutawira basa inalipa kobiri yakunjipa, mbwenye isapingiza ulambiri wathu? Cikhulupiro cathu cinakwanisa kufewa, mbatitoma “kuneta,” mbatipasa Yahova ndzidzi wakucepa kakamwe kupiringana pinatawirisa makhaliro athu.—Aheb. 6:10-12.
10. Tisapangiza tani cikhulupiro kwa Yahova tingalekerera anango?
10 Kodi pisanentsa kwa ine kulekerera anango angandidawira? Anango angatidawira peno kutitsukwalisa, panango tinaikha manyerezero athu ku mabvero athu mbatiyeserwa toera kuabwerezera pidaticitira iwo peno kucalira kulonga nawo. Munjira inango, tingalekerera tisapangiza cikhulupiro cathu kwa Yahova. Munjira ipi? Anthu angatidawira asatifiyari. Tingadawira Yahova, ife tisanfiyarimbo. (Luka 11:4) Tingalekerera anango, tisapangiza kuti kukhala wakutawirika kwa Mulungu ndi cinthu cakufunika kakamwe kupiringana kucitisa anthu kulipa pidaticitira iwo. Anyakupfundza a Yezu adzindikira kuti kulekerera kusaphemba cikhulupiro. Mudaaphemba iye toera kulekerera anthu onsene adaadawira kazinji kene, iwo aphemba: ‘Muthimizire cikhulupiro cathu.’—Luka 17:1-5.
11. Thangwi yanji midzidzi inango nee tisaphindula na uphungu wa Bhibhlya?
11 Kodi ndisaipirwa ndingapaswa uphungu wa Bhibhlya? M’mbuto mwakusaka njira toera kuphindula na uphungu, panango tinakwanisa kuikha manyerezero athu ku madodo a uphungu peno kwa ule anaupereka. (Mis. 19:20) Tingacita tenepo, panango tinaluza mwai wakupfundza kunyerezera ninga Mulungu.
12. Kodi munthu anadungunya ndzidzi onsene thangwi ya ale anaphatisirwa na Yahova toera kutsogolera atumiki ace asapangizanji?
12 Kodi ndisadungunya thangwi ya abale anatsogolera mpingo? Aisraele pidaikha iwo manyerezero awo ku mphangwa zakuipa za anyakusuzumira dziko 10 akusowa cikhulupiro, iwo atoma kudungunyira Mose na Aroni. Buluka penepo Yahova abvundza Mose: ‘Iwo anadzakhala lini na cikhulupiro kwa ine?’ (Num. 14:2-4, 11) Inde, kudungunya kwa Aisraele kwapangiza kuti akhadasiya kunyindira Mulungu, ule adakhazikisa Mose na Aroni. Munjira ibodzi ene, khala ndzidzi onsene tisalonga mwakuipa abale anaphatisirwa na Mulungu toera kutsogolera atumiki ace, pisapangiza kuti cikhulupiro cathu kwa Mulungu cikufewa.
13. Thangwi yanji nee tisafunika kufewa manungo tingadzindikira makhundu anango akufewa kwa cikhulupiro cathu?
13 Pakumala kudinga mibvundzo ineyi, mungadzindikira makhundu anango akufewa kwa cikhulupiro canu, lekani kufewa manungo. Kumbukani kuti mpostolo Pedhro apangiza kugopa na kupenula. Mwandimomwene, midzidzi inango Yezu asandika apostolo onsene thangwi ‘ya cikhulupiro cawo cakucepa.’ (Mat. 16:8) Kumbukani kuti ntsonga yakufunika kakamwe inapfundza ife mu mbiri ya Pedhro ndi pidacita iye pakumala kufewa kwa cikhulupiro cace mbatoma kulirima m’bara.
NYINDIRANI YEZU TOERA KUWANGISA CIKHULUPIRO CANU
14, 15. (a) Pedhro acitanji pidatoma iye kulirima? (b) Tinakwanisa tani ‘kuyang’anisisa’ Yezu lero, maseze ife nkhabe kwanisa kumuona na maso athu?
14 Pedhro acitanji pidatoma iye kulirima? Iye akhadziwa mwadidi kusambirira, panango mbadatonga kusambirira toera kubwerera m’mwadiya. (Jwau 21:7) M’mbuto mwakunyindira mphambvu zace, iye aikha manyerezero ace kuna Yezu mbatawira ciphedzo cace. Khala cikhulupiro cathu cafewa, tisafunika kutowezera citsandzo ca Pedhro. Mphapo tinacita tani pyenepi?
15 Pedhro ayang’ana kuna Yezu, ife tisafunikambo kuyang’anisisa “Ntumiki Wankulu na Wakukwanirisa cikhulupiro cathu, Yezu.” (Lerini Ahebere 12:2, 3, NM.) Mwandimomwene, ife nee tinakwanisa kuona Yezu na maso athu ninga pidacita Pedhro. M’mbuto mwace, ‘tisayang’anisisa’ kuna Yezu mukudinga pipfundziso pyace na macitiro ace na kupitowezera. Dingani njira zingasi za citsandzo cidakhazikisa Yezu zakuti tingazitowezera tinadzatambira ciphedzo cinafuna ife toera kuwangisa cikhulupiro cathu.
16. Tinapfundza tani Bhibhlya munjira yakuti inawangisa cikhulupiro cathu?
16 Nyindirani Bhibhlya mwakukwana. Yezu akhanyindira kuti Bhibhlya ndi Mafala a Mulungu, pontho isapereka citsogolero cadidi kakamwe mu umaso. (Jwau 17:17) Mukutowezera citsandzo ca Yezu, tisafunika kuleri Bhibhlya ntsiku zonsene, kuipfundza na kunyerezera mwacidikhodikho pinapfundza ife. Pakucita pfundziro ya Bhibhlya, fufudzani ntsonga zinakhonda imwe kubvesesa mwadidi. Mwacitsandzo, panango munakwanisa kuthimizira cinyindiro canu cakuti kumala kwa makhaliro ano a pinthu kuli cifupi kakamwe mu kudinga mwakukwana umboni wa Bhibhlya unapangiza kuti tikukhala mu ntsiku zakumalisa. Wangisani cinyindiro canu ku maprofesiya a Bhibhlya a ntsogolo mu kufufudza maprofesiya mazinji adakwanirisika. Kodi musanyindira kuti Bhibhlya ndi yakufunika lero? Munakwanisa kudinga mbiri zinapangiza kuti Bhibhlya isacinja tani umaso wa anthu.a—1 Ates. 2:13.
17. Thangwi yanji Yezu apitiriza kukhala wakukhulupirika pantsi pa mayesero makulu kakamwe? Munakwanisa tani kuntowezera?
17 Nyerezerani nkhombo zinapikira Yahova. Thangwi yakuyang’ana “kutsandzaya kukhali patsogolo pace,” Yezu akwanisa kupitiriza kukhala wakukhulupirika pantsi pa mayesero makulu kakamwe. (Aheb. 12:2) Iye cipo adzudzumiswa na pinthu pya dziko. (Mat. 4:8-10) Munakwanisa kutowezera citsandzo ca Yezu mu kunyerezera mwacidikhodikho nkhombo zakudzumatirisa zidapikira Yahova kwa imwe. Nyerezerani kuti muli mu dziko ipswa, pontho lembani pinthu pinafuna imwe kucita pakumala kufudzwa kwa makhaliro ano akuipa. Lembani madzina a anthu anadikhira imwe kudziwana nawo angalamuswa muli akufa na pinthu pinafuna imwe kucedza nawo. Ninga pidacita Yezu, onani mapikiro a Mulungu ninga anu, tayu ninga pinthu pidapikira iye kwa anthu onsene.
18. Kodi phembero inakuphedzani tani toera kuwangisa cikhulupiro canu?
18 Phembani cikhulupiro cakuthimizirika. Yezu apfundzisa anyakupfundzace toera kuphemba Yahova nzimu wakucena. (Luka 11:9, 13) Pakucita pyenepi, phembani cikhulupiro cakuthimizirika, unoyu ndi nkhaliro ubodzi wa nsapo wa nzimu. Pakucita phembero, longani pinakudzudzumisani. Mwacitsandzo, mungadzindikira kuti musanentseka toera kulekerera anango, phembani Yahova toera awangise cikhulupiro canu na kukuphedzani toera kukhala munthu wakulekerera.
19. Ninji cinafunika ife kusaka pakusankhula xamwali?
19 Citani uxamwali na anthu ana cikhulupiro cakuwanga. Yezu asankhula mwadidi axamwali ace, makamaka ale akuti akhali akuphatana kakamwe na iye. Apostolo akuti akhali axamwali ace apantima, akhapangiza cikhulupiro cawo na kunyindirika mbabvera matongero ace. (Lerini Jwau 15:14, 15.) Natenepa, pakusankhula axamwali, sakani anthu anapangiza cikhulupiro mbabvera Yezu. Pontho kumbukani kuti cidzindikiro cibodzi ca uxamwali wadidi ndi kucedza mwadidi, kupereka peno kutambira uphungu.—Mis. 27:9.
20. Tisaphindula tani tingaphedza anango toera kukhala na cikhulupiro cakuwanga?
20 Phedzani anango toera kuwangisa cikhulupiro cawo. Yezu awangisa cikhulupiro ca anyakupfundzace kubulukira m’mafalace na macitiro ace. (Marko 11:20-24) Tisafunika kutowezera citsandzo cace, thangwi kuphedza anango toera kuwangisa cikhulupiro cawo pisawangisambo cikhulupiro cathu. (Mis. 11:25) Pakumwaza mphangwa na pakupfundzisa anthu, gomezerani kuti Mulungu alipo, asatitsalakana, pontho Bhibhlya ndi Mafalace akupumirwa. Phedzani abale na alongo anu toera awangise cikhulupiro cawo. Khala munthu akupangiza pidzindikiro pyakupenula, panango mu kutoma kudungunya thangwi ya abale anatsogolera mpingo, lekani kuncalira mwakucimbiza. M’mbuto mwace, mphedzeni mwaluso toera akhale pontho na cikhulupiro cace. (Yuda 22, 23) Khala musapfundza kuxikola, anthu angadinga cipfundziso ca kusanduka kwa pinthu, mwacipapo tsidzikizani cikhulupiro canu mu kulonga cipfundziso ca pyakucitwa kwa pinthu—panango munadzumatirwa munjira inafuna kukhuyiwa anango na mafala anu.
21. Ninji cidapikira Yahova kwa m’bodzi na m’bodzi wa ife thangwi ya cikhulupiro cathu?
21 Na ciphedzo ca Mulungu kubulukira kwa Yezu, Pedhro akunda kugopa na kupenula kwace, mbakhala nzati wa cikhulupiro pakati pa Akristu a pyaka dzana yakutoma. Munjira ibodzi ene, Yahova asatiphedza tonsene toera kukhala akuwanga mu cikhulupiro. (Lerini 1 Pedro 5:9, 10.) Pisaphemba kuwangisira toera kukhala na cikhulupiro cakuwanga, mbwenye tingacita pyenepi, Yahova anadzatipasa nkhombo zakukhonda kulandanisika.
[Cidzindikiro capantsi]
a Mwacitsandzo, Onani misolo yakuti “Bhibhlya Isacinja Umaso Wa Anthu” mu Ncenjezi wa anthu onsene.