KUTAWIRWA KWA MIBVUNDZO YA BHIBHLYA

Kodi Anyakufa Anadzakhala Pontho Maso?

Yahova Mulungu ndi Phata ya umaso. (Masalmo 36:9) Kodi si pyakubveka tayu kuti Mulungu m’bodzi ene anadzabwezera umaso wa anthu adafa? Bhibhlya isatipasa cinyindiro cakuti iye anadzacita pyenepi ntsogolo. (Lerini Machitiro 24:15) Thangwi yanji iye anadzacita pyenepi?

Pakutoma Nciti wathu acita munthu toera kukhala maso kwenda na kwenda pa dziko yapantsi. (Genesi 1:31; 2:15-17) Ceneci cisapitiriza kukhala cifuno cace kuna anthu. Iye asabva kupha angaona pinathimbana na ife lero​—umaso wakudzala na nyatwa, pontho wakuti usamala mwakucimbiza kakamwe.​—Lerini Yobe 14:1, 14, 15.

Kodi Anyakulamuswa Muli Akufa Anadzakhala Kupi?

Kodi Mulungu acita munthu toera kukhala kudzulu? Nkhabe. Mulungu acita aanju toera kukhala kudzulu. Iye acita anthu toera kukhala pa dziko yapantsi. (Genesi 1:28; Yobe 38:4, 7) Na pyenepi m’manyerezero, dingani kulamusa anyakufa kudacita Yezu. Iye alamusa anthu mbakhala na umaso pa dziko yapantsi. Munjira ibodzi ene, azinji anafuna kudzalamuswa ntsogolo anadzakhala na umaso pa dziko yapantsi.​—Lerini Jwau 5:28, 29; 11:44.

Mbwenye, Mulungu asankhula anthu akucepa toera kualamusa muli akufa toera kuenda kudzulu, kweneku iwo anakhala na manungo auzimu. (Luka 12:32; 1 Akorinto 15:49, 50) Anyakulamuswa toera kuenda kudzulu anadzatonga dziko yapantsi ninga amambo pabodzi na Kristu.​—Lerini Apokalipse 5:9, 10.